¿Jarai maʼin chi aluwataakai saaʼu tü mmakat?

«Nia Maleiwa», müshii wainma wayuu shiʼipajee asakiraakat tia. Akatsaʼa tü Wiwüliakat nnojotsü süküjüin niain Jesucristo otta chi Nüshikai aluwataain saaʼu tü mmakat. Müshi Jesús: «Chi aluwataashikai naaʼu na manoujainsaliikana [saaʼu tü mmakat,  NM] alejüneerü jooluʼu nuulia tü aluwatawaakat». Otta müshi nia: «Mayaainje nuluwataain saaʼu wayuu sainküin mma, nnojoishi laülaain nia taaʼu» (Juan 12:31; 14:30; 16:11).

Makalaka nüʼünüüin Jesús chi aluwataakai saaʼu tü mmakat. ¿Jarai nia?

Wayaawatüin nia sükajee tü alatakat maaʼulu

Mayaapejeʼe naaʼinrüin kasa anasü waneeinnua wayuu, alatüirü wainma juya sünain müliain na wayuukana. Sutuma tia, asakitshii naaʼin maʼaka naainjüin shia chi ashajüikai David Lawrence: «‹Jimataa aaʼin saaʼu tü Mmakat›, shia tü keeʼireekat saaʼin wayuu süpüshuaʼa. ‹Anajirawaa aaʼin›, shia sukuwaʼipa soʼutku wayuu sainküin tü mmakat. Akatsaʼa, ¿jamüshii natkaweeka maʼin na wayuukana sümaa nnojoluin shiain tü keeʼireekat naaʼin?».

Mayaapejeʼe nnojoluin natkaweein na wayuukana, ayatüshii üttajiraain naaʼin otta ouktiraain naya, ¿aashimüin? Jülüja paaʼin tü kasa mojusü naainjakat na wayuukana namüin na waneeinnua sümaa nnojoluin alin namüin shia. Nooʼulaküin naʼajüin naya sümaa katüin noʼu, noʼutüin saaʼin wainma wayuu watuoʼushi otta naainjüin waneeirua kasa süpüla müliainjanain na wayuukana.

¿Naainjüinche na wayuukana süka naaʼin namüiwaʼa tia kasa keemakat? ¿Jara oʼuniraka naya sünain aaʼinraa kasa mojusü? ¿Püsakirüirü paaʼin müleka eere wanee meʼrujusai aainjiraka na wayuukana kasa keemasü eeka müin aka saaʼin tia?

¿Jaralii na aluwataakana saaʼu tü mmakat?

Nnojotsü washantanajüinjatüin aaʼu tia süka süküjüin tü Wiwüliakat eein wanee kasa pülasü aluwataaka naaʼu na wayuukana otta tü mmakat. Müsü tü Wiwüliakat: ‹Tü manoujainsatkalüirua suluʼu mmakat süpüshua, nia aluwataaka saaʼu chi Yolujaakai›. Müsü nünülia sutuma tü Wiwüliakat: «Chi sülaülakai yolujaa kanüliakai Satanás, chi eʼikeʼerakai wayuu sainküin mmakat» (1 Juan 5:19; Alateetkat Mapeena 12:9).

Wanaa sümaa «nuuʼulakünüin aaʼin [Jesús] nütüma Satanás» nnojoishi nuunjulajüin achiki niain Satanás aluwataain saaʼu tü mmakat. Müsü tü Wiwüliakat: «Nuʼuninnakalaka joo Jesús nütüma chi Yolujaakai chamüin iipünaamüin saaʼupünaa wane uuchi, sünain niiʼiyatüin nümüin tü suumainkalüirua wayuu süpüshuaʼale sünain anashaatain maʼi shia. Nümakalaka nümüin Jesús: ‹Müleka püsapainyoʼukale pia yaa tamülatuʼu sünain puʼwaajüin taya, taapeerü pümüin tü suumainkalüirua wayuu süpüshuaʼale›. Asouktüshi Jesús niʼipajee: ‹Puʼuna pümata toulia Satanás› » (Mateo 4:1, 8-10).

Jülüja paaʼin tia, ooʼulakünüsü naaʼin Jesús nutuma Satanás süka «tü suumainkalüirua wayuu süpüshuaʼale». Nnojoire sülaülain Satanás, ¿nuuʼulaküinjeʼe naaʼin Jesús süka? Nnojorüleejaʼa. Nnojotsü nuunjulajüin Jesús niain Satanás sülaülain tü suumainkalüirua wayuu, nüküjüinjeʼe nnojoire niain Satanás sülaülain. Müsüjeseʼe niain Satanás aluwataain saaʼu tü mmakat. Saashin tü Wiwüliakat, nia ‹aluwataaka saʼaka wayuu manoujainsat› (2 Corinto 4:3, 4). Akatsaʼa, ¿jamakuwaʼipai süpüla nuluwataain sümaa mojulaain nia?

Satanás niapuʼushi wanee aapiee anashi akumajuushi nutuma Jeowa, akaisaʼa nia aluwataweeshi maʼaka naaʼin Maleiwa. Mojusü nünüiki süchiki tü nuluwataayakat Maleiwa. Süpüla tia, kanüikiyaasü wanee wüi nutuma süpüla nimeejüin Eva. Sutuma tia, nuuntüin moonooin shia nümaa Adán nümüin Maleiwa (Génesis 3:1-6; 2 Corinto 11:3). Otta müshi nia eein süpüla nükatalüin nuulia Maleiwa napüshuaʼa na nuuʼuliwoʼukana Adán sümaa Eva. Sutuma tia, nuuʼulaain Maleiwa süpüla niiʼiyatüin Satanás tü nümakat. Akatsaʼa nnojotsü nüinküin tia (Job 1:6-12; 2:1-10).

