Tü kasa anasü eekat sükajee aʼyatawaa maʼin

1-3. (1) ¿Jamüsü naaʼin na wayuukana sümaa naʼyataain? (2) ¿Jamüsü sünüiki tü Wiwüliakat süchiki aʼyatawaa? ¿Kasa asouktüneetka eʼipajee?

NNOJOTSÜ talatüin naaʼin na wayuukana maaʼulu sümaa naʼyataain, nayouktakalaka shia. Aʼyataashi soʼukaʼiwai sünain kasa nnojotka talatüin atuma naaʼin otta nnojotsü ajaʼlajaamaatüin shia maalü naashin. Akanasaʼa naya, nnojoishii ayatüinjanain müin naaʼin mayaa. Eesü süpüla nantüin sünain tü naʼyataweekat atuma otta talatüin naya sümaa.

² Anasü sünüiki tü Wiwüliakat süchiki aʼyatawaa maʼin. Saashin, anasü maʼin aʼyatawaa otta tü eekat sükajee. Müshi Salomón, wanee wayuu kekiishi maʼin: «Napüshuaʼa na wayuukana eküinjana, asüinjana otta neʼrüinjatü tü kasa anasükat sükajee naʼyataain maʼin. Tia, nüsülajala Maleiwa» (Eclesiastés 3:13, TNM). Süka alin maʼin waya nüpüla Jeʼwaa otta nücheküin tü anasükat wapüleerua, nücheküin anain waaʼin sünain aʼyatawaa otta talatüin waya sümaa tü kasa anasü eekat sükajee. Anale wamüin waʼyataain maʼaka anain shia nümüin Maleiwa otta woonoole sümaa tü pütchi nümakat ayateechi alin wapüla nia (Eclesiastés 2:24; 5:18).

³ Sünain ekirajaayakat tüü asoukteena waya shiʼipajee pienchisü asakiraa: ¿Jamüsü süpüla weʼrüin ‹tü kasa anasükat sükajee waʼyataain maʼin›? ¿Jarat tü aʼyatawaa wayouktüinjatkat? ¿Jamüsü süpüla wanaawain watuma waʼyataain sümaa tü waainjakat nümüin Maleiwa? ¿Jarat tü aʼyatawaa waʼyataainjatkat maʼin anain? Wekirajaa palajana nachiki piamashii aʼyataalii atüjaka maʼin aʼyatawaa: Jeʼwaa otta Jesucristo.

CHI AʼYATAAI MIYOʼUSHIKAI OTTA CHI ATÜJAKAI SÜPÜLEERUA NIʼYATAAIN

4, 5. ¿Jamüsü sünüiki tü Wiwüliakat süchiki niʼyataalin maʼin Jeʼwaa?

⁴ Chi Aʼyataai Miyoʼushikai nia Jeʼwaa. Shiajaʼa sümaka Génesis 1:1: ‹Sümaiwa, nükumajüin Maleiwa kasa chaa iipünaa ooʼulaka yaa mmoluʼu›. Süchikijee kettaain niʼyataain, niʼrüin «anashaatain maʼi» shia süpüshuaʼa (Génesis 1:31). Talatüshi maʼin nia sümaa. Shiimainya, Jeʼwaa «chi Maleiwa talatakai aaʼin», talatüshi sutuma tütüin maʼin nia sünain aʼyatawaa (1 Timoteo 1:11, TNM).

⁵ Aʼyataai maʼin Jeʼwaa; eesü tü naainjakat waneepia. Sutuma tia, sülatapa wainma juya süchikijee nükumajüin tü kasa yaakat Mmapaʼa müshi Cristo nüchiki: ‹Ayatayüiya chi Tashikai aʼyataain› (Juan 5:17, TNM). ¿Kasa masütaajuka anain nia? Aʼyataashi sünain aaʼinmajaa otta ekirajaa wayuu sirumatuʼujee. Otta müsia, eesü ‹wanee kasa jeketü nükumajaka›: na anoujüshii nüneekakana süka nütchin süpüla naluwataain nümaa Jesús sirumatuʼu (2 Corinto 5:17, TNM). Waneepiashi nia sünain aʼyatawaa süpüla shikeraajüin tü nüchekakat süpüleerua wayuu, tü achekakat katüin soʼu waneepia suluʼu tü mma anasükat (Roma 6:23). Talatüshi maʼin nia sükajee tü eekat sutuma niʼyataain, wainmain maʼin na oonookana sümüin tü aküjünakat süchiki Nuluwataaya, arütkaaka nünainmüin otta anoukteʼeraka nakuwaʼipa süpüla ayatüin alin napüla nia (Juan 6:44).

