Tü pütüjaainjatkat aaʼu süchiki tü kasa naaʼinrakat na outshiikana

1. ¿Anoujunaa anainche maʼin tü ooʼulakaakat?

«CHAA África nnojotsü choʼujaain püsakirüin maʼaka eere na ooʼulaküliikana», müsü tü karaloʼutakat African Traditional Religion (La religión tradicional africana). Anuu sooʼomüin sünüiki: «Kojutusü maʼin sümüin süpüshuaʼa wayuu chaa África tü ooʼulakiraakat». Naya anoujakana sünain na matüjainkana aashajeʼeraa nanainmüinreʼeya na atüjakana aashajeʼeraa karaloʼuta, na shikiipüʼükana iküleesia kanüliakat islam jee müsia waneirua iküleesia.

2. ¿Jalejeʼejatche tü pülaakat napüla na ooʼulaküliikana?

² Saashin wayuu chaa África eesü wanee pülaa nnojotkalü jaʼyain, nia neʼe chi Maleiwakai atüjakai süpüleerua. Tia shia tü naainjakalü atuma kasa pülasü na ooʼulaküliikana jee na watuushinuukana. Wainma na wayuu aaʼinrakana kasa anasü sükajee (magia blanca) jee müsia kasa mojusü (magia negra).

3. ¿Kasa nanoujaka anain na wayuukana süchiki tü ooʼulakaakat?

³ Eeshii wayuu ooʼulakirakana süpüla noʼulejüin naʼünüü. Aluwateʼetshi saashin wayuu püsichi, wüchii, jaʼyumülerü jee müsia waneirua mürüʼlü süpüla müliainjatüin wayuu natuma. Eeshii wayuu ooʼulakirakana süpüla mojujiraainjatüin wayuu natuma, maralüin shia, ayuulin jee müsia noʼutuinjatüin saaʼin.

4. ¿Kasa sunoujaka anain wayuu süchiki tü brujakalüirua? ¿Jamüsü nanüiki na wayuu brujapuʼukana paala?

⁴ Tü brujakalüiria shia neʼe shiʼyataaka anain tü ooʼulakaakat. Oʼunawaisü sünülia tü brujakat saʼwai sümaa meʼrujuin shia süpüla süntiraainjatüin sümaa waneirua bruja jee süpüla suʼutuin saaʼin wayuu. Tü sütapaʼakat ayatüsia shia atunkuin saaʼu tü sukaamainkat. Anuu tü sümakat wanee rewiisüta chejeʼewatka África süchiki tü sümakat waneirua jieyuu brujapuʼukana paala (majayünnüüleʼeya noʼutku): «Eetaashii maʼaka 150 wayuu outakana sükajee pasiruwaain naya tatuma»; «toʼuta aaʼinchi maʼaka jaʼraishii tepichi süka tasüin nasha»; «toʼuta aaʼinchi apünüinshii tamüraajüin saaʼujee nooʼulaain taya».

5. ¿Kasa wayuu tü magia blancakat otta jamüsü sukuwaʼipa atumawaa?

⁵ Naashin na wayuukana anasü tü magia blancakat, süka saaʼinmajüin sukuwaʼipa wayuu. Na wayuu aʼyataakana sünain tia kajapünashii jee kasüttiijashii na wayuukana natuma sümaa kasa pülasü. Nasirüin naya wunuʼu jee noʼoojirüin naya. Nojoitüin kasa pülasü nepialuʼu na wayuukana süpüla naaʼinmajüinjanain naya jee müsia nalüʼüjain pütchi suluʼujeejatü tü Coránkat jee shiale tü Bibliakat.

Alawaa otta emeejia

6. ¿Kasa naaʼinrapuʼuka Satanás namaa na yolujaakana? ¿Mmoluinjanache waya neema?

⁶ Shiimainña müliain na wayuukana nutuma Satanás otta na yolujaakana. Eesü süpüla mojuin natuma tü jülüjakat naaʼin jee mojuin nakuwaʼipa. Sümaiwa paala ekerotopüʼüshii süleʼeruʼu wayuu jee mürüʼlü (Mateo 12:43-45). Mayaapejeʼe pülain shiairua nnojotsü kapülainjatüin maʼin waaʼin sukuwaʼipairua.

7. ¿Kasa nunoujireeka anain waya Satanás otta jamüsü sukuwaʼipa nutuma?

