¡Alüʼüsü süpüla sajalajaain tü müliaakat!

«¿Jamüsüche joutka maʼin müliaa suluʼupünaa tü mmakat?» Eesü püsakiraairüle paaʼin mayaa. Kakaliainna müliain na wayuukana sutuma ayuulii, outaa, atkawaa, wawai, sukutkujaain tü mmakat, nnojoluin kasain namaʼanain otta sutuma tü kasa mojusü aainjünakat namüin. Süchikijee tü 100 juya alatüitpakat müliashii maʼin na wayuukana. ¿Ajalajaweetche tia mapeena?

Aa, alüʼüsü süpüla sajalajaain. Müsü sünüiki tü Karalouta nünüikimaajatkat Maleiwa: «Nnojoleechi chi mojulaashikai [...]. Akanasaʼa na anamiakana namüinjeerü tü mmakat otta shiimain talateenain naya süka jimateerüin naaʼin». ¿Jeʼrainjatü kaʼi? Süküjüin tü Wiwüliakat: «Tü mmakat namüinjatü na lotushiikana akuwaʼipa otta kepiainjana waneepia saaʼu» (Salmo 37:10, 11, 29, NM).

Najalajeʼerapa Maleiwa tü kasa mojusükat otta tü müliaakat, paraiisüinjatü tü Mmakat, na wayuukana nnojoleena ayuulin otta nnojoleena outuin. Saashin tü Wiwüliakat «nümülialeena naya. Müiria nnojolüin ouktaa, mojuu aaʼin, aʼyalajaa, je saalii ayuulii» (Alateetkat Mapeena 21:4).

Suluʼu tü mma jeketüinjatkat watteerü saalii wayuu asoʼiraainjatka saaʼin süchikijee outaa süpüla neʼrüinjatüin tü kasa anasükat. Müsü tü Wiwüliakat: ‹Asoʼiraajeerü saaʼin tü wayuu outusükalüirua› (Aluwataaushikana 24:15). Makalaka nümüin Jesús nümüin wanee wayuu mojulaashi, anoujüshi nünain: ‹Cheechi pia tamaa chaʼaya suluʼu tü Paraiisükat› (Lucas 23:43).

¿Jamüshii müliaka na wayuukana?

Süka nüchekalain Maleiwa anainjatüin nakuwaʼipa na wayuukana, ¿Jamüshii nuʼulaaka otta kakaliainnaka naya sünain müliaa?

Anasü maʼin nukumajia Adán sümaa Eva nutuma Maleiwa. Niʼitaain naya suluʼu wanee paraiisü otta anasü maʼin naʼyataain nutuma. Müsü tü Wiwüliakat: «Niʼraka Maleiwa anain maʼin tü nukumajalakat» (Génesis 1:31, NM). Müleka noonoole sümaa nünüiki chi kakumajalakai naya anashiijee na nachonniikana, paraiisüsüjee süpüshuwaʼa tü Mmakat, katüsüjee noʼu waneepia sümaa talatüin otta jimatüin naaʼin na wayuukana.

Wanaa sümaa nukumajüin Jeowa Adán sümaa Eva nnojoishii müin aka saaʼin wanee kemion oʼunaka eepünaale suʼuninnüin, nukumajüin naya süpüla naneeküinjatüin tü naainjeekat. Süpüla talatüinjatüin naaʼin waneepia oonooinjana sümaa tü nünüikikat Maleiwa. Müshi nia: «Tayakai Jeowa, taya chi pümaleiwasekai, Chi ekirajakai pia süpüla anainjatüin pukuwaʼipa, Chi oʼunirakai pia suluʼu tü wopu puʼunuinjatkat aluʼu» (Isaías 48:17, NM). Sutuma nnojoluin noonooin sümaa nünüiki Maleiwa otta nnojoluin nakumajuushin süpüla naluwataajiraain mojusü tü nakuwaʼipakat. Müsü tü Wiwüliakat: «Chi wayuukai nnojoishi laülaain otta aluwataain saaʼu nukuwaʼipa» (Jeremías 10:23, NM).

Wanaa sümaa nükatalaain Adán sümaa Eva nuulia Maleiwa talatüinjanayaa naya naashin. Sutuma nayoʼutüin nuluwataaya Maleiwa nnojoluinnapa nükaaliinjüin ooʼulaka anain naya. Süchikijee tia amojujaasü nakuwaʼipa, laülaashii ooʼulaka outushii naya. Makalaka kaainjalain ooʼulaka outuin waya nanainjee (Roma 5:12).

¿Jarai chi anakai maʼin süpüla aluwatawaa?

¿Jamüshi nnojoika outuin Adán sümaa Eva nutuma Maleiwa süpüla nukumajüin wanee wayuuirua neʼiraka? Shia süka mojuin pütchi süchiki tü nuluwataayakat. Tü asakinnakat maʼin anain shia: ¿Jarai chi anakai maʼin süpüla aluwatawaa? Otta ¿jarai chi anakai atuma sukuwaʼipa nuluwataaya? Otta müsia ¿aneetche nakuwaʼipa na wayuukana nakatalaale nuulia Maleiwa? Nuʼulaaka Jeowa na wayuukana sünain aainjaa tü keeʼireekat naaʼin süpülajatü sütüjaanüin aaʼu müleka anale namüin nuluwataain Maleiwa naaʼu otta shiale anain namüin naluwataajiraain. Kakaliainjatü maʼin tia süpüla nachajaain na wayuukana sukuwaʼipa naluwataaya, sunouteʼeria nakuwaʼipa, eeinjatüin tü choʼujaakat namüin otta sukuwaʼipa nanoula.

