EKIRAJAAYA 8
Waaʼinmaja wachonnii suulia kasa mojusü
1-3. (1) ¿Jalejeekuwat tü kasa mojusü naaʼinmajakalü oulia nachonnii na wayuukana? (2) ¿Kasa naaʼinrajatka na wayuukana süpüla anain natuma saaʼinmajia nachonnii?
¿KASEERÜ saainjaka nii wanee jintüi nuʼunajachire sünain koleejia sümaa kaʼüliain maʼin tü juyakat? ¿Süjüteeiche nia sümaa nnojoluin kasain saʼatüin nünain? ¿Saʼateetche nünain wainma kuluulu iseetka nüchiki nuʼunüin sutuma? Nnojo. Saʼateerü nünain wanee kasa süpüla nnojolin chüʼlüin nia.
2 Müinjatia nakuwaʼipa na wayuukana, anainjatü natuma sukuwaʼipa tü naainjakat süpüla naaʼinmajüin nachonnii suulia tü kasa mojusü eekat sünainjee tü ashaittünakat, tü anajünakat, tü aapajünakat, tü ekirajünakat suluʼu koleejia otta tü eekat nanainjee naʼaleewainyuu. Eeshii na wayuu nnojoliikana aaʼinmajüin nachonnii, eeshii na aaʼinmajakana motsomüin otta eeshii na apülajakana wainma kasa noulia süka neʼrüin mojuin maʼin tü kasa aainjünakat. Sutuma tia, mojusü maʼin naaʼin nachonnii. ¿Eesü süpüla anain natuma na wayuukana sukuwaʼipa tü naainjakat?
3 Aa. Mojule shia, mojuleejeeria sukuwaʼipa nachonnii (Eclesiastés 7:16, 17). Sutuma tia, ¿kasa naaʼinrajatka süpüla anain natuma saaʼinmajia nachonnii? Jülüjüinjatü naaʼin apünüinsü kasa: tü ekirajünakat suluʼu koleejia, jaraliin na naʼaleewainkana otta kasain wayuu tü nashaittakat.
WEKIRAJA WACHONNII
4. ¿Jamüinjatü wamüin koleejiain wachonnii?
4 Kojutsü maʼin wamüin koleejiain wachonnii. Watüjaa aaʼu nekirajünüin süpüla ashajaa, aleejaa, anoukteʼeraa wanee kasa, ekirajawaa otta anainjatüin sukuwaʼipa nanüiki. Tü nekirajaakalü anain, sükaaliinjeena naya süpüla nalatüin süchikumüin tü kasa kapüleesü eekat maaʼulu. Anale maʼin nekirajia, aneerü maʼin natuma tü naʼyataainkat (Proverbios 22:29).
5, 6. ¿Jamüsü watüjaaka saaʼu saashajaanüin achiki amaʼüjirawaa akuwaʼipaa suluʼu koleejia?
5 Suluʼu tü koleejiakat, kottiraashii wachonnii namaa tepichi aashajaaka maʼin süchiki amaʼüjirawaa akuwaʼipaa otta süchiki akuwaʼipaa yarüttüsü. Suluʼu wanee koleejia chaa Nijeeria, eesü wanee majayülü maaʼinsat, ootowaika saʼaleewainyuu sünain amaʼüjirawaa akuwaʼipaa. Jülüjüsü maʼin naaʼin tü sümakat mayaapejeʼe suluʼujeejatüin shia wanee karaloukta kanainka shiyaakua wayuu amaʼüjiraasü sukuwaʼipa. Eeshii na aaʼinrakana tü sümakat. Ipuotka wanee saʼaleewain, ouktaka shia sutuma sujutirüin.
