¿Matüjüinsat ouktaa tü waaʼinkat?
¿KATÜSÜ soʼu tü waaʼinkat ouktapa waya? Kakaliairü jiwaʼatüin saaʼin wayuu sutuma asakiraakat tia otta nasakirüin naaʼin sünain, makalaka wainmain tü nanoujakat anain sutuma.
Sainküin tü mmakat wainma wayuu anoujaka sünain katüin soʼu tü waaʼinkat ouktapa waya. ¿Shiimainchejeʼe sujuʼitüin wanee kasa wanainjee ouktapa waya? ¿Kasa wayuu tü waaʼinkat? ¿Kasa alataka sümüin ouktapa waya? Süküjüin tü Wiwüliakat kasain wayuu tia.
¿Kasa wayuu tü waaʼinkat?
Saashin tü Wiwüliakat tü pütchikat aaʼinyüü shia «tü asanalaakat aaʼin», akatsaʼa nnojotsü shiain neʼe tia. Müsü nünüiki Santiago: ‹Ouktüsü wanee wayuu nnojorüle sütchin saaʼin› (Santiago 2:26, NM). Sutuma tia, tü waaʼinkat shia tü katakat atuma woʼu.
Tia sütchinkat waaʼin nnojotsü shiain neʼe tü jouktai wasanalakat. ¿Jamüsü? Shia süka katüin soʼu motsomüin tü kasa joʼuuchein wanainkat nnojotpa süsanalüin waaʼin. Saashin The World Book Encyclopedia eesü shia «soʼu palitchon minuuto». Sutuma tia, eesü süpüla neiteʼerüin na tottootkana saaʼin wanee wayuu otta neeʼiratüin tü kasa mojukat süleʼeruʼu. Sajaʼttapa tü katakat atuma soʼu tü kasa joʼuuchein wanainkat, nnojoluitpa süpüla katüin soʼu süchikuaʼa. Sutuma tia, tü waaʼinkat shia tü sütchinkat waaʼin nnojotka jaʼyain, kataka atuma soʼu tü kasa joʼuuchein wanainkat. Tia, eesü sükajee wasanalüin waaʼin (Job 34:14, 15).
¿Katüsü noʼu na mürütkana sutuma tü sütchinkat naaʼin? Sükaaliinjüin waya tü Wiwüliakat süpüla watüjaain saaʼu tia. Müsü tü nüshajakat chi aluwataaikai Salomón: «¿Jara atüjaaka saaʼu suʼunüle chaaʼaya iipünaamüin sütchin saaʼin wayuu; otta süshakatüle mmoluʼumüin sütchin saaʼin mürüt?» (Eclesiastés 3:21, NM). Makalaka katüin noʼu na mürütkana saashin tü Wiwüliakat sutuma tü sütchinkat naaʼin maʼaka waaʼin wayakana. ¿Jamakuwaʼipat tia?
Tü sütchinkat waaʼin müsü aka saaʼin tü koriente achuwajeʼerakat wanee kasa. Mayaapejeʼe nnojoluin jaʼyain shia eesü süpüla wainmain kasa aainjünaka süka. Maʼaka jaʼin estufa otta sujuʼitüin ayaakuaa sümaa jaʼyain sünüiki wayuu suluʼu telewisoot sutuma. Akatsaʼa tü korientekat nnojotsü müin aka saaʼin tü kasa süchuwajeʼerakat. Sütchin neʼe wanee kasa. Akaʼaya tü sütchinkat waaʼin, nnojotsü wayuuin otta mürüʼlüin shia. «Waneesia neʼe sütchin naaʼin» na wayuukana otta na mürütkana (Eclesiastés 3:19, NM). Makalaka nnojoluin katüin soʼu tü waaʼinkat suluʼu wanee mma naata ouktapa waya.
Sünainjee tia, ¿kasa alataka namüin na wayuukana ouktapa naya? ¿Kasa alataka sümüin tü naaʼinkat?
‹Mmainjachi pia püchikuaʼa›
Wanaa sümaa moonooin Adán, chi palajachikai wayuu, müshi Jeowa nümüin: ‹Piroujeeinjatü tü pipijaainjatkat aka. Aleʼejeechi saʼakamüin tü mma tatükakat anainjee pia. Mmainjachin pia püchikua, süka aainjuushin pia sünainjee› (Génesis 3:19). ¿Jalajachi Adán süpülapünaa nükumajüin nia Jeowa sünainjee tü mmakat? Nnojoishi jalajachin, nnojoishi eejachin nia. Sutuma tia, wanaa sümaa nümüin Jeowa nümüin ‹mmainjachin nia nüchikuaʼa›, nnojotsü shiain katüinjatüin noʼu namaa na meʼrujusaliikana, ouktajachi nia naashin. Ouktapa nia nnojoluinjachi eein. Ouktüshi sutuma kaainjalain nia, nnojoishi oʼunüin suluʼu wanee mma naata (Roma 6:23).
¿Jama na wanee wayuu ouktakana? Süküjüin wamüin Eclesiastés 9:5, 10, NM, kasain alatüin namüin na ouktüshiikana, müsü shia: ‹Na ouktüshiikana nnojotsü kasain natüjaain aaʼu; nnojotsü eein aʼyatawaa, jülüjaa aaʼin tü aainjünajatkat, atüjaa otta kekiiwaa maʼin suluʼu tü Seol puʼunüinjatkat aluʼumüin›. Sutuma tia, tü ouktaakat shia nnojorüle eein wayuu. Naashin chi eeʼirajüikai, ouktapa wanee wayuu, «ojuʼitüsü tü sütchinkat naaʼin, mmashi nia nüchikuaʼa; soʼu kaʼikat tia nnojoluitpa kasain jülüjüin naaʼin» (Salmo 146:4, NM).
