Wakuwaʼipainjatka suluʼu tü mma jeketkat
¿Jamüsü paaʼin wanaa sümaa piʼrüin tü ayaakuaa suluʼukat tü karalouktakat? ¿Pücheküin talatüin pia, jimatüin paaʼin otta anain pukuwaʼipa maʼaka suluʼu tü ayaakuaakat? Eesü pücheküle shia. Akatsaʼa, ¿alawaache tü eeʼiyatünakat suluʼu tü ayaakuaakat?
Eesü alawaale shia naashin na wayuukana süka eein saaʼu tü mmakat atkawaa, jamü, ayuulii, laülawaa otta waneeirua kasa. Akatsaʼa, eesü süpüla waʼatapajüin kasa anasü suulia tia. Saashin tü Wiwüliakat eejeerü ‹wane jeket mma ooʼulaka wane kasakalüirua chakat iipünaa. Watüjaa aaʼulu sünain sülateerüin tia, süka pansaain nünüiki Maleiwa› (2 Pedro 3:13; Isaías 65:17).
Saashin tü Wiwüliakat tia «jeketkat mma» otta «wane kasakalüirua chakat iipünaa» nnojotsü shiain tü mma kaluʼukat waya otta tü sirumatuʼukat. Anasü maʼin sükumajia tü Mmakat otta tü sirumatuʼukat otta saashin tü Wiwüliakat eeinjatü shia waneepia (Salmo 89:36, 37; 104:5). Tü pütchikat ‹jeket mma› naya na wayuu anamia kepiainjanakana saaʼu tü Mmakat. Tü pütchikat ‹jeket kasakalüirua chakat iipünaa› shia wanee aluwataaya chaaʼaya iipünaa aluwataainjatka naaʼu na wayuukana. Akatsaʼa, ¿eesüche süpüla wanoujüin sünain eejeerüin wanee ‹jeket mma›?
Jülüja paaʼin shiain keeʼireein naaʼin Maleiwa paala eeinjatüin anaa akuwaʼipaa saaʼu tü Mmakat. Niʼitaain na palajanakana wayuu suluʼu wanee mma anasü kanüliaka Edén otta nuluwataaka naya sünain wanee kasa anasü maʼin: «Anakaja kachonniire jia, joulüiwa na juuʼuliwoʼukana sainküin mmakat süpüshua süpüla laulaainjanain jia saaʼu» (Génesis 1:28). Shiimain, tü keeʼireekat naaʼin Maleiwa shia kachoinjanain naya otta paraiisüinjatüin natuma süpüshuaʼa tü Mmakat. Mapa nnojoishii oonooin nümüin Maleiwa, sükajee tia, neeʼiyatüin nnojoluin kateein noʼu waneepia. Mayaapejeʼe sülatüin tia, nnojotsü aʼwanajaain tü keeʼireekat naaʼin Maleiwa. ¡Otta nikeraajeerü shia suluʼu tü mma jeketüinjatkat! (Isaías 55:11.)
Nikirajüin Jesús na nikirajüinkana süpüla nachuntüin nümüin Maleiwa süntajatüin tü Nuluwataayakat. Aluwataayakat tia, sajaʼttireerü tü kasa mojusü eekat Mmapaʼa otta aluwataainjatü shia saaʼu tü mma jeketüinjatkat (Mateo 6:9, 10). Watüjaa aaʼu nikeraajeerüin Maleiwa tü achuntünakat nümüin süka sümüin tü Wiwüliakat: «Tü mmakat namüinjatü na lotokana akuwaʼipa otta kepiainjana waneepia saaʼu» (Salmo 37:29, NM).
Tü eeinjatkat suluʼu tü mma jeketkat
Eejeerü kasa anasü Mmapaʼa sutuma Nuluwataaya Maleiwa, eejeerü tü kasa anasü keeʼireekat naaʼin Maleiwa paala napüleerua na wayuukana. Nnojoleerü üttaa aaʼin, mojuu anüikii otta aleewajiraajeena napüshuaʼa na wayuukana. Nüküjüin Maleiwa suluʼu tü Wiwüliakat ‹najaʼlajeʼerüinjatüin tü atkawaakat sainküin tü mmakat›. «Nnojoleerü nayalerüin nachajaruutse na wayuukana süpüla natkaajiraain otta nnojoleena ekirajaain sünain atkawaa» (Salmo 46:9; Isaías 2:4, NM).
Mapa, aneerü maʼin tü Mmakat meerü aka saaʼin wanee yüüja. Müsü tü Wiwüliakat: «Talateerü saaʼin tü anoouikat otta tü isashiipaʼakat sümaa kasiijeerüin süpaʼapünaa. [...] Süka sujuʼiteerüin wüin isashiipaʼajee otta miyoʼuweerü maʼin shia chaaʼaya patajatshii. Otta tü mmakat eere jaʼin kaʼi meerü aka saaʼin lamuuna otta eejeerü shikii wüin suluʼu tü mmakat eere eein wüinyaasü» (Isaías 35:1, 6, 7, NM).