6, 7. ¿Kasa naainjaka Jesús süpüla niiʼiyatüin tütüin maʼin nia sünain aʼyatawaa?

⁶ Soʼu wainma juya niiʼiyatüin Jesús tütüin maʼin nia sünain aʼyatawaa. Süpülapünaa nüntüin Mmapaʼamüin «atüjüshi maʼin [nia] süpüleerua niʼyataain», nükumajaka anainjee Jeʼwaa süpüshuaʼa kasa, «chakat iipünaa je yaa mmoluʼu» (Proverbios 8:22-31, TNM; Colosas 1:15-17). Wanaa sümaa yaajachin nia Mmapaʼa, ayatüshi atüjüin maʼin aʼyatawaa. Jintüliiwaʼaya nia, ekirajaashi sünain akumajaa piichi otta ‹chi aʼyataaikai süka taapüla› münüshi nia (Marcos 6:3). Soto waaʼin nnojoluin oikkaalee soʼu kaʼikat tia otta kachueera achuwajaanaka süpüla shiʼyotoonüin taapüla. Tia, aʼyataanüsü süka ajapüü otta katchinjachi sümaa nütüjüin maʼin wanee aʼyataai süpüla naainjüin shia. ¿Müshi piʼrakai naaʼin Jesús achajaain taapüla, nüshottüin wunuʼu otta najarattüin shia eemüinjachire niʼyataain? ¿Müshi piʼrakai naaʼin sünain niʼitaain soʼu miichi, sutujuna otta naainjüin einasee sümaa meesa? Shiimain nütüjaain saaʼu Jesús talatüin wayuu sutuma anain saainjia kasa nutuma.

⁷ Otta müshia Jesús, aʼyataashi maʼin sünain aküjaa pütchi. Aʼyataashi apünüin juya shiatapünaamüin sünain tia. Aküjeeshi pütchi sümüin wainma wayuu, makalaka nütamaain wattaʼa maalü otta ooʼulaʼaleeshia saʼwai (Lucas 21:37, 38; Juan 3:2). ‹Oʼunüshi Jesús suluʼupünaa pueulo süpüshua. Aküjüshi nia pütchi anasü sümüin wayuu süchiki nukuaippa Maleiwa sünain aluwatawaa› (Lucas 8:1). Wattakuwaishi nia waraittüin suluʼupünaa wopu eere kaittuulin mma süpüla nüküjüin pütchi sümüin wayuu.

8, 9. ¿Jamüsü süpüla niʼrüin Jesús ‹tü kasa anasükat sükajee niʼyataain maʼin›?

⁸ ¿Niʼrüin Jesús kasa anasü sutuma niʼyataain maʼin? Aa. Aküjüshi maʼin pütchi sümüin wayuu süchiki Nuluwataaya Maleiwa sümaa nikeraajüin naya süpüla anoujaa. Sutuma tia niʼyataainkat, katchinsü naaʼin otta katüsü noʼu, müsüjeseʼe nnojoluin kasajatüin nümüin naamajüin shiiʼiree nüküjüin pütchi (Juan 4:31-38). Sajaʼttiamüin niʼyataain yaa Mmapaʼa, ¡talatüshi maʼin wanaa sümaa nümüin nümüin chi Nüshikai: ‹Saaʼu tekeraajüin süpüshua tü puluwataakat anain taya, teeʼiyatüitpa pukuaippa sümüin wayuu sainküin mma›! (Juan 17:4.)

⁹ Nia neʼe Jeʼwaa otta Jesús eeʼiyataka weʼrüinjatüin tü kasa anasükat sükajee waʼyataain maʼin›. Sükajee alin wapüla naya keeʼireesü waaʼin ‹washatüin nukuwaʼipa Maleiwa› otta ‹woushikaain süchiirua nukuwaʼipa› Cristo (Éfeso 5:1; 1 Pedro 2:21). Wekirajaa sünain tü waainjüinjatkat süpüla talatüin waya sümaa tü kasa anasü eekat sükajee waʼyataain maʼin.

KASA ANASÜ EEKA SÜKAJEE AʼYATAWAA MAʼIN

10, 11. ¿Kasa akaaliinjeenaka waya süpüla anain tü jülüjakat waaʼin süchiki waʼyataain?

¹⁰ Tü aʼyatawaakat süpüshi tü naainjüinjatkat na anoujüshiikana. Talateeshii waya otta aneesü waaʼin sünain waʼyataain. Akatsaʼa kapüleesü tia, waʼyataale sünain kasa nnojotka wacheküin. Müle shia, ¿kasa waainjüinjatka süpüla weʼrüin ‹tü kasa anasükat sükajee waʼyataain maʼin›?

