¿Ajaʼttajatche tü mmakat?

Na wayuu kepiakana maaʼulu, naapüin maʼin süchiki sajaʼttajatüin tü mmakat. Eeshii eeka namüin sajaʼttajatüin tü mmakat sutuma wonpa otta sutuma yarüttüin maʼin shia. Otta waneeinnua, jiwaʼatüsü naaʼin süka eein süpüla natkaain na wayuukana sutuma alin shiiʼiree nneerü.

¿Shiimainchejeʼe sajaʼttajatüin tü mmakat? ¿Jamaluʼulu sajaʼttinnajatüin? ¿Eesü wayuu ajaʼttinnaka sümaiwa?

Ajaʼttüsü wayuu; eesü wanee shiiʼiraka

Eejana waneeinnua wayuu ajaʼttinnaka namaiwa. Jülüja waaʼin na wayuu mojulaakana maʼin soʼu nükalia Noé. Müsü tü Wiwüliakat: «Nüʼitirüin [Maleiwa] paala wane juya miyoʼushaata maʼi saaʼu tü wayuu kaainjaratkalüirua süpüla ouktajanain naya». Otta müsü shia: ‹Nnojoishii naawalüin Maleiwa na wayuukana. Nüʼitirüin wane juya miyoʼushaata süpüla ouktajanain naya. Niakalaka neʼe oʼtteʼennüin Noé namaa na akaratshishii kepiakana nümaa› (2 Pedro 2:5; 3:6).

Tia alatakat nnojotsü maluʼuluin sajaʼttaleein wayuu süpüshuaʼa. Katüsü noʼu Noé sümaa nüpüshi süchikijee tü juya miyoʼushaatakat. Otta müsia, nnojotsü ajaʼttinnüin tü Mmakat otta tü sirumatuʼukat. Naya ajaʼttinnaka na ‹wayuu mojulaashiikana›, tü kasakat süpüshuaʼa eejatka soʼu kaʼikat tia.

Mapa, kojuyapa nüpüshi Noé, eeshii waneeinnua wayuu jekennuu. Wayuukana nayainnua sümaa süpüshuaʼa tü kasakalüirua, nayaleʼeya na eekana maaʼulu. Wainma atkawaa otta kaainjalaa natuma naya wayuukana. ¿Kaseetche alataka namüin mapeena? ¿Kateetche noʼu?

Tü alatajatkat namüin na wayuukana

Süchikijee süküjüin tü Wiwüliakat najaʼttinnüin na wayuukana soʼu nükalia Noé, müsü sünüiki: ‹Otta aʼatapajüshi maaʼulu Maleiwa süpüla najaʼttirüin süka siki tü mmakat ooʼulaka tü kasakalüirua chakat iipünaa› (2 Pedro 3:7). Maʼaka nümüin wanee ashajakai tü Wiwüliakat: «Teʼrakalaka saaʼin sünain shiiʼiratünüin kasa süpüshua [...] süka ajaʼttüitpain tü mmakat» (Alateetkat Mapeena 21:1).

Tü sümakat tü Wiwüliakat nnojotsü maluʼuluin sajaʼttajatüin tü Mmakat kepiaka aluʼu waya otta tü sirumatuʼukat maʼaka nnojoluin sajaʼttüin soʼu nükalia Noé (Salmo 104:5). Tü sümakat maluʼulu najaʼttinnüinjanain na aluwataashii nuluwataaka aaʼu Satanás, makana aka saaʼin ‹siruma› otta na wayuu makana aka saaʼin ‹mma›, ajaʼttinnüinjana naya maʼaka saʼajünüin wanee kasa (Juan 14:30; 2 Corinto 4:4). Shiimain maʼin najaʼttajanain na wayuu mojulaashiikana maʼaka najaʼttüin soʼu tü juya miyoʼushaatakat. Naashin Jesucristo, tü kasa alatakat soʼu ‹nükalia Noé› shiyaawase tü alatajatkat süpülapünaa najaʼttüin na mojulaashii eekana maaʼulu (Mateo 24:37-39).

Aashajaashi Jesús süchiki nükalia Noé shiʼipajee tü nasakirakat anain na aluwataaushiikana, müshii naya: ‹¿Kasa shiyaawaseetka pükalia otta tü sükaliajatkat sajaʼlajaain kasakat süpüshua?› (Mateo 24:3). Natüjaa aaʼu na nikirajüinkana najaʼttajanain na mojulaashiikana. ¿Mmotshii naya sutuma tia?

Nnojo, müshi Jesús namüin talatüinjanain naya neʼrapa tü kasa alatajatkat süpülapünaa sajaʼttüin kasa süpüshuaʼa süka ‹nalüʼülüin süpüla taashin naya› (Lucas 21:28). ¡Taashinjana naya nuulia Satanás jee noulia na mojulaashiikana otta kepiainjana suluʼu wanee mma eere jimatüin naaʼin! (2 Pedro 3:13.)

Akatsaʼa, ¿joujeena najaʼttinnaka na wayuu mojulaashiikana? ¿Kasa ‹shiyaawaseinjatka nükalia› Jesús süpüla antaa otta ‹tü sükaliajatkat sajaʼlajaain kasakat süpüshua›?

‹Tü shiyaawasekat›

Tü pütchikat griego pa·rou·sí·a,shia tü pütchikat «antaa» otta maluʼulu shia «akaliaa». Sutuma tia, wanaa sümaa weʼrüin ‹shiyaawase› nükalia Cristo nnojotsü maluʼuluin nülüʼülüin süpüla antaa, maluʼulu nüleʼejüichipain otta yaaichipain nia wamaa. Tia maluʼulu nuʼttüichipain sünain aluwatawaa chaaʼaya sirumatuʼu otta nülüʼülüin süpüla najaʼttirüin na nüʼünüükana (Alateetkat Mapeena 12:7-12; Salmo 110:1, 2).