Eejeerü kasa talataka atuma waaʼin suluʼu tü Mma anasükat. Nnojoleerü alatirüin jamü wayuu sutuma nnojoluin eküülü. Müsü tü Wiwüliakat: «Wainmeerü eküülü saaʼu tü mmakat» (Salmo 67:6, NM; 72:16). Napüshuaʼa na wayuukana talateena sutuma tü eekat sutuma naʼyataain, maʼaka nüküjüin chi Kakumalakai waya: «Shiimain nakumajeenain piichi otta kepieena naya suluʼu; shiimain napünajeenain otta nekeerü süchon. [...] Nnojoleena apünajüin süpüla shiküinjatüin wayuu naatajannuu» (Isaías 65:21, 22, NM).
Suluʼu tü mma jeketkat nnojoleerü kottüin wayuu suluʼu waneesia piichi otta mojuin nepia, süka müin nünüiki Maleiwa: «Shiimain nakumajeenain piichi otta kepieena naya suluʼu [...]. Nnojoleena akumajüin piichi süpüla kepiainjatüin wayuu naatajannuu suluʼu». Otta müsü tü Wiwüliakat: «Nnojoleerü kasain nashapajaain achiirua» (Isaías 65:21-23, NM). Sutuma tia, aneerü naʼyataain na wayuukana otta talateena naya sutuma. Nnojoleerü mojuin naaʼin.
Nnojoleena ekajiraain na mürütkana otta anamieena naya sümüin wayuu sutuma Nuluwataaya Maleiwa maʼakaapuʼu suluʼu tü mma kanüliakat Edén. Müsü tü Wiwüliakat: «Otta chi erü simoluunakai kottiraajeechi nümaa chi anneetchonkai, chi wünaatkai apalasiraweechi naʼatoʼu chi kaaʼulachonkai, kottiraweechi chi paaʼachonkai, chi wasashichonkai otta chi mürüt epijuushikai, jee arülejüneena naya nutuma wanee jintüichon» (Isaías 11:6-9, NM; Oseas 2:18).
Suluʼu tü Mma paraiisüinjatkat nnojoleerü eein ayuulii. Müshi Maleiwa: «Nnojoleerü müin nünüiki wanee wayuu eeka kepiain chaaʼaya: ‹Ayuuishi taya›» (Isaías 33:24, NM). «Nümülialeena naya [Maleiwa]. Müiria nnojolüin ouktaa, mojuu aaʼin, aʼyalajaa, je saalii ayuulii, süka sülatüitpain süpüshuaʼale makat aka tia» (Alateetkat Mapeena 21:4).
¿Kasa paainjüinjatka süpüla kepiain pia suluʼu?
Eesü talatüle paaʼin sutuma tü kasa eeinjatkat nutuma Maleiwa suluʼu tü mma jeketüinjatkat. Mayaapejeʼe eein wayuu eeka nnojoluin anoujüin sünain tia, nnojotsü kapüleein maʼin shia nümüin chi Maleiwa aipürai Kakumalakai waya (Salmo 145:16; Miqueas 4:4).
Akatsaʼa süpüla katüin woʼu waneepia suluʼu tü paraiisükat yaaya saaʼu tü Mmakat eesü waneeirua kasa waainjüinjatka. Nikirajüin Jesús wanee kasa waainjüinjatka maʼin: ‹Eejeechi nümaa Maleiwa waneepia eeka niyaawatüin tü shiimüin ekirajünakat püchiki sünain waneeshin pia sünain Maleiwain jee tachiki tayakai Jesucristo sünain püjünalain taya› (Juan 17:2, 3).
Wacheküle kepiain waya suluʼu tia jeketkat mma wekirajaainjatü anain palajana tü keeʼireekat naaʼin Maleiwa otta waainjüinjatü shia, süka ‹yüüʼülaa sümeerüin nakuaippa na manoujainsaliikana sümaa tü kasa mojusü keeʼireekat naaʼin. Aluʼujasa chi aaʼinrakai tü nuluwataakat anain Maleiwa, ayateechi süpüla kaʼikat süpüshua›. Waainjüle tia, naapeerü wamüin Maleiwa wainma kasa anasü (1 Juan 2:17).
Aluʼusaʼa waneejatüle tü eeʼiyatünakat, tü achuunajünakat suluʼujee tü Wiwüliakat suluʼujeejatü «Tü Nüchikimaajatkat Jesucristo» otta «Shikiikat Kasa Süpüshua Nütüma Maleiwa». Tü suluʼujeejatkat Traducción del Nuevo Mundo de las Santas Escrituras (con referencias) ashajünüsü süka NM.