¹¹ Anainjatü tü jülüjakat waaʼin. Isasü wachiki waʼwanajaain tü alatakat sünain waʼyataain, akatsaʼa eesü süpüla wanoukteʼerüin tü jülüjakat waaʼin süchiki. Tü akaaliinjeenakat waya süpüla tia shia jülüjüle waaʼin jamüin saaʼin nümüin Maleiwa wanee kasa. Maʼaka saaʼin wepijüle wapüshi, sotuinjatü waaʼin kojutüin tü waainjakat nümüin Jeʼwaa mayaapejeʼe mojutüin shia, süka eein süpüla waapüin tü choʼujaakat sümüin wapüshi. Saashin tü Wiwüliakat na nnojoliikana aaʼinmajüin napüshi «mojuleesia maʼi tü naaʼinrakat nuulia wane manoulasai» (1 Timoteo 5:8). Watüjaale saaʼu waainjüin tü nuluwataakat anain Maleiwa sükajee waʼyataain, anasü waaʼin otta talatüshii maʼin waya noulia na aʼyataajiraakana wamaa.

12. ¿Jamüsü anaka maʼin tütüle waya otta lotule wakuwaʼipa sünain waʼyataain?

¹² Tütüinjana waya otta lotuinjatü wakuwaʼipa. Na anoujüshii shiimainshiikana, tütüinjana otta anainjatü saainjia naʼyataain. Tütüle waya sünain aʼyatawaa wainmeerü kasa anasü eeka sutuma, maʼaka saaʼin kojutüin waya namüin na walaamainkana (Génesis 39:3, 4; Proverbios 22:29). Otta müsia, eesü kasa anasü lotule wakuwaʼipa, nnojorüle waʼluwajüin kaʼi, kasa otta nneerü sünain waʼyataain (Éfeso 4:28). Maʼaka wekirajaain sünain tü ekirajaaya alatakat eeshii neʼitaale naaʼin na walaamainkana wanain. Jaʼitakajaʼa nnojorüle nayaawatüin saaʼu lotuin wakuwaʼipa sünain aʼyatawaa, talateena waya «süka wulein tü suluʼukat waaʼin» otta süka talatüin naaʼin Maleiwa watuma (Hebreokana 13:18, TNM; Colosas 3:22-24).

13. ¿Kasa eeka sutuma anain maʼin wakuwaʼipa sünain aʼyatawaa?

¹³ Wayaawatüinjatü kojuteechin Maleiwa sutuma wakuwaʼipa. Anale maʼin wakuwaʼipa nayaawata aaʼu na waneeinnua. Sutuma tia, ‹eesü süpüla kapülain naaʼin tü wekirajakat anain, tü nüchikikat chi Maleiwa Oʼtteʼerüikai.› (Tito 2:9, 10.) Anale maʼin wakuwaʼipa kojutüsü sümüin wayuu tü iküleesia shiimainkat otta shiyaawata aaʼu anain maʼin shia. ¡Anasü maʼin nücheküle tü shiimainkat wanee waʼyataajiraa amaachi sutuma wakuwaʼipa! Nnojo motuin waaʼin nnojoluin eein wanee kasa anaka maʼin suulia watüjaain saaʼu talatüin naaʼin Jeʼwaa otta kojutüin nia sutuma wakuwaʼipa (Proverbios 27:11; 1 Pedro 2:12).

WAYAAWATA TÜ WAʼYATAAINJATKAT ANAIN

14-16. ¿Jarat tü piamasü kasa wasakirüinjatkat anain waaʼin waneekapa wanee aʼyatawaa?

¹⁴ Nnojotsü süküjüin maʼin tü Wiwüliakat kasain aainjünajatüin jee nnojoluinjatüin aainjünüin sünain wanee aʼyatawaa. Akatsaʼa tia, nnojotsü maluʼuluin wacheküinjatüin aʼyatawaa eeka eein sümaa nnojoluin jülüjüin waaʼin tü sünainpünaakat. Sükaaliinjüin waya tü Wiwüliakat süpüla waneeküin aʼyatawaa anasü, nnojotka mojuin nümüin Maleiwa (Proverbios 2:6). Süpüla watüjaain saaʼu mojule nümüin Maleiwa wanee aʼyatawaa wasakirüinjatü waaʼin sünain piamasü kasa.

