Naaʼinrajatka na ooʼulaajiraweekana

1, 2. ¿Jarat tü pütchi jülüjüinjatkat waaʼin mojule wakuwaʼipa sümaa waʼwayuuse?

EESÜ wanee wayuu Lucia sünülia.a Polooirü shia juya sünain kasaalüü, mojusü maʼin saaʼin süka suuʼulaainjatüin nuulia suʼwayuuse. Isasü süchiki anajiraain shia nümaa mayaainjeʼe wainmain tü kasa saaʼinrakat. Akatalaasü shia nuulia süka naatain tü sukuwaʼipakat sümaa sütüjaain aaʼu shipijüinjanain piamashii süchonnii. «Nnojoluyaasü kepin tü wakuwaʼipakat taaʼinruʼu», sümakalaka Lucia mapa.

² Wayaawata aaʼu tü alatakat sümüin Lucia müle wakuwaʼipa. Eesüjaʼa süpüla jülüjüin waaʼin eere süpüla sunouktaain wakuwaʼipa sümaa waʼwayuuse. Anasü jülüjüle waaʼin pütchikat tüü: ¿Taaʼinrüinche tü nümakat Maleiwa suluʼu tü Wiwüliakat süpüla anainjatüin takuwaʼipa sümaa taʼwayuuse? (Salmo 119:105.)

3. ¿Jamüsü naaʼin na wayuu ooʼulaajiraakana suulia naʼwayuuse otta jamüsü naaʼin na napüshikana?

³ Mojule nukuwaʼipa wanee wayuu sümaa nuʼwayuuse, anasü saaʼin namüin nooʼulaajiraale. Suluʼu wainma mma, awainmalaashii maʼin na wayuu ooʼulaajiraakana. Wainma maʼin na mojukana aaʼin sutuma nooʼulaajiraain. Kakaliasü mojuin naaʼin nachonnii, jooshii naya süpüla ayuulii noulia na nnojoliikana ooʼulaajiraain. Otta mojusü maʼin naaʼin nashi jee nei otta naʼaleewainyuu. ¿Anasüche nümüin Maleiwa nooʼulaajiraale na wayuukana?

4. ¿Kasa naaʼinrajatka na wayuukana süpüla nnojoliin nooʼulaajiraain?

⁴ Wekirajaa anainrü suluʼu waneeirua ekirajaaya waneepiainjachin chi wayuukai sümaa nuʼwayuuse naashin Maleiwa (Génesis 2:24). ¿Jamakaʼa nooʼulaajiraaka na wayuukana? Eesüjaʼa tü kasa alatakat namüin palajana. Eeshii nooʼulaajiraale sutuma wanee kasa eeka nnojoluin kasajatüin namüin paala. Nanoukteʼeramaatüle shia süka tü sümakat tü Wiwüliakat, eeshiijaʼa süpüla nnojoliin nooʼulaajiraain.

JÜLÜJA WAAʼIN KASA EEKAI SHIIMAIN

5. ¿Kasa nnojoluinjatka jülüjüin naaʼin na kaʼwayuuseshiikana?

⁵ Wanee kasa nooʼulaajiraaka atuma na wayuukana shia jülüjüle naaʼin wanee kasa nnojotka shiimain maʼaka saaʼin nakuwaʼipa na ojuʼitakana suluʼu telewisoot, peliikula otta karalouktairua. Eesü süpüla mojuin naaʼin, jashichin naya otta müin nemeejünakai aaʼin neʼrapa nnojoluin müin nakuwaʼipa. ¿Kasaka naaʼinrajatüin na wayuukana süpüla anain nakuwaʼipa sümaa naʼwayuuse? Aʼyataainjana süchiirua nanoukteʼerüin nakuwaʼipa.

6. (1) ¿Kasa süküjaka tü Wiwüliakat süchiki tü kaʼwayuuseekat? (2) ¿Kasa mojujiraaka aaʼujee na wayuukana?

⁶ Süküjüin tü Wiwüliakat anain naaʼin na wayuukana kaʼwayuusere naya, akatsaʼa süküjaleein ‹kooʼomüinjeerüin namüin tü müliaa› neʼreetkat (1 Corinto 7:28). Naainjeein maʼin tü kasa mojusükat sutuma nnojoluin lotuin maʼin nakuwaʼipa. Naatawaisü tü jülüjakat naaʼin, tü keeʼireekat naaʼin otta tü nepijiakat namaiwa. Eeshii mojujiraale naya saaʼujee nneerü, nachonnii, napüshi, nnojoluin nainkaain otta nnojoluin nakatalüin kaʼi süpüla kottiraain naya.b Kakaliasü tia süpüla sunoukteʼennüin, akatsaʼa eein süpüla sunouktaain mapa. Wainma na wayuu anoukteʼerakana tia wamaa sümaa sülatüin namüin.