6 Aashajaashii süchiki amaʼüjirawaa akuwaʼipaa na koleejiakana otta na eʼiküliikana. Shapaasü naaʼin na wayuukana sutuma nnojolin nekirajünüin nachonnii sünain anainjatüin nakuwaʼipa otta laülaainjatüin naaʼin. Müsü wanee wayuu kachonka wanee jintut 12 suuyase: «Kepiashii waya naʼaka wayuu kanoulaka maʼin otta aaʼinmajaka nakuwaʼipa. Eitajünüsü preservativo suluʼu tü koleejiakat». Shapaasü saaʼin shii tü jintutkat otta chi süshikai sutuma naapüin nachiki na jimaʼaliikana namaʼüjiraweein nakuwaʼipa sümaa tü nachonkot. ¿Kasa naaʼinrajatka na wayuukana süpüla naaʼinmajüin nachonnii?
7. ¿Kasa waaʼinrajatka süpüla nnojoluin süküjünüin kasa mojusü namüin wachonnii süchiki tü kasa sünainpünaakalü aainjirawaa akuwaʼipaa?
7 ¿Mojusü wounjulajüle noulia wachonnii süchiki tü kasa sünainpünaakalü aainjirawaa akuwaʼipaa? Nnojo. Waashajaa namaa süchiki tia (Proverbios 5:1). Suluʼu waneeirua mma, wainma na nnojoliikana aashajaweein süchiki tia namaa nachonnii. Noʼutku na wayuu chakana África, eeshii naashajaale jee nnojorüle naashajaain namaa nachonnii. Müshi wanee wayuu kepiashi Sierra Leona: «Nnojotsü wakuwaʼipain waashajaain namaa wachonnii süchiki tü kasa sünainpünaakalü aainjirawaa akuwaʼipaa». Naashin noʼutku na wayuukana, amaʼüjiraajeena nakuwaʼipa nachonnii naashajaale namaa. ¿Jamüsü nünüiki Maleiwa süchiki tia?
TÜ NÜMAKAT MALEIWA
8, 9. ¿Jarat tü pütchi aküjünakat suluʼu tü Wiwüliakat sünainpünaaka aainjirawaa akuwaʼipaa?
8 Saashin tü Wiwüliakat, nnojotsü mojuin waashajaale süchiki tü sünainpünaakalü aainjirawaa akuwaʼipaa sümaa anain pütchi süchiki. Chaa Israel outkajaapuʼushii na anoujüshiikana otta «na tepichikana» süpüla naapajüin tü Pütchi aapünakat nümüin Moisés. (Deuteronomio 31:10-12, NM; Josué 8:35). Yala, aküjünüsü süchiki sükashia tü jietkat, nuwasain chi toolokoi, aʼluwajirawaa akuwaʼipaa, amaʼüjirawaa sümaa wayuu nnojotka aʼwayuuseein, nümaa wanee jaleetshi, sümaa apüshii otta mürüt (Levítico 15:16, 19; 18:6, 22, 23; Deuteronomio 22:22). Süchikijee naapajüin tia pütchikat, aashajaashi nashi jee nei namaa süchiki jamaluʼuluin shia.
9 Süpüshi tü pütchi suluʼukat Proverbios kapiitulo 5, 6 otta 7, aküjüsü süchiki tü kasa mojusü alatakat sutuma amaʼüjirawaa akuwaʼipaa. Shiiʼiyatüin tia eein süpüla anain maʼin shia soʼuluʼu wayuu (Proverbios 5:3; 6:24, 25; 7:14-21). Saashin tia pütchikat, mojusü shia, eesü kasa mojusü sünainjee otta shiiʼiyatüin tü naaʼinrajatkat na tepichikana süpüla nnojoluin namaʼüjiraain nakuwaʼipa (Proverbios 5:1-14, 21-23; 6:27-35; 7:22-27). Süküjüin anain tü aainjirawaakalü akuwaʼipaa kasaarüle wanee wayuu (Proverbios 5:15-20). Pütchikat tia, shikirajüin na wayuukana süpüla anainjatüin natuma nekirajia nachonnii.