¹⁵ ¿Shia wanee aʼyatawaa mojuka saashin tü Wiwüliakat? Mojusü saashin tü Wiwüliakat aʼluwajaa, aküjaa alawaa otta aainjaa shiyaakua maleiwayaasü (Éxodo 20:4; Aluwataaushikana 15:29; Éfeso 4:28; Alateetkat Mapeena 21:8). Sutuma tia, wayouktüin aʼyatawaa eere waainjüinjatüin kasa eeka müin aka saaʼin tia. Süka alin wapüla Jeʼwaa wayouktüinjatü tü aʼyatawaa aainjirakat waya kasa nnojotka nuluwataain anain (1 Juan 5:3).

¹⁶ ¿Wanaaweerü taaʼin namaa na waneeinnua otta tooteena naya sünain aainjaa kasa mojusü? Jülüja waaʼin saapüneere wamüin wanee aʼyatawaa eere jülüjüinjanain waaʼin na antüshiikana. Tia aʼyatawaakat nnojotsü mojuin. ¿Jama waainjüle shia suluʼu wanee pitaalü süpülajatü ojutiraa joʼuu? Shiimain nnojoluinjanain waya sünainpünaain tü ojutiraakat joʼuu. Akatsaʼa sutuma waʼyataain waneepia yala, wanaaweerü waaʼin sümaa tü ojutiraakat joʼuu. Tia, nnojotsü anain naashin Maleiwa (Éxodo 21:22-24). Sükajee alin wapüla Jeʼwaa, nnojotsü wacheküin sünainpünaain waya kasa eeka mojuin saashin tü Wiwüliakat.

17. (1) ¿Kasa jülüjüinjatka maʼin waaʼin waneeküinjatpa wanee aʼyatawaa? (Paashajeʼera tü pütchikat «¿Tacheküinjatü aʼyatawaakat tüü?».) (2) ¿Kasa waainjüinjatka süpüla sükaaliinjüin waya tü waaʼinkat süpüla waneeküin wanee kasa talataka atuma Maleiwa?

¹⁷ Süpülapünaa waneeküin wanee aʼyatawaa wasakirüinjatü waaʼin sünain tü asakinnakat suluʼu tü pütchikat 15 otta 16. Akatsaʼa, eesü waneeirua kasa jülüjüinjatka maʼin waaʼin.a Nnojotsü waʼatapajüinjatüin nüküjüin wamüin chi achepchiee oonookai otta kekiikai maʼin süpüshuaʼa tü kasa waainjüinjatkat. Tia, wayaawatüinjatü aaʼu wamüiwaʼa anale jee mojule shia. Aküjünüitpa wamüin suluʼu ekirajaaya piama kiʼrainjatüin watuma tü waaʼinkat sükajee wekirajaain sünain tü Wiwüliakat otta weʼitaain suluʼu wakuwaʼipa tü sümakat. Müle shia, ‹eejeerü waaʼin sünain tü kasa anasükat süpüla waaʼinrüin jee sünain tü kasa mojusükat süpüla wayouktüinjatüin shia› otta sükaaliinjeena waya tü waaʼinkat süpüla waneeküin wanee kasa talataka atuma naaʼin Maleiwa otta süpüla ayatüin alin wapüla nia (Hebreokana 5:14).

WANAAWA WATUMA TÜ KASA WAAʼINRAKAT

18. ¿Jamüsü kapüleeka maʼin wamüin wanaawain watuma tü waaʼinrakat?

¹⁸ Maaʼulu «sülüʼütpa sükalia sajaʼttüinjatüin tü kasakat süpüshua» otta eere ‹müliain maʼi wayuu›, kapüleesü maʼin wamüin wanaawain watuma sukuwaʼipa tü waaʼinrakat (2 Timoteo 3:1). Watüjaa aaʼu kapüleein ousütaa wanee aʼyatawaa otta ayatüin waya sünain. Otta watüjaa aaʼu waapüinjatüin tü choʼujaakat sümüin wapüshi. Akatsaʼa, nnojorüle eein waaʼin, eesü süpüla waainjüin tü apüleeruaanakat anain waaʼin sünain aʼyatawaa otta wainmeein kasa wamaʼana maʼaka naaʼin na manoujüinsaliikana, sutuma tia nnojotsü kooʼomüin waʼyataain nümüin Maleiwa (1 Timoteo 6:9, 10). Wekirajaa sünain tü waainjüinjatkat süpüla ayatüin wanaawain watuma tü waainjakat otta waaʼinrüin ‹tü kojutükat maʼin› (Filipos 1:10).