WANOUKTEʼERA TÜ ALATAKAT WAMÜIN

7, 8. ¿Kasa naaʼinrajatka na wayuukana saashin tü Wiwüliakat mojujiraale naya sümaa naʼwayuuse?

⁷ Eeshii eeka kapüleein namüin nachecherüin naaʼin naashajaapa süchiki tü mojukalü atuma naaʼin, tü mojujiraakalü atuma naya otta tü kasa nnojotkalü anain natuma. Nnojoishii müin naya: «Nnojotsüleʼe piyaawatüin saaʼu tü alatakat tamüin», jashichishii neʼe naya otta kooʼomüinsü natuma tü alatakat namüin. Eeshii namüle: «Pia aneeka akuwaʼipa pümüiwaʼa», «maaliinsai taya püpüla». Eeshii masouktüinre naya süpüla nnojoliinjanain naaʼayajiraain.

⁸ Anasü naaʼinrüle pütchikat tüü: «Juuʼulaa suulia jashiee süpülapünaa atunkaa suulia kaainjalajüin jia suluʼujee» (Éfeso 4:26, 27). Asakinnüshi wanee wayuu kasain naaʼinrüin süpüla anain nukuwaʼipa sümaa nuʼwayuuse süchikijee nekeraajüin aipirua shikii juya sünain kasaalüü. Müshi nia: «Wanoukteʼeramaatüin tü mojujiraakalü atuma waya, jaʼitairü nnojoluin mojuin maʼin shia. Waaʼinrüin tia süpülapünaa weisalaain».

9. (1) ¿Kasa nnojoluinjatka naaʼinrüin na kaʼwayuuseshiikana nnojorüle paaʼinwain naya sünain wanee kasa? (2) ¿Kasa naküjüinjatka piamaleʼeya na kaʼwayuuseshiikana?

⁹ Nnojorüle paaʼinwain naya sünain wanee kasa, jülüjüinjatü naaʼin tü nanüikikat, nnojoliinjana asouktüin pejeewa otta nnojoliinjana jashichijaain (Santiago 1:19). Müle shia natuma, eesü süpüla naküjüin piamaleʼeya nnojoluin naaʼinjeein tü alatakat namüin (Santiago 5:16). Nnojoluinjatü yaletüin naaʼin otta yalayalainjatü naaʼin süpüla namüin: «Nnojotsü taaʼinjeein tia pümüin». Naaʼinrüle tia piamaleʼeya, nanoukteʼereerü tü alatakat namüin, aijiraajeena otta paaʼinweena naya sümaa naʼwayuuse.

NNOJO JIYOUKTÜIN AINKAWAA

10. ¿Jamüsü nünüiki Pablo namüin na chajanakana Corinto, anaka süpüla waaʼinrüin maaʼulu?

¹⁰ Nüküjüin Pablo namüin na nuwalayuu chajanakana Corinto anain kaʼwayuusere naya suulia ‹naʼluwajiraain nakuwaʼipa› (1 Corinto 7:2). Mojuleesia maʼin sukuwaʼipa wayuu maaʼulu suulia sukuwaʼipa tü chajatkat Corinto. Tü kasa yarüttüsü naashajaakalü achiki na wayuukana maaʼulu, tü sukuwaʼipakat naʼanaaya, tü ojuʼitakat suluʼu telewisoot, peliikula otta karalouktairua süpülajatü keeʼireeinjatüin naaʼin na wayuukana naainjiraain nakuwaʼipa. Nüküjüin Pablo müin nakuwaʼipa na wayuu kepiakana Corinto, müshijeseʼe müin nia namüin na nuwalayuukana: «Anashii müleka kaʼwayuusere jia suulia müliajüin jaaʼin sütüma» (1 Corinto 7:9).

11, 12. (1) ¿Kasa nnojoluinjatka niyouktüin chi wayuukai otta tü nuʼwayuusekat? ¿Jarat tü pütchi jülüjüinjatkat naaʼin? (2) ¿Kasa naaʼinrajatka chi wayuukai otta tü nuʼwayuusekat nnojoliire nainkaainjanain?