¿Kasa alataka sutuma tia? alatüsü watta saalii kasa mojusü namüin na wayuukana. Süchikijee tü 100 juya alatüitpakat watta saalii wayuu outusü sutuma tü piantuakat atkawaa eejatka saaʼu tü mmakat otta waneeirua atkawaa. Joutsu maʼin tü aainjaakat kasa mojusü otta tü atkawaakat maaʼulu. Akamüjünüsü maʼin maaʼulu tü yüikat otta tü kokaiinakat, joutsu tü ayuulii eekat sünainjee aainjirawaa akuwaʼipaa yarüttüsü. Outusü maʼin wayuu waneepia sutuma tü jamükat otta tü ayuuliikat. Nnojoluitpa anain maʼin nakuwaʼipa na wayuukana. Shiimain isain nachiki na wayuukana najalajeʼerüin tü laülawaakat, tü ayuuliikat ooʼulaka tü outaakat

Süküjüin tü Wiwüliakat tü alatakat maaʼulu namüin na wayuukana. Saashin tü Wiwüliakat ‹alüʼüsü sükalia sajattüinjatüin tü kasa mojusükat› saaʼujee tü mmakat, ‹müliainjatü maʼin wayuu süpüshuwaʼa›. Ekeraajüsü maʼin tü süküjakat tü Wiwüliakat: «na wayuu eʼrüliikana wayumüin ooʼulaka na eʼikeʼerüliikana wayuu, [aainjeena maʼin kasa mojusü, NM]» (2 Timoteo 3:1-5, 13).

¡Alüʼüsü süpüla sajalajaain tü müliaakat!

Süpüshuwaʼa tü kasa mojusü alatakat, shiiʼiyatüin sülüʼülüin süpüla sajalajeʼennüin naluwataaya na wayuukana. Atüjaanüitpa aaʼu nnojoluin anain nakuwaʼipa na wayuukana sutuma naluwanaajiraain, shia mülee nuluwataaya Maleiwa jimatüinjatka otta talatüinjatka atuma waaʼin, nnojoluinjatka atuma ayuulii otta katüinjatka atuma woʼu waneepia. Alüʼüsü süpüla Nükaaliinjüin Jeowa na wayuukana, najattirüin tü müliaakat otta tü kasa mojusü eekat saaʼu tü mmakat.

Müsü sünüiki tü Wiwüliakat: «Soʼutpünaa naluwataaya na wayuukana [tü eekalü maaʼulu] niʼitaajeerü chi Maleiwa sirumatuʼujeʼewaikai wanee aluwataaya [chayaa sirumatuʼu] nnojoluinjatka ajattinnüin. [...] Sajattireerü süpüshuwaʼa tü aluwataayakalüirua [tü eekalü maaʼulu] otta shiainjatü eeka waneepia» (Daniel 2:44, NM). Tü saashajaakat maʼin achiki tü Wiwüliakat shia Nuluwataaya Jeowa, niainjachin aluwataain. Nüküjüin Jesús süpüshi tü alatajatkat süpülapünaa ‹sajattüin tü kasa mojusükat›, müshi nia: «Aküjüneerü sümüin wayuu tü pütchi anasükat, tü süchikikat nukuaippa Maleiwa sünain aluwatawaa. Aküjüneerü sainküin mmakat süpüshua [...]. Je kettaapa shia, anteerü sükalia sajaʼlajaainjatkat oʼu tü kasakat süpüshua» (Mateo 24:14).

Sajattapa tü kasa mojusükat, ¿jaralii na katüinjanakana oʼu? Müsü tü Wiwüliakat: «Kepiainjana na lotushiikana akuwaʼipa saaʼu tü mmakat ooʼulaka na maainjalasaliikana naya eeinjanaka saaʼu. Ooʼulaka na mojulaashiikana, ajalajeʼennüinjana saaʼujee tü mmakat; ooʼulaka na emeejüliikana, asünneʼennüinjana saaʼujee» (Proverbios 2:21, 22, NM). Na ekirajaakana otta aainjakana tü keeʼireekat naaʼin Jeowa naya na lotushiikana akuwaʼipa. Müshi Jesucristo: ‹Eʼiranajaweerü naaʼin tatuma süpüla eeinjanain naya pümaa waneepia. [...] nounteerü nayaawatüin jooluʼu saaʼu tü shiimüin ekirajünakat püchiki sünain waneeshin pia sünain Maleiwain, je tachiki tayakai Jesucristo sünain püjünalain taya› (Juan 17:3). «Je tü nakuaippakat na manoujainsaliikana [...] yüüʼülaa meerü [...].Aluʼujasa chi wayuu aaʼinrakai tü nuluwataakat anain Maleiwa, ayateechi nümaa süpüla kaʼikat süpüshua» (1 Juan 2:17).

Aluʼusaʼa waneejatüle tü eʼiyatünakat, tü achuunajünakat suluʼujee tü Wiwüliakat ayuluushi sünainjee El Nuevo Testamento en el idioma wayuunaiki de Colombia y Venezuela «Tü Nüchikimaajatkat Jesucristo»

Tü alatinnakat süka wayuunaiki suluʼujee tü Traducción del Nuevo Mundo de las Santas Escrituras (con referencias) ashajünüsü yaaya süka NM.