10. ¿Jamüsü nnojoleetka namaʼüjiraain nakuwaʼipa wachonnii waashajaale namaa süchiki tü sünainpünaakalü aainjirawaa akuwaʼipaa?
10 ¿Amaʼüjiraajeena nakuwaʼipa wachonnii waashajaale namaa süchiki tia? Nnojo, müsü tü Wiwüliakat: «Taashishii na lotokana akuwaʼipa sutuma tü natüjaakalü aaʼu» (Proverbios 11:9, NM). Wakaaliinja wachonnii suulia tü kasa mojusükat. Müshi wanee wayuu: «Joʼuuiwaʼaya wachonnii waküjüin namüin mojuin amaʼüjirawaa akuwaʼipaa. Naashajaapa waneeinnua tepichi noʼupala, nnojotsü ponuin naaʼin, natüjaatüjülia aaʼu mojuin shia».
11. ¿Kasa naaʼinrajatka na wayuukana naashajaale namaa nachonnii süchiki tü nakorolokot?
11 Maʼaka wekirajaain suluʼu waneeirua ekirajaaya, aküjünajatü namüin na tepichikana joʼuuiwaʼaya naya kasaichin sünülia tü nakorolokot. Nnojoishii japülinjanain na wayuukana, pansaainjatü tü sünüliakat natuma. Mapa, naküjüinjatü namüin choʼujaain naaʼinrüinjatüin waneeirua kasa namüiwaʼa. Na aashajaainjanakana namaa na tepichikana süchiki tü nakorolokot niainjachi chi nashikai jee tü neikat. Naküjüinjatü namüin nnojoluinjatüin saapaanüin, shiʼnnüin otta mojuin pütchi süchiki. Najaʼapülaapa, aküjünajatü namüin kasain naainjüin wanee toolo sümaa wanee jierü süpüla kachoin naya. Jimaʼaliipa otta majayünnüüpa naya, natüjaajeerü aaʼu jamüin shiiʼiranajaaka natapaʼa. Maʼaka wekirajaaitpain suluʼu ekirajaaya 5, eeshii süpüla nnojoluin nataüjaanüin wekirajüle naya (Proverbios 2:10-14).
NAAʼINRAJATKA NA KACHONSHIIKANA
12. ¿Kasa alawaa ekirajünaka suluʼu koleejia?
12 Yapainjana na kachonshiikana süpüla eejiraain naya sümaa tü alawaa ekirajünakat suluʼu koleejia, shiiʼiranajaain sukuwaʼipa kasa, yaletüin atumaa wanee mma otta tü münakat nnojoluin jaralüin atüjaain saaʼu tü shiimainkat (1 Corinto 3:19; puʼwanaajireʼera sümaa Génesis 1:27; Levítico 26:1; Juan 4:24; 17:17). Wainma na shikiipüʼükana koleejia maka choʼujaain shikirajaain maʼin wayuu suluʼu eʼikülee miyoʼu. Tia, naneeküinjatü na wayuukana süka naaʼin namüiwaʼa. Eeshii eʼikülii aküjaka choʼujaain tia süpüla anain sukuwaʼipa wayuu (Salmo 146:3-6).a
13. ¿Kasa naaʼinrajatka na wayuukana süpüla eejiraain naya sümaa tü alawaa ekirajünakalü anain nachonnii suluʼu koleejia?
13 Süpüla eejiraain na wayuukana sümaa tü alawaa ekirajünakalü anain nachonnii, natüjaainjatü aaʼu kasain ekirajünüin anain naya. Süpüla tia, nekirajüinjana nepialuʼu otta neeʼiyatüinjatü nakaaliinjeein maʼin naya süpüla anain nakuwaʼipa. Naleʼejapa sünainjee koleejia, nasakirüinjana sünain tü nekirajaakalü anain, tü anakat otta tü kapüleekat namüin. Neʼrajaainjatü tü eʼitaanakat napüla, tü nashajakat otta jeʼrain nayuʼlüin sünain tü eʼitaanakat napüleerua. Weʼraaja na ekirajakana naya, waküja namüin kojutüin wamüin tü naʼyataainkat otta wakaaliinja naya eere süpüla waainjüin shia.