¹¹ Shiajaʼa sümaka tü Wiwüliakat namüin na kaʼwayuuseshiikana: «Chi aʼwayuuseekai, anakaja müleka nnojoire niyouktüin ainkawaa sümaa tü nuʼwayuusekat, jaʼitakaje tü jietkat nümaa chi suʼwayuusekai» (1 Corinto 7:3, 4). Nnojoishii aʼalijiraainjanain suulia naʼwayuuse na wayuukana saashin tü Wiwüliakat. Talateerü naaʼin piamaleʼeya kapürale naaʼin tü nakuwaʼipakat. Saashin tü Wiwüliakat, kojutüinjatü nümüin nuʼwayuuse chi wayuukai wanaapünaa sümaa tü nümakat Maleiwa (1 Pedro 3:7, NM). Naaʼinrajatü tia sünainpünaapa nia nuʼwayuuse. Mojutüle nümüin nuʼwayuuse wanee wayuu wanaa sümaa nüinkaain sümaa, eesü süpüla mojuin naaʼin piamaleʼeya.

¹² Eejeerü kaʼi nnojoleetka nüinkaain oʼu wanee wayuu sümaa nuʼwayuuse. Shia mapüsale jee kakashiale tü jietkat (puʼwanaajireʼera sümaa Levítico 18:19). Müsia mojule nukuwaʼipa chi toolokoi niʼyataaleruʼu otta mapüsale nia. Aashajaainjana otta paaʼinwainjana naya nnojorüle nainkaainjanain (1 Corinto 7:5). Müle shia natuma, nnojoleerü eein mojuluʼulu nekiiruʼu. Saʼalijiraale tü jietkat nuulia suʼwayuuse jee shiale sutuma mojutüin shia nümüin, eeshii süpüla kaainjalain naya sünainjee. Tüü, mojujiraasü wayuu sutuma.

13. ¿Kasa naaʼinrajatka na anoujüshiikana süpüla anainjatüin tü jülüjakat naaʼin?

¹³ Nayouktajatü na anoujüshii kaʼwayuusekana nanajüin shiyaakua wayuu masheʼinsat süka eein süpüla naainjüin kasa yarüttüsü sutuma (Colosas 3:5, NM). Eeinjatü naaʼin sünain tü naaʼinrakat otta tü jülüjakat naaʼin naashajaale sümaa wayuu nnojotka naʼwayuusein. Müshi Jesuu: «Chi eekai niirakaain sümüin wane jierü sümaa keeʼireein naaʼin amaʼüjirawaa sümaa, shiimüin sünain kaainjalain nia wanaa nümaa eekai nümaʼüjaain sümaa wayuu nnojotkat nuʼwayuusein» (Mateo 5:28). Naaʼinrüle tü nümakat Jesuu, nnojoleena kaainjalain otta amaʼüjiraain nakuwaʼipa sümaa wayuu nnojotka naʼwayuusein. Aneerü naaʼin piamaleʼeya süka anain noʼuluʼu Jeʼwaa nüinkaain chi wayuukai sümaa nuʼwayuuse (Proverbios 5:15-19).

SUUʼULAAJIRAAKA ATUMA WAYUU

14. ¿Kasa alataka namüin waneeinnua wayuu sümaa naʼwayuuse? ¿Jamüsü sülataka namüin tia?

¹⁴ Eeshii anoujüshii anoukteʼeraka tü alatakat namüin sümaa naʼwayuuse. Akatsaʼa eein na isakana achiki nanoukteʼerüin shia. Eeshii na ooʼulaajiraakana sutuma nnojoluin lotuin nakuwaʼipa otta nanainpünaain naya na wayuu nuluwataakana aaʼu Satanaa (1 Juan 5:19). ¿Kasa naaʼinrajatka na anoujüshiikana sülatüle namüin tia?

15. (1) ¿Kasa nuuʼulaajiraainjatka atuma wanee wayuu saashin tü Wiwüliakat? (2) ¿Jamüshii eeka na nnojoliikana ooʼulaajiraain mayaapejeʼe sümaʼüjiraain naʼwayuuse?