⁷ Atüjashi maʼin emeejaa wayuu chi Yolujaakai. Nunoujireein na wayuukana sünain pülashiin maʼin nia. Müsü aka saaʼin wanee atkawaa eejatka jekenainka suluʼu wanee mma chaa África: antitshi na surulaatkana equipo de sonido süpüla nainküin naaʼin na naʼünüükana. Süpülapünaa nashutuin, müleʼu maʼin shiʼira natuma sümaa shipisana katkousü jee wonpa. Sutuma tia, eʼinaʼannayashii naaʼinrü na naʼünüükana süka wainmain katkousü. Müsia neʼe tü naaʼinrakat Satanás, nimeejüin na wayuukana sünain pülayaain maʼin nia. Naaʼinrüin tia süpüla neimmolojooin na wayuukana süpüla nnojoluinjatüin naaʼinrüin tü keeʼireekat naaʼin Jehová. Wekirajaa sünain apünüinsü alawaa nunoujireeka anain Satanás na wayuukana.

8. ¿Jeʼtsü soʼutku tü alawaa nimeejaka aka wayuu Satanás?

⁸ Wanee kasa nimeejaka aka Satanás na wayuukana, shia nnojoluin sülatüin sümüiwaʼa wanee kasa eekai mojuin. Tü kasa mojusükat alatüsü sutuma wanee kasa pülasü eekat. Jamüshijaʼa outule wanee jintüi sutuma malaria eesüjaʼa süpüla sütüjain saaʼu tü niikat süsirüin mei tia ayuuliikat jee eein süpüla sunoujain nümaʼüjünüin chi jintüikai süpüla shiküin nia wanee mei.

9. ¿Jamüsü süküjaka tü Bibliakat nnojoluin niain kasirüin Satanás süpüshuaʼa tü kasa mojusükat?

⁹ Mayaainjeʼe eein süpüla nüsirüin Satanás soʼutku tü kasa mojusü alatakat, nnojotsü anain wanoujale sünain niain kasirüin süpüshuaʼa tü kasa mojusü alatakat sutuma pülain nia. Müsü sünüiki tü Bibliakat: «Chi eekai kawachirain, eeshi süpüla nükanajuuin sünain ayoujirawaa. Chi eekai katchin, eeshi süpüla niyamünnüin nutuma chi niʼipolokai. Chi eekai kekiin maʼin, eeshi süpüla nülatirüin jamü. Chi eekai laülaain aaʼin, eeshi süpüla mawashirüin nia. Chi eekai nütüjain maʼin, eeshi süpüla nnojoluin jaralüin jaa müin nümüin. Süka eein süpüla sülatalaʼa sümüin kasa namüin» (Eclesiastés 9:11). Wanee ayoujiraai eeshi süpüla kawachirain nia noulia na waneinnua. Mayaainjeʼe müin shia eeshi süpüla nnojoluin nükanajüin tü ayoujirawaakat, süka eein süpüla sülatalaʼa nümüin wanee kasa, maʼaka saaʼin nüshanaale, aijaale wanee kasa nünain jee süchechejaale süsüla nüsaʼa. Eesü süpüla sülatüin tia sümüin wayuu, nnojotsü nüsirüin shia chi Yolujaakai jee sutuma nümaʼüjünüin nutuma wanee wayuu. Alatalaʼa müsü neʼe tia.

10. ¿Jamüsü watüjaaka saaʼu alawaain tü aküjünakat süchiki bruja?

¹⁰ Wanee alawaa nüküjaka Satanásya shia süpütüin tü brujakat shiʼiruku jee suʼunuin saʼwai süpüla süntiraain sümaa waneirua bruja jee shiale süpüla suʼttajatüin saaʼin wayuu. Müleka saaʼinrüle tia, ¿kasa ojuʼitaka sünainjee? Maʼaka watüjaipain saaʼu tü almakat nia neʼe chi wayuukai, nnojotsü shiain wanee kasa ojuʼitaka nüleʼeruʼujee jee müsia tü katakalü atuma noʼu wanee wayuu nnojotsü süpüla sujuʼitüin niʼirukuluʼujee.

11. ¿Jamüsü watüjaaka saaʼu nnojoluin sujuʼitüin kasa sünainjee shiʼiruku wanee bruja?

¹¹ ¿Punoujainche tia? Nnojotsü süpüla sujuʼitüin tü almakat jee wanee kasa nünainjee wanee wayuu süpüla saaʼinrüin kasa anasü jee kasa mojusü. Makalaka nnojoluin sujuʼitüin kasa shiʼirukuluʼujee tü brujakalüirua, alawaa neʼe tü naküjakat jee tü nanoujakalü anain.

12. ¿Kasa naaʼinraka Satanás süpüla nunoujirüin wayuu sünain saaʼinrüin wanee kasa nnojoyütka saaʼinrüin?

¹² ¿Jamaka naküjaka na brujakana süchiki tü naaʼinrakat? Eeshii süpüla nunoujirüin Satanás na wayuukana sünain sülatüin wanee kasa namüin sümaa nnojoluin shiimain shia. Naʼlapüinruʼu na wayuukana eeshii süpüla neʼrüin wanee kasa, naapüin shipisana jee naaʼinrayaain wanee kasa. Sükajee tüü, nükayaleʼerüin Satanás na wayuukana nuulia Jehová jee nunoujirüin naya sünain nnojoluin shiimain tü sümakat tü Bibliakat.