NAʼALEEWAINYUU WACHONNII
14. ¿Jamüsü anainjatka natuma na tepichikana naneekia naʼaleewainyuu?
14 «¿Jalajatü joo püshanalain türa?». ¡Wainma na wayuu makana sutuma neweetirüin pütchi mojuluʼulu nachonnii otta naaʼinrüin kasa nnojotpuʼuka naaʼinrüin! Nashanala tia nünainjee wanee koleejiajiraashi namaa jee niale wanee kepiashi naʼütpaʼa. Jaʼitainna tepichin jee miyoʼuyuuin waya, eesü süpüla anain jee mojuin wakuwaʼipa natuma waʼaleewainyuu. Müshi Pablo: «Nnojo jimeejiraain. Na wayuu nnojoliikana anain süpüla waʼaleewain mojusü wakuwaʼipa natuma» (1 Corinto 15:33, NM; Proverbios 13:20). Jooshii maʼin na tepichikana süpüla napüleeruaanüin aaʼin natuma naʼaleewainyuu. Eesü nnojorüle natüjaain saaʼu tü naaʼinrajatkat otta eesü naainjüle shia süpüla talatüin natuma naʼaleewainyuu. Sutuma tia, choʼujaasü anain natuma naneekia naʼaleewainyuu.
15. ¿Kasa naaʼinrajatka na wayuukana süpüla nakaaliinjüin nachonnii sünain aneekaa naʼaleewainyuu?
15 Eesü isale nachiki anain natuma süneekia naʼaleewainyuu; makalaka choʼujaain nakaaliinjünüin. Nnojoishii aneekünajanain namüin na naʼaleewainkana, ekirajünüinjana naya süpüla nayaawatüin saaʼu tü akuwaʼipaa anasü eekat nünain wanee wayuu anaka süpüla naʼaleewain. Tü akuwaʼipaa anasükat shia aire nüpüla Jeʼwaa otta naainjeere tü kasa anakat nümüin (Marcos 12:28-30). Ekirajünüinjana naya süpüla alin napüla otta kojutüin namüin na wayuu lotokana akuwaʼipa, na kamaneekana, na asülajüliikana otta na aʼyataaliikana maʼin. Soʼu tü Ai waʼwaajakalü oʼu Maleiwa, wayaawatira naya saaʼu tia akuwaʼipaakat sükajee nakuwaʼipa na aküjünakana achiki suluʼu tü Wiwüliakat. Mapa, waʼwanaajireʼera shia sümaa waneeirua nakuwaʼipa na wawalayuukana. Waaʼinrajatü tü wamakat namüin waneekapa waʼaleewainyuu.
16. ¿Kasa waaʼinrajatka süpüla jülüjüin waaʼin naneekia naʼaleewainyuu wachonnii?
16 Weʼraaja naʼaleewainyuu wachonnii. Wama namüin nantirai naya wepialuʼumüin. Wasakira naya jamüin pütchi nachiki. ¿Anasüche nakuwaʼipa, piamataapa nakuwaʼipa? Piamale shia, wayaawatira naya süpüla natüjaain saaʼu mojeerüin nakuwaʼipa natuma (Salmo 26:4, 5, 9-12). Suʼwanajaale nakuwaʼipa wachonnii, naʼanaaya, nanüikipala, waashajaa namaa nachiki na naʼaleewainkana. Eesü naainjüle tia sutuma aleewajiraain naya namaa na wayuu nnojoliikana anain akuwaʼipa (puʼwanaajireʼera sümaa Génesis 34:1, 2).
17, 18. ¿Kasa wakaaliinjüinjanaka anain wachonnii?