Nnojoishi niain neʼe aluwataain Satanás saaʼu tü mmakat. Eeshii waneeinnua aapiee eʼrülii wayumüin nümüin Maleiwa nutuma Satanás. Yolujaashii naya otta paaʼinwajiraashii nümaa Satanás. Müsü tü Wiwüliakat namüin na anoujüshiikana: ‹Jiyouktüinjatü tü mojusükot nüchekakat jüpüleerua Satanás nnojoliishii waya atkaashiin sümaa wayuu. Atkaashii sümaa tü yolujaa mojulaasükalüirua, tü aluwataakat saaʼu tü manoujainsatkalüirua sainküin mmakat› (Éfeso 6:11, 12).

Püʼleeja na yolujaakana

Na yolujaakana nemeejeein na wayuukana süpüla nnojoluin naʼwaajüin Maleiwa. Süpüla tia nanoujirüin na wayuukana sünain katüin noʼu süchikijee ouktüin naya, mayaapejeʼe süküjüin tü Wiwüliakat nnojoluin kasain natüjaain aaʼu na ouktüshiikana (Génesis 2:17; 3:19; Ezequiel 18:4; Salmo 146:3, 4; Eclesiastés 9:5, 10). Tü alatakat shia naashajaain wanee meʼrujusai mojulaashi nükajee wanee ooʼulaküi namaa nüpüshi otta naʼaleewain chi ouktüshikai. Mayaapejeʼe ayatüin «nünüiki» chi ouktüshikai nutuma, nia wanee yolujaa aashajaaka.

Paapajüle wanee pütchi eeka müin aka saaʼin tia, nnojo puuʼulaain shimeejüin pia. Piyoukta tü sümakat otta püküja tü nümakat Jesús: «Puʼuna pümata toulia Satanás» (Mateo 4:10; Santiago 4:7). Nnojo nanainpünaain pia na yolujaakana sutuma piʼraajeein tü nakuwaʼipakat. Tia, sünainpünaasü aaʼinraa tü naaʼinrakat na outshiikana otta nüchiaain Jeowa na aʼwaajakana nia süpüla nnojoluin sünainpünaain naya. Saashin tü Wiwüliakat süsaleechi naainjala chi eekai ‹nuuʼulakülin›, ‹nüsakirüin outsü jee niale wanee ooʼulaküi atüjüshi maʼin ayaawataa tü alatajatkat otta eeka nüsakirüin na ouktüshiikana› (Deuteronomio 18:10-12, NM; Galacia 5:19-21; Alateetkat Mapeena 21:8).

Süka naluwataain na yolujaakana naaʼu na wayuukana sükajee tü naaʼinrakat na outshiikana, püchechera paaʼin suulia paainjüin tü naaʼinrakat jaʼitairü anashaatain maʼin shia pümüin. Süpüshi tü naaʼinrakat na outshiikana shia: ooʼulakaa süka maraaja koʼoyoosü, waraaja, ajapüü, yüi, süka iita asia kepein otta ayaawataa saaʼu jamaluʼuluin wanee lapü. Aainjüshii kasa pülasü na yolujaakana suluʼu tü piichi kaluʼukat naya.

Süka natüjaain saaʼu na yolujaakana kaainjaraliin na wayuukana, neʼitaain suluʼu karaloukta otta neeʼiyatüin suluʼu telewisoot akuwaʼipaa yarüttüsü. Natüjaa aaʼu na yolujaakana maka ayatüle suluʼu nekii na wayuukana naainjeerü shia mapa maʼaka naainjüin shia na yolujaakana (Génesis 6:1, 2; 1 Tesalónica 4:3-8; Judas 6).

Eeshii na asirajakana wanaa sümaa naapüin nayain aluwataain saaʼu tü mmakat na yolujaakana. Akatsaʼa tia, nnojotsü ponuinjatüin waaʼin süka sümüin tü Wiwüliakat: ‹Satanás nuuʼulaküin nakuaippa na aapiee chajeʼewaliikana eejee Maleiwa› (2 Corinto 11:14). Tü nimeejakat maʼin aka Satanás, shia nünoujirüin na wayuukana sünain nnojoluin eein nia otta na yolujaakana. Nnojo puuʼulaain nimeejüin pia. Ayata püʼleejüin Satanás otta na yolujaakana süka eein naya (1 Pedro 5:8, 9).

¡Alüʼütsü nükalia Satanás otta na nümaajanakana süpüla najaʼlajeʼennüin! Müsü tü Wiwüliakat: «Tü nakuaippakat na manoujainsaliikana, [Satanás otta na yolujaakana] yüüʼülaa meerü soʼuweena wane kaʼi. Aluʼujasa chi wayuu aaʼinrakai tü nuluwataakat anain Maleiwa, ayateechi nümaa süpüla kaʼikat süpüshua» (1 Juan 2:17). ¡Talateerü waaʼin najaʼttinnapa Satanás! Sutuma tia, naʼaka waya na aainjakana tü nuluwataakat anain Maleiwa otta kateetka woʼu sümaa talatüin waaʼin suluʼu tü mma jeketkat (Salmo 37:9-11, 29; 2 Pedro 3:13; Alateetkat Mapeena 21:3, 4).

Aluʼusaʼa waneejatüle tü eeʼiyatünakat, tü achuunajünakat suluʼujee tü Wiwüliakat suluʼujeejatü «Tü Nüchikimaajatkat Jesucristo». Tü suluʼujeejatkat Traducción del Nuevo Mundo de las Santas Escrituras (con referencias) ashajünüsü süka NM.

[Ayaakuaa suluʼuka süpana 4]

Naapeein Satanás nümüin Jesús tü suumainkalüirua wayuu süka nükoroloin shia