Ekawaa nutuma Jesús

PIAMA kaʼi süchikijee tü kaʼikat jueewoʼu, antüshi Jesús namaa na 12 aluwataaushiikana eemüin wanee paü süpüla nekaain soʼu tü Pascuakat. Chi ojuʼitaakai nia Judas Iscariote. Aküjüinjachi namüin na sacerdotekana tü naainjüinjatkat süpüla nataʼülüin Jesús.

Wanee kaʼi süpülapünaa tia müshi nia namüin: ‹¿Jeʼreerü juwalaajüin tamüin taapüle jümüin nikii Jesús?› Namaka: ‹30 nneerü pülaata›. Oʼunushi Judas eemüin na sacerdotekana süpüla niʼikajaain naya eemüin Jesús. Mojusü maʼin tia, ¿aashimüin?

Ekaainnapa naya soʼu tü Pascuakat. Eeka wanee ekawaa anasü maʼin nutuma Jesús, naapüin namüin na aluwataaushiikana wanee pan, nümaka: ‹Jikapa, shiyaakuayaa tatapaʼa taapajiraainjatka jaaʼu›. Naapaka wanee iita kaluʼusü wiino, nümaka: ‹Jüsapa, shiyaakuayaa tasha, amülainjatka jaaʼu›. Sünülia tia ekawaakat: ‹Akotchojirawaa asoʼiraka waaʼin nünain chi Senyotkai›.

Ekaapuʼushii na israeliitakana soʼu tü Pascuakat süpüla sotuin naaʼin nülatirüin chi aapieekai tü nepiakat chaaʼaya Egipto wanaa sümaa noʼutuin naaʼin neʼiruma na egipciokana. Keeʼireesü naaʼin Jesús sotuinjachin nia naaʼin na nikirajüinkana otta sotuin naaʼin ouktuin nia naaʼu. Makalaka noutkajaainjanain juyawai.

Süchikijee ekawaakat tia, nnojoluinjana mmoluin otta nachecherüinjatü naaʼin sünain anoujaa na aluwataaushiikana naashin Jesús. Süchikijee neeʼirajüin nümüin Maleiwa noʼunaka. Kaʼlesü aika wanaa sümaa tia. ¿Jalainjana naya?