17 Waashajaa namaa wachonnii süpüla nnojoliinjanain naneeküin na wayuu mojukana süpüla naʼaleewain otta wakaaliinja naya sünain aneekaa na anakana süpüla naʼaleewain. Müshi wanee wayuu: «Wachajaain waneepia sukuwaʼipa süpüla naneeküin wachonnii na anakana süpüla naʼaleewain. Wanaa sümaa nüneekünüin chi wachonkai süpüla nüshaittüin woola namaa na koleejiakana, müshii waya nümüin eein süpüla mojuin nukuwaʼipa natuma. Waküjüin nümüin wamaainjachin nia sünain ashaittaa woola namaa na wawalayuu jimaʼaliikana. Sutuma tia, anaka sukuwaʼipa tü waainjakat».
18 Na wayuu kekiikana maʼin nakaaliinjüin nachonnii süpüla naneeküin na anakana süpüla naʼaleewain otta tü anakat süpüla nashaittüin namaa. Eeshii na kapüleekana amüin naneeküin tü kasa anakat süpüla nashaittüin namaa nachonnii.
NASHAITTAJATKA WACHONNII
19. Piʼitaa wanee shiyaawase eeʼiyataka nnojoluin mojuin ashaittajawaa.
19 ¿Süküjüinche tü Wiwüliakat mojuin ashaittaa? Nnojo. Müsü shia: «Eesü kaʼi süpüla asirajaa [...] otta kaʼi süpüla wonnataa» (Eclesiastés 3:4, NM).b Chaa Israel anapuʼusü namüin na anoujüshiikana natalejüin, neeʼirajüin, nayonnojüin, nemiʼijaain otta nashantanajaain. Müshia Jesuu oʼunüshi nia sünainmüin wanee miʼiraa shikiira kaʼwayuusee otta ‹sünainmüin wanee ekawaa nutuma Mateo Leví› (Lucas 5:29; Juan 2:1, 2). Nnojoishi matüjüin Jesuu sünainpünawaa miʼiraa. Sutuma tia, nnojotsü mojuinjatüin wamüin asirajaa otta ashaittaa.
Anale süneekia tü waaʼinrakat napüleerua wachonnii, atüjeena jee kooʼomüinjeerü nanoula
20. ¿Kasa jülüjüinjatka naaʼin na wayuukana naneekajatpa tü nashaittajatkat nachonnii?
20 Jeʼwaa nia «chi Maleiwa talatakai aaʼin» (1 Timoteo 1:11, NM). Makalaka talatüinjatüin waaʼin sutuma waʼwaajüin nia, nnojotsü mojuinjatüin waaʼin (puʼwanaajireʼera sümaa Deuteronomio 16:15). Sükajee katchin maʼin na tepichikana, eeshii süpüla nashaittüin maʼin otta naainjüin kasa talataka atuma naaʼin. Anale süneekia tü nashaittakat, talateerü naaʼin, atüjeena otta laülaajeerü naaʼin. Naapüinjatü chi wayuukai tü kasa choʼujaakat sümüin nüpüshi otta nüneeküinjatü tü nashaittajatkat. Akatsaʼa nnojoluinjatüin palajanain shia natuma.
21. ¿Kasa eeka sutuma tü kasa ashaittünakat maaʼulu?
21 Saashin tü Wiwüliakat, «sülüʼütpa sükalia sajaʼttüinjatüin tü kasakat süpüshuaʼa», ‹wainmeena na wayuu ashaitteekana waneepia saaʼu maaliin Maleiwa napüla› (2 Timoteo 3:1-5). Palajanasü natuma tü ashaittaakat. Sutuma wainmain maʼin tü kasa ashaittünakat otta tü anajünakat, nnojotsü jülüjüin naaʼin tü kasa choʼujaakat maʼin namüin. Süpüshi tü kasa anajünakat maaʼulu, shikirajüin wayuu sünain amaʼüjirawaa akuwaʼipaa, atkawaa, akaijaa otta waneeirua kasa mojuka maʼin (Proverbios 3:31). ¿Kasa waaʼinrajatka süpüla waaʼinmajüin wachonnii suulia tia?
