Ekirajaaya 14
Nakuwaʼipa na aküjüliikana pütchi nüchiki Jeowa
¿Joujana oʼttuin nachikuaʼa sünain outkajawaa na aküjüliikana pütchi nüchiki Jeowa? (1)
¿Jamüsü sukuwaʼipa noutkajaaya na aküjüliikana pütchi nüchiki Jeowa? (2)
¿Jamüsü süpüla suwalaajünüin tü kasa choʼujaakat suluʼu tü outkajaaleekat? (3)
¿Jaralii na ekirajakana suluʼu tü outkajaaleekat? (4)
¿Jetsü tü wanee outkajawaa aainjünakat juyawai? (5)
¿Kasa aainjünaka eejeere sukumajünüin sukuwaʼipa naʼyataain na aküjüliikana pütchi nüchiki Jeowa? (6)
1. Süchikijee tü juyakat 1870 na aküjüliikana pütchi nüchiki Jeowa oʼttushii nachikuaʼa sünain outkajawaa. Nanülia namaiwa Ekirajaalii sünain tü Wiwüliakat akatsaʼa tü nanüliakat aküjüliikana pütchi nüchiki Jeowa ayuʼluushi suluʼujee tü Wiwüliakat soʼu tü juyakat 1931 (Isaías 43:10). Süchikijee palitchoin naya watta maʼin naalii sünain aküjaa pütchi maʼaka suluʼu 230 mma.
2. Na aküjüliikana pütchi nüchiki Jeowa outkajaashii apünüintua soʼu semaanakat. Wounejaain pia süpüla puʼunuin sünain (Hebreokana 10:24, 25). Tü ekirajünakat suluʼujeejatü tü Wiwüliakat. Wanaa sümaa suʼttuin otta sajaʼlajaain tü outkajawaakat ‹eeʼirajüna amüinchi Jeowa› otta aashajaana amaachi nia (Éfeso 5:18, 19). Nnojotsü achuntunuin nneerü sünain (Mateo 10:8).
3. Outkajaashii na aküjüliikana pütchi nüchiki Jeowa suluʼu wanee Piichi outkajaalee. Nakumajala nayakana otta nnojotsü wainmain kasa sünain. Suluʼu piichikat tia nnojoleerü piʼrüin niyaakua Jesús sünain wanee kuruusa otta waneeirua. Tü kasa choʼujaakat ayaʼlajünüsü süka tü nneerü naapakat na wayuukana süka naaʼin. Eeka naapeein eesü süpüla nejitüin shia suluʼu tü kojonchon süpüleekat nneerü (2 Corinto 9:7).
4. Na ekirajakana suluʼu tü outkajaaleekat naya na laülaashiikana (1 Timoteo 3:1-7; 1 Tesalónica 5:12). Nayakana keʼipajanashii wanee nawalayuu nanülia naainnua akaaliinjülii na laülaashiikana (1 Timoteo 3:8-10, 12, 13). Nnojotsü yaletayaain naaʼin noulia na nawalayuukana (2 Corinto 1:24). Nnojoishii kanüliayaain naya (Mateo 23:8-10). Nnojotsü naatain nasheʼin noulia na waneeinua ooʼulaka nnojoishii awalaajünüin naya saaʼu tü naʼyataainkat. Nakaaliinjüin na nawalayuukana süpüla ayatüinjanain naya sünain anoujaa otta natütüleʼerüin naaʼin wanaa sümaa sülatüin kasa mojusü namüin (Santiago 5:14-16; 1 Pedro 5:2, 3).
5. Na aküjüliikana pütchi nüchiki Jeowa outkajaashii sünain wanee outkajawaa miyoʼu. Soʼu tia outkajaasü watta saalii wayuu süpüla aapajaa pütchi suluʼujeejatü tü Wiwüliakat. Sünain outkajawaakat tia awoutisaajüshii na jekennuukana sünain ekirajawaa (Mateo 3:13-17; 28:19, 20).
6. Eejeere sukuma jünüin sukuwaʼipa naʼyataain na aküjüliikana pütchi nüchiki Jeowa Nueva York sünülia. Chashii chaaʼaya na laülaayuu kanainkana aaʼin sukuwaʼipa naʼyataain na aküjüliikana pütchi nüchiki Jeowa suluʼu tü mmakat süpüshuaʼa. Otta müsia suluʼupünaa tü mmakat eesü waneeirua piichi eejeere sukumajünüin sukuwaʼipa naʼyataain na aküjüliikana pütchi nüchiki Jeowa. Na suluʼukana aʼyataashii sünain aainjaa ooʼulaka aluwatawaa karaloukta ayuʼluushi sünainjee tü Wiwüliakat. Otta taasia akumajünüsü yalejee sukuwaʼipa tü aküjaakat pütchi nüchiki Jeowa saaʼu tü mmakat. Eesü süpüla piʼraajüin tü pejekat sünain pipia.