¹⁵ Aküjünüsü suluʼu ekirajaaya 2 eein süpüla nuuʼulaajiraain wanee wayuu suulia nuʼwayuuse otta kasaalüin nia nüchikuaʼa müleka namaʼüjiraale nakuwaʼipac (Mateo 19:9). Kapüleesü wamüin waneeküin tü waaʼinrajatkat watüjaale saaʼu kawalaʼatain waya sutuma waʼwayuuse. Müle shia, ¿ayateenache waya sümaa jee wooʼulaataajeetpa shia? Nnojotsü aküjünüin wamüin tü waaʼinrajatkat. Eeshii anoujüshii ayataka sümaa naʼwayuuse süka suuʼulaain suulia tü saainjalakat, anasü tü nakuwaʼipakat mapa. Eeshii na nnojoliikana ooʼulaajiraain nayaaluʼu nachonnii.

16. (1) ¿Kasa jülüjüinjatka naaʼin na wayuukana süpülapünaa nooʼulaajiraain? (2) ¿Jamüsü nnojoluinjatka jaralüin mojuin anüiki ayateere wanee wayuu nümaa suʼwayuuse jee suuʼulaweere nuulia?

¹⁶ Eesüjaʼa süpüla ipuoluin wanee wayuu otta ayuulin shia sünainjee sümaʼüjiraain sukuwaʼipa. Jee nayain aaʼinmajünüin na tepichikana suulia nataüjaanüin nutuma nashi eekai mojulaain. Wainma tü kasa jülüjüinjatkat naaʼin na wayuukana süpülapünaa naneeküin tü naaʼinrajatkat. Süinkaale wanee wayuu nümaa suʼwayuuse süchikijee sütüjaain saaʼu kawalaʼatain shia nutuma, shiiʼiyatüin motuin saaʼin tü naainjalakat otta ayateein shia nümaa. Saainjüle tia, nnojoluitpa süpüla suuʼulaain nuulia. Nnojotsü jaralüinjatüin asouktüin otta mojuin anüiki sünain tü süneeküinjatkat. Süchecherüinjatü saaʼin süpüleerua tü alatajatkat sümüin sutuma tü süneekakat. Müsü tü Wiwüliakat: «Jütüjaa saaʼu wasouktinneenain waneʼewai wakua nuʼupala Maleiwa [...] saaʼu süpüshua tü waaʼinrakat» (Galacia 6:5).

SÜKATALAAINJATKA ATUMA WAYUU

17. ¿Jamüsü sünüiki tü Wiwüliakat sümüin tü wayuu akatalaakat jee ooʼulaaka nuulia suʼwayuuse sümaa nnojolin nümaʼüjiraain nukuwaʼipa?

¹⁷ ¿Eesüche süpüla sükatalaain wanee wayuu jee suuʼulaain nuulia nuʼwayuuse sümaa nnojolin nümaʼüjiraain nukuwaʼipa? Aa, akatsaʼa nnojoluin süpüla kasaalüin shia süchikuaʼa (Mateo 5:32). Eesü süpüla sükatalaain saashin tü Wiwüliakat, saainjüle tia ‹ayatüinjatü shia sünain maʼwayuusee› jee ‹shiiteʼerüle nia nüchikua› (1 Corinto 7:11). ¿Kasa sükatalaaka atuma wanee wayuu nuulia suʼwayuuse?

18, 19. ¿Kasa sükatalaainjatka jee suuʼulaainjatka atuma wanee wayuu nuulia suʼwayuuse mayaapejeʼe nnojoluinjatüin kasaalüin shia süchikuaʼa?

¹⁸ Eesü müliale maʼin saaʼin wanee wayuu shokurale suʼwayuuse jee nnojorüle anain tü nukuwaʼipakat.d Müsia nüshaittüle süka tü nneetkat, nüsüire jee nükaijüire. Müsü tü Wiwüliakat: «Wane anoujashi, müleka nnojorule naaʼinmajüin na nüpüshikana, na kepiakana nümaa [...]. Mojuleesia maʼi tü naaʼinrakat nuulia wane manoulasai» (1 Timoteo 5:8). Nnojorüle niiʼirateein nukuwaʼipa wanee wayuu jee naapaale sünneetse tü nuʼwayuusekat süpüla niyaʼlajüin asüüshi, eesü süpüla sükatalaain nuulia laülaapialuʼujee süpüla saaʼinmajüin süchonnii otta suulia jamajüin shia.