22. ¿Kasa naaʼinrajatka na wayuukana süpüla anain natuma nachonnii süneekia tü nashaittajatkat otta tü naapajüinjatkat?
22 Aneekünajatü tü naaʼinrajatkat na tepichikana otta tü apülajünajatkat noulia. Ekirajünüinjana naya süpüla nayaawatüin saaʼu tü nnojoluinjatkat nashaittüin, naapajüin otta süpüla nayaawatüin saaʼu jeʼrain kaʼi nalatiraka sünain. Akatalüinjana kaʼi nashi jee nei otta aʼyataainjana maʼin süchiirua nekirajüin naya. Eeshi wanee wayuu piamashii nüchonnii. Niyaawatüin naaʼu chi epayaakai naapajüin waneepia muusika suluʼu wanee misoora jeketü. Soʼu wanee kaʼi, wopuluʼupa nia sünainmüin niʼyataain, naapajaka tü muusika naapajawaikat chi nüchonkai. Nüshaʼwaleʼerüin neʼejena kojuyatua süpüla nüshajüin süpüshi tü eeʼirajünakalü achiki. Mapa, naashajaaka namaa süchiki tia. Müshi nia palajana namüin: «¿Jamüsü saaʼin jümüin?». Naapajaka tü namakat sümaa nnojoluin süshapataain naaʼin. Süchikijee naashajaain namaa süka tü Wiwüliakat, müshii na tepichikana nnojoliinjanain naapajüin muusika suluʼu tia misoorakat.
23. ¿Kasa naaʼinrajatka na wayuukana süpüla naaʼinmajüin nachonnii suulia tü kasa mojusü aapajünakat otta anajünaka?
23 Na wayuu kekiikana maʼin, jülüjüsü naaʼin tü muusika naapajakat nachonnii, tü kasa nanajakat suluʼu telewisoot, tü aküjalaa naashajeʼerakat, tü nashaittakat suluʼu computador otta tü peliikula kamalainkat namüin. Naapajüin sümaa nanajüin süpüshi, jülüjüsü naaʼin tü aküjünakat sünain tü sütakat, jamüin pütchi süchiki otta kasain eeʼirajünüin achiki. Wainma na ayaawatakana saaʼu mojuin maʼin tü nanajakat otta tü naapajakat nachonnii. Na aaʼinmajeekana nachonnii suulia kasa yarüttüsü, aashajaashii naya namaa süpüla naküjüin namüin mojuin tia. Naainjüin shia süka tü Wiwüliakat, tü karaloukta ayuʼnnakat sünainjee maʼaka saaʼin Lo que los jóvenes preguntan. Respuestas prácticas otta tü ashajünakat suluʼu La Atalaya otta ¡Despertad!c Neʼitaale na wayuukana napüleerua nachonnii tü nnojoluinjatkat naaʼinrüin otta lotule nachiajaaya natuma, aneerü nakuwaʼipa (Mateo 5:37; Filipos 4:5).
24, 25. ¿Kasa eeka süpüla naaʼinrüin na wayuukana süpüla nashaittüin namaa nachonnii?
24 Süpüshi tü eejiraakalü amaa na wayuukana shia napülajüin noulia nachonnii nashaittüin jee nanajüin kasa mojusü. Nachajaainjatü napüleerua tü kasa anasü nashaittajatkat, nnojorüle müin shia natuma amojujaajeerü nakuwaʼipa nachonnii. Wainma anoujüshii talataka aaʼin sutuma jülüjüin naaʼin tü kasa naainjapuʼukat sümaa napüshi, maʼaka saaʼin, ashuunajaa, ashaittaa, awaraijawaa eemüin napüshi jee naʼaleewainyuu otta ashaittaa woola. Wainma na anakana amüin aleejaa sümaa emetuluin nanüiki otta eeshii na aküjakana süchiki tü alatakat namüin jee tü emejakat naaʼin. Eeshii na ekirajakana sünain tü natüjakalü apüleerua, maʼaka saaʼin akumajaa kasa süka taapüla, atalejaa, akanoʼujaa otta ekirajawaa sünain tü kasa nukumajakat Maleiwa. Nekirajünüle na tepichikana sünain tia, saaʼinmajeena naya suulia tü kasa yarüttüsü ashaittünakat, tü anajünakat otta natüjaajeerü aaʼu analeein maʼin naainjüin wanee kasa suulialeʼeya joyotuin neʼe naya sünain anajaa.