13. (a) ¿Anasüche tü magia blancakat? (b) ¿Jamüsü sünüiki tü Bibliakat süchiki tia?

¹³ Tü apünüinkat alawaa nikirajaka Satanás shia anain wayuu sutuma tü magia blancakat suulia tü magia negrakat. Nnojotpejeʼe süküjain tü Bibliakat anain tü magia blancakat suulia tü magia negrakat, süküjain mojuin süpüshuaʼaya tü ooʼulakaakat. Anuusaʼa tü sümakat tü pütchi aapünakat nümüin Moisés süchiki tü ooʼulakiraakat otta namüin na aʼyataakana sünain:

• «Nnojoluinjana ooʼulakirüin jia» (Levítico 19:26).

• «Eere wanee wayuu toolo jee shiale wanee jierü ooʼulakaaka jee aküjaka süchiki kasa alatajatü, outunajatü aaʼin» (Levítico 20:27).

• «Nnojoishi eeinjachin wanee wayuu jaʼaka eekai [...] nuuʼulakülin, eekai naainjülin kasa pülasü, eekai nunoujain sünain tü kasa «pülasü tia» sümakat wayuu, eekai niiyajülin wayuu, eekai niiʼirajirüin ouutsü» (Deuteronomio 18:10-14).

14. ¿Jamüsü nüküjaka Jehová namüin na aʼyataakana nümüin nnojoluinjanain sünainpünaain naya ooʼulakaa?

¹⁴ Niyoutuin Maleiwa sünainpünaainjanain ooʼulakiraa na aʼyataakana nümüin. Naaʼinrüin tia Jehová süka alin naya nüpüla. Nüküjain tia pütchikat namüin na aʼyataakana nümüin suulia mmoluin naya seema tü kasa sunoujakalü anain wayuu jee nnojoluinjanain müliain naya sutuma tü yolujaakalüirua.

15. ¿Jamüsü sünüiki tü Bibliakat süchiki pülashaatain Jehová nuulia Satanás?

¹⁵ Nnojotsü süküjain maʼin tü Bibliakat tü eekat süpüla nountuin na yolujaakana otta müsia tü eekat süpüla naaʼinrüin. Shia süküjaka maʼin achiki pülain maʼin chi Maleiwakai Jehová nuulia Satanás jee na yolujaakana. Jamüshijaʼa Satanás ojutünüshi nia chejee iipünaajee nutuma Jehová (Alateetkat Mapeena 12:9). Soto waaʼin nuchuntuin Satanás nümüin Jehová nuuʼulaküinjachin naaʼin Job otta noonoo ama Satanás nnojoluinjachin nuʼutuin naaʼin Job maʼaka nümüin Jehová (Job 2:4-6).

16. ¿Jara wachuntajachikai amüin kaalinwaa süpüla waaʼinmajünüin?

¹⁶ Müsü sünüiki Proverbios 18:10: «Tü nünüliakat Jehová müsü aka saaʼin wanee piichi ounjulaaya. Aaʼinmajünüshi chi wayuu achuntakai nünülia». Na aʼyataakana nümüin Maleiwa nnojoishii kamaʼanain kasa süpüla anainjatüin nakuwaʼipa maʼaka saaʼin lania otta nnojotsü nasüin wunuʼu suulia tü kasa mojusü naaʼinrakat chi Yolujaakai jee na yolujaakana. Nnojoishii mmoluin seema tü kasa eekat süpüla naaʼinrüin na ooʼulaküliikana namüin. Neʼitaain naaʼin sünain tü sümakat tü Bibliakat, tü makalü mayaa: «Niʼrüin Jehová süpüshuaʼa tü kasa alatakat sainküinpünaa tü mmakat otta nükaalinjain chi aʼyataaikai nümüin süka süpüshuaʼa naaʼin» (2 Crónicas 16:9).

17. ¿Kasa süküjaka wamüin Santiago 4:7? ¿Kasa waaʼinrajatka süpüla weʼitaain waaʼin sünain?

¹⁷ Piʼitaale paaʼin nünain Jehová eesü süpüla piʼitaain paaʼin sünain tü sümakat Santiago 4:7, tü makalü yaa: «Anakaja jüüjüüle jia nümüin Maleiwa waneepia. Müleka jüleejüle chi Yolujaakai, oʼunamaateechi juulia». Piʼyataale nümüin Jehová chi Maleiwakai shiimainkai jee paaʼinrüle tü nüchekakat, shiimain naaʼinmajeechin maʼin pia.