Nnojotsü nüküjüin Jesús waneesia neʼe kasa ‹shiyaawaseinjatka› nükalia, wainma kasa alatajatka mmapaʼa naashin. Naashin na ashajakana tü Wiwüliakat, alatajatü süpüshuaʼa tia kasakalüirua ‹sülüʼütpa süpüla sajaʼttüin kasa süpüshuaʼa› (2 Timoteo 3:1-5; 2 Pedro 3:3, 4). Wekirajaa sünain süpüshi tü kasa shiyaawaseinjatkat.

«Atkaajiraajeerü wayuu sainküin mmakat süpüshua.» (Mateo 24:7.) Joutsü maʼin tü atkawaakat maaʼulu suulialeʼeya sümaiwa. Müshi wanee ashajüi süchiki kasa alatüirü: «Soʼu tü Palajatkat Atkawaa Miyoʼusüka [oʼttaka soʼujee 1914], atkaashii ‹wainma wayuu sainküin tü mmakat›». Akatsaʼa, tü piamakat atkawaa miyoʼusüka keemaleʼesia maʼin. Otta ayatüsü eein kasa mojusü sainküin tü Mmakat sutuma tü atkawaakat. ¡Shiimain shikeraajüin maʼin tü nümakat Jesús!

‹Mülieerü wayuu sütüma jamü.› (Mateo 24:7.) Süchikijee tü Palajatkat Atkawaa Miyoʼusüka, wainmaleʼeya maʼin wayuu müliaka maʼin sutuma jamü suulia paalainka. Otta aisü maʼin jamü süchikijee tü Piamakat Atkawaa Miyoʼusüka. Wainma maʼin wayuu aürütka maʼin sutuma jamü otta shia ouktaka atuma 14.000.000 tepichi juyawai. ¡Shiimain ‹müliain maʼin wayuu sutuma jamü› maaʼulu!

«Akutkujaweerü tü mmakat.» (Lucas 21:11.) Soʼujee tü juyakat 1914, wainma maʼin wayuu ouktaka sutuma sükutkujaain tü mmakat suulialeʼeya sümaiwa. Tüü shia eere sükutkujaain mma otta jeʼrain wayuu ouktaka sutuma: 1920, China, 200.000; 1923, Japón, 140.000 (namaʼaleʼeya na amülouikana); 1939, Turquía, 32.700; 1970, Perú, 66.800, otta 1976, China, eeshii maʼaka 240.000 (jee maʼaka namüin waneeinnua, 800.000). ¡Shiimain ‹sükutkujaain maʼin tü mmakat›!

‹Mülieerü wayuu sütüma ayuulii sainküin mma.› (Lucas 21:11.) Süchikijee tü Palajatkat Atkawaa Miyoʼusüka eeshii maʼaka 21.000.000 wayuu ouktaka sutuma tü shunui aisükat. Müsü sünüiki Science Digest: «Nnojotsü eeirüin wanee ayuulii eeka keemain maʼin otta mamaʼajaaka atuma wayuu». Süchikijeʼereʼeya tia eesü kanset, SIDA, ayuulii sünain saaʼin wayuu otta waneeirua ayuulii ouktaka atuma wainma wayuu.

«Kooʼomüinjeerü wayuu kaainjarat.» (Mateo 24:12.) Atüjaana aaʼu wainmain maʼin kasa mojusü otta kaainjalashii maʼin na wayuukana soʼujee 1914. Suluʼu waneeirua mma nnojotsü anain naaʼin na wayuukana wanaa sümaa kaayeruʼuin naya, jaʼitairü soʼukalin. Asürülaashii naya aipaʼa suluʼu nepia sümaa kantaawaluʼuin shia natuma süka mmoluin naya seema ojuʼitaa.

Eesü waneeirua kasa alatajatka sülüʼütpa süpüla sajaʼttüin kasa süpüshuaʼa otta ekeraajüsü shia. Tia, shiiʼiyatüin wamüin pejein süpüla najaʼttinnüin na wayuu mojulaashiikana. Akatsaʼa, eejeena wayuu kateenaka oʼu. Süchikijee süküjüin tü Wiwüliakat ‹yüüʼülaa meenain na manoujüinsaliikana› müsü sünüiki: «Chi wayuu aaʼinrakai tü nuluwataakat anain Maleiwa, ayateechi nümaa süpüla kaʼikat süpüshua» (1 Juan 2:17).

Sünainjee tia, ekirajaainjana waya sünain tü keeʼireekat naaʼin Maleiwa otta waainjüinjatü shia. Kateetka woʼu süchikijee najaʼttinnüin na manoujüinsaliikana otta eejeerü waneepia wamaʼana kasa anasü nutuma Maleiwa. Wanaa sümaa tia, «chi Maleiwakai [...] nümülialeena [na wayuukana]. Müiria nnojolüin ouktaa, mojuu aaʼin, aʼyalajaa, je saalii ayuulii» saashin tü Wiwüliakat (Alateetkat Mapeena 21:3, 4).

[Kakorotka tü ayaakuaakalüirua süpana 6]

Kakorotka tü ayaakuaakalüirua: Katünasü, sükorolo USAF. Jintüi: sükorolo WHO nutuma W. Cutting. Sükutkujaain mma: nutuma Y. Ishiyama, Universidad chajatka Ho­kkaido, Japón.