25 Talatsü naaʼin wachonnii jutkatiraale naya sünain ekawaa namaa na wawalayuukana. Eere wanee wayuu jülüjaka aaʼin tia ekawaakat, palitchonle wayuu antaka sünain, nnojorüle kamaʼain maʼin shia, talateerü naaʼin otta aijiraajeena naya namaa na wawalayuukana (puʼwanaajireʼera sümaa Lucas 14:13, 14; Judas 12).
WAYOUKTA TÜ KASA MOJUSÜ AAʼINNAKAT
26. ¿Kasa choʼujaaka wamüin süpüla waaʼinmajüin wachonnii suulia tü kasa mojusükat?
26 Aʼyataainjana maʼin waya süchiirua waaʼinmajüin wachonnii suulia tü kasa mojusü aaʼinnakat. Süpüla wountüin tia, choʼujaasü wamüin aijiraain waya. Müle shia watuma, aneerü naaʼin wachonnii otta aashajaweena naya wamaa süpüla waaʼinmajüin naya. Choʼujaasü maʼin alinjachin wapüla Jeʼwaa. Müle shia watuma, eesü süpüla nnojoluin naaʼinrüin wachonnii tü kasa mojusü aaʼinnakat. Na wayuu aikana apüla Jeʼwaa süka süpüshuaʼa naaʼin, nashateerü tü nukuwaʼipakat: aipüralin nia, nnojolin ichein nia süchiirua tü nümakat otta anain nutuma sukuwaʼipa tü naainjakat (Éfeso 5:1; Santiago 3:17). Müle shia natuma, nnojoleerü jülüjüin naaʼin na tepichikana süpülajüin tü anoujaakat wainma kasa noulia, nnojoliin nemiʼijaain sutuma otta nojuʼiteein suulia anoujaa. Nayaawateerü aaʼu talatüin otta anain maʼin naaʼin wanee wayuu sutuma tü anoujaakat.
27. ¿Kasa naaʼinrajatka na wayuukana süpüla nayouktüin tü kasa mojusü aaʼinnakat?
27 Talatshi Jeʼwaa natuma na kottiraakana sünain aʼyatawaa nümüin sümaa talatüin naaʼin, anaka atuma sukuwaʼipa tü naainjakat otta aʼyataaka süchiirua ‹wulein jee lotuin nakuwaʼipa› suulia tü kasa mojusü aaʼinnakat (2 Pedro 3:14, Proverbios 27:11). Nashatüin nukuwaʼipa Jesuu, chi ayouktakai süpüshuaʼa tü naainjakat Satanaa süpüla numojujeʼerüin nukuwaʼipa. Müshi nia: ‹Tayamülüichipa chi aluwataashikai naaʼu na manoujainsaliikana› (Juan 16:33). ¡Kasataalejeseʼe katüin noʼu waneepia wapüshi otta nayouktüin tü kasa mojusü aaʼinnakat!
a Pütüjeere sooʼomüin, püleeja Los testigos de Jehová y la educación, süpana 4-7, nashajala na Aküjüliikana pütchi nüchiki Jeʼwaa.
b Tü pütchi hebreo alatinnakat süka «asirajaa», eesü süpüla sülatinnüin süka «ashaittaa», «eewaa atuma miʼiraa jee ekawaa».
c Nashajala na Aküjüliikana pütchi nüchiki Jeʼwaa.