Watüjaaitpa aaʼu nnojoluin eein na wayuukana ouktapa naya, nnojotsü kasain naainjüin otta natüjaain aaʼu. Nnojoishii süpüla neʼrüin waya, naapüin wanüiki otta naashajaain wamaa. Nnojoishii süpüla nakaaliinjüin waya jee naainjüin kasa mojusü wamüin, sutuma tia nnojoishii waya mmoluinjanain neema. Akatsaʼa, ¿jamaluʼulu ‹sujuʼitüin› tü sütchinkat naaʼin ouktapa naya?
Tü sütchinkat naaʼin «aleʼejüsü eemüin chi Maleiwa shiimainkai»
Saashin tü Wiwüliakat ouktapa wanee wayuu, «tü sütchinkat naaʼin aleʼejüsü eemüin chi Maleiwa shiimainkai, chi kaapajalakai shia» (Eclesiastés 12:7, NM). ¿Maluʼulu tia suʼunüin naaʼin na ouktüshiikana eemüin Maleiwa? ¡Nnojotsü shiain tia! Suluʼu tü Wiwüliakat tü pütchikat aleʼejaa nnojotsü shiain oʼunaa suluʼumüin wanee mma naata. Wanee shiyaawase shia tü aluwataanakat anain na israeliita eʼrüliikana wayumüin: «‹Jüleʼeja tanainmüin otta tayakai shiimain taleʼejeechin jünainmüin›, müsü nünüiki Jeowa chi shikiipüʼükai surulaat» (Malaquías 3:7, NM). Tü pütchikat ‹aleʼejaa› maluʼulu nooʼulaainjanain na israeliitakana tü kasa mojusükat otta naainjüinjatü tü nümakat Jeowa. Otta ‹nüleʼejüinjachin› Jeowa nanainmüin na israeliitakana maluʼulu nükaaliinjüinjanain naya nachikuaʼa. Sünain tia, tü pütchikat «aleʼejaa» shia naʼwanajaainjatüin nakuwaʼipa, nnojotsü shiain noʼunajanain suluʼumüin wanee mma.
Akaʼaya «süleʼejapa» tü sütchinkat waaʼin nünainmüin Maleiwa, nnojotsü oʼunüin sirumatuʼumüin. Soto waaʼin katüin woʼu sutuma sütchin tü waaʼinkat. Nnojotpa tü sütchinkat waaʼin, nia neʼe Maleiwa eeka süpüla aleʼejirüin shia. Sutuma tia, wanaa sümaa sümünüin tü waaʼinkat «aleʼejüsü eemüin chi Maleiwa shiimainkai», maluʼulu niain neʼe Maleiwa eeka süpüla katüin atuma woʼu mapeena.
Jülüja waaʼin tü sümakat tü Wiwüliakat süchiki ouktüin Jesús. Müsü nünüiki Lucas: «Nuʼwaatakalaka emetut Jesús nümüin Maleiwa: ‹Taataa, taapüin pümüin chi taaʼinkai süpüla paaʼinmajüinjachin› nümakalaka. Je keraapa tü nünüikikat, ouktalaa müshi» (Lucas 23:46). Nnojoishi oʼunüin Jesús sirumatuʼumüin süchikijee sujuʼitüin nuulia tü sütchinkat naaʼin. Asoʼiraasü naaʼin soʼu apünüin kaʼi otta nuʼunaka sirumatuʼumüin sülatapa 40 kaʼi (Aluwataaushikana 1:3, 9). Süpülapünaa ouktüin Jesús naapüin tü naaʼinkat nümüin chi Nüshikai süka nünoujüin sünain katüinjatüin noʼu nüchikuaʼa nutuma Jeowa.
Shiimain niain neʼe Maleiwa ountaka katüin atuma soʼu wayuu süchikuaʼa (Salmo 104:30). ¡Anakatche maʼin tü naainjüinjatkat Maleiwa!
Shiimain tü asoʼirawaakat aaʼin
Müsü tü Wiwüliakat: ‹Soʼuweena wanee kaʼi, saapeerü nünüiki Jesús süpüshuaʼa tü wayuu ouktüsükalüirua [sotoka naaʼin Maleiwa, NM] sümaa sujuʼiteerüin mmapüjee› (Juan 5:28, 29). Naashin Jesucristo napüshuaʼa na wayuu sotokana naaʼin Jeowa, asoʼiraainjatü naaʼin. Nnojoleerü waapüin nachiki wayuu eeka ouktüin, nayeena waapaka achiki wayuu eeka süsoʼireʼennüin naaʼin. ¡Anashaateerü maʼin asakaa na wapüshi asoʼiraainjanakana aaʼin!
Pütüjeere sooʼomüin süchiki süsoʼiraainjatüin naaʼin na ouktüshiikana nutuma Maleiwa, püshaja eemüin tü achuunajünakat anülia wünaapünaa otta püchunta tü karalouktakat Saaʼin wayuu ouktusü... ¿eeshii süpüla sükaaliinjüin waya? ¿Saainjüin kasa mojusü wamüin? ¿Shiimainchejee eein?
Aluʼusaʼa waneejatüle tü eeʼiyatünakat, tü achuunajünakat suluʼujee tü Wiwüliakat suluʼujeejatü «Tü Nüchikimaajatkat Jesucristo» otta «Shikiikat Kasa Süpüshua Nütüma Maleiwa». Tü suluʼujeejatkat Traducción del Nuevo Mundo de las Santas Escrituras (con referencias) ashajünüsü süka NM.