Saʼakashi wasashi Daniel

¡SAʼAKASHI wasashi Daniel otta nnojoishi jamajüin nia natuma! ¿Jamüsü sülataka tia? ¿Jara ojutaka Daniel saʼaka wasashi? Wekirajaa sünain.

Chi aluwataaikai Babilonia nia Darío. Talatüshi Darío nümaa Daniel süka anamiain otta kekiin maʼin nia, nuluwataaka Daniel nutuma Darío. Makalaka nachunjüin wanee wayuuinnua.

Namaka nümüin Darío: ‹Puluwataa na wayuukana süpüla nnojoluin naashajaain nümaa wanee maleiwa soʼu 30 kaʼi, piainjachi naashajaaka amaa, eeka nnojoluin noonooin ojutunajana saʼaka wasashi›. Nnojotsü nütüjaain aaʼu Darío jamüin nachuntaka tia. Nüshajaka Darío tia pütchikat otta nnojotsü eeʼiratünajatüin shia.

Naapapa Daniel tia nuʼunaka nipialuʼumüin naashajaaka nümaa Maleiwa. Natüjaa aaʼu na wayuu mojulaashiikana nnojoluinjachin nuuʼulaain Daniel suulia aashajawaa nümaa Jeʼwaa. Talataka naya süka noʼutuinjachin aaʼin Daniel.

Mojuka naaʼin Darío nütüjaapa saaʼu tü alatakat. Nnojotsü süpüla niiʼiratüinjatüin tü nüshajakat, nujutiraka Daniel naʼaka na wasashikana. Nümaka Darío nümüin Daniel: ‹Anashijee nükaaliinjüle pia chi Maleiwa piʼyataakai amüin›.

Mojusü maʼin naaʼin Darío, nnojoishi nia atunkuin. Waneemüin kaʼi nuʼunaka eemüin tü ishikat, nuʼwaataka: ‹¡Daniel, aʼyataashikai nümüin chi Maleiwa shiimainkai! ¿Nükaaliinjüin pia chi Maleiwa piʼyataakai amüin?›

Nümaka Daniel: ‹Nuluwataain Maleiwa wanee aapiee süpüla nüsürülüin naanükü na wasashikana, nnojoika jamajüin taya natuma›.

Talataka maʼin chi aluwataaikai. Niyuʼliraka Daniel suluʼujee tü ishikat. Nojutunaka na wayuu mojulaashiikana naʼaka na wasashikana, nekajaaka naya.

Nümaka Darío namüin napüshuaʼa na wayuukana: ‹Kojutu jutuma chi Nümaleiwasekai Daniel. Aainjüshi nia kasa pülasü, nükaaliinjüin Daniel suulia shiküin nia wasashi›.