¹⁹ Eesü süpüla sükatalaain wanee wayuu nuulia suʼwayuuse laülaapialuʼujee ayuuire shia sutuma niʼyaajüin jee nuʼuteere saaʼin. Nüpüleeruale saaʼin süpüla saainjüin wanee kasa mojuka nümüin Maleiwa, eesüjaʼa süpüla sükatalaain nuulia süpüla nnojoluin seemiajaain sunoula. Na alatakana amüin tia, eeshii süpüla nakatalaain laülaapialuʼujee süpüla ‹niainjachin noonooka amaa anüikü Maleiwakai suulialeʼeya sünüikü wayuu› (Aluwataaushikana 5:29).

20. (1) ¿Kasa naaʼinrajatka jee nnojoluinjatka naaʼinrüin na laülaashiikana jee na laülaakana aaʼin sünain anoujaa suuʼulaajiraale wanee wayuu? (2) ¿Kasa nnojoluinjatka saaʼinrüin wanee wayuu sükatalaweere jee suuʼulaajiraweere?

²⁰ Jaʼitairü müliain maʼin saaʼin wanee wayuu nutuma suʼwayuuse, nnojotsü jaralüinjatüin apüleeruain saaʼin süpüla sükatalaainjatüin nuulia jee ayatüinjatüle shia nümaa. Eesü süpüla nakaaliinjüin shia na laülaashiikana jee na laülaakana aaʼin sünain anoujaa otta naküjüin sümüin tü pütchi sümakat tü Wiwüliakat mayaainjeʼe nnojoluin natüjaain saaʼu süpüshuaʼa tü alatakat sümüin. Nia neʼe Jeʼwaa atüjaaka saaʼu tia. Suchuntayaale wanee kasa süpüla suuʼulaajiraain, mojutsat sümüin tü kaʼwayuuseekat. Nnojotsü jaralüinjatüin mojuin anüiki süchiki sükatalaale nuulia suʼwayuuse ayatüle müliain maʼin shia. Müshia nuuʼulaale chi toolokoi suulia nuʼwayuuse, nnojotsü jaralüinjatüin mojuin anüiki nüchiki. Süküjüin tü Wiwüliakat washaʼwaleʼenneenain nümülatuʼu Maleiwa süpüla wasouktüin nümüin saaʼu tü waaʼinrakat (Roma 14:10).

NNOJOTKA NOOʼULAAJIRAAIN ATUMA

21. ¿Jamüsü watüjaaka saaʼu nnojoluin suuʼulaajiraain wayuu sutuma tü sümakat tü Wiwüliakat?

²¹ Sülatapa apünüin kashi süchikijee sükatalaain Lucia nuulia suʼwayuuse, oʼttüsü shia sünain ekirajawaa sünain tü Wiwüliakat namaa na aküjüliikana pütchi nüchiki Jeʼwaa. Müsü shia: «Sükaaliinjüin taya tü sümakat tü Wiwüliakat süpüla tanoukteʼerüin takuwaʼipa nümaa taʼwayuuse. Waneepa semaana taya sünain ekirajawaa, aleʼejeesü taya tachikuaʼa nümaa. Tatüjaaitpa aaʼu niain Jeʼwaa anoukteʼeraka wakuwaʼipa nümaa waʼwayuuse otta ekirajaka waya süpüla kojutüjiraain waya. Alawaa neʼe tü münakat nachiki na aküjüliikana pütchi sünain suuʼulaajiraain wayuu natuma. Nakaaliinjüin taya süpüla nnojoluin tooʼulaain nuulia taʼwayuuse». Nnojotsü ooʼulaain Lucia sutuma shiʼitaain suluʼu sukuwaʼipa tü sümakat tü Wiwüliakat.

22. ¿Jarat tü pütchi neʼitaainjatkat suluʼu nakuwaʼipa na kaʼwayuuseshiikana?

²² Nnojotsü shiain Lucia alataka amüin tia. Talatüinjatü waaʼin sünain kaʼwayuusee, nnojotsü akulajaainjatüin waaʼin. Naapüin wamüin Jeʼwaa tü Wiwüliakat süpüla talatüinjatüin waaʼin sümaa waʼwayuuse. Eeshii süpüla kekiin maʼin waya sutuma tü sümakat (Salmo 19:7-11). Wainma na wayuu anajiraakana sümaa naʼwayuuse otta na anoukteʼerakana nakuwaʼipa sutuma tia pütchikat. Anasü maʼin neʼitaale suluʼu nakuwaʼipa na kaʼwayuuseshiikana tü pütchi nümakat Jeʼwaa. ¡Aneerü nakuwaʼipa sutuma!