19. ¿Jamüsü weʼitaainjatka maʼin süpüshuaʼa waaʼin nünain Jeʼwaa? ¿Kasa nnojoluinjatka waainjüin shiimainre wamüin naaʼinmajüin waya?

¹⁹ Weʼitaa maʼin süpüshuaʼa waaʼin nünain Jeʼwaa (Proverbios 3:5, 6). Nia Jeʼwaa weʼitaainjachika anain waaʼin süka alin waya nüpüla otta naaʼinmajüin waya, ¿aashimüin? (1 Pedro 5:7.) Nütüjaa aaʼu woulia kasain choʼujaain wamüin otta naapüin shia wamüin waneepia (Salmo 37:25). Sutuma tia, acheküsü nnojoluin motuin waaʼin tü sümakat tü Wiwüliakat: ‹Anakaja nnojoliire keeʼireein jaaʼin washirüü. Shia anaka aluʼu talatüle neʼe jaaʼin waneʼewai jukua sümaa eekai eein jümaʼana, sükajee nümüin wamüin Maleiwa: «Nnojoleechi taya oʼunüin jümaʼanajee. Nnojoleena tapütüin jia jümüiwa»› (Hebreokana 13:5). Watüjaa aaʼu nakajee na wawalayuu aʼyataakana waneepia nümüin Jeʼwaa naapüin waneepia tü choʼujaakat wamüin. Shiimainre wamüin naaʼinmajüin waya Jeʼwaa, nnojoleerü jiwaʼatüin waaʼin sutuma tü choʼujaakat sümüin wapüshi (Mateo 6:25-32). Nnojoleerü wooʼulaain tü aküjaakat pütchi, tü outkajawaakat otta waneeirua kasa sünainpünaaka wanoula süpüleerua waʼyataain (Mateo 24:14; Hebreokana 10:24, 25).

20. ¿Jamaluʼulu anain sukuwaʼipa woʼu? ¿Kasa waainjüinjatka süpüla anain sukuwaʼipa woʼu?

²⁰ Ana sukuwaʼipa woʼu (Mateo 6:22, 23). Nnojo waainjüin kasa jiwaʼataka atuma waaʼin. Na anoujüshiikana naainjüinjatü tü keeʼireekat naaʼin Maleiwa. Anale maʼin sukuwaʼipa woʼu, nnojoleerü kachiiruain waaʼin wainmain nneerü wakanajüin otta kasa wamaʼana. Nnojoleerü waainjüin kasa eeka eein shiiʼiree wamaʼaneein tü jeketkat oikkaanüin süka shiiʼiyatünüin shiain choʼujaain süpüla talatüin waya. Süpüla anain sukuwaʼipa woʼu nnojoluinjatü wojuyaajüin tü nnojotkat choʼujaain wamüin. Nnojotsü wamaʼanainjatüin kasa walatiraka anain kaʼi otta jülüjüin maʼin shia waaʼin. Maʼaka süküjüin tü Wiwüliakat «eere tü wekakat, eere washeʼin, talatüinjana waya sümaa tia» (1 Timoteo 6:8). Nnojotsü wainmainjatüin maʼin kasa wamaʼana.

21. ¿Jamüsü eeinjatka tü palajatüinjatkat watuma? ¿Kasa palajatüinjatka watuma?

²¹ Palajana watuma waʼyataain nümüin Maleiwa. Süka palitchon kaʼi apütaaka wapüla, eeinjatü tü palajatüinjatkat watuma. Nnojorüle müin shia, waainjeerü kasa nnojotka kojutüin otta nnojoleerü jülüjüin waaʼin tü kojutükat maʼin. ¿Jarat tia? Kojutüsü maʼin namüin na wayuukana ekirajawaa suluʼu tü ekirajaalee miyoʼukat otta anain maʼin naʼyataain, akaisaʼa Jesús müshi namüin na nikirajüinkana ‹palajanainjatüin natuma Nuluwataaya Maleiwa› (Mateo 6:33, TNM). Na shiimainshiikana anoujüin palajanasü natuma Nuluwataaya Maleiwa suulia kasa eeka eein. Sükajee wakuwaʼipa, tü waneekakat, tü wasaʼwateekat otta tü waainjakat weeʼiyatüin kojutüin maʼin wamüin Nuluwataaya Maleiwa otta tü keeʼireekat naaʼin suulia tü wamaʼanakat otta waneeirua kasa aainjünaka maʼin maaʼulu.

WAʼYATAA MAʼIN SÜNAIN AKÜJAA PÜTCHI

22, 23. (1) ¿Jarat tü aʼyatawaa palajanainjatkat natuma na anoujüshiikana? ¿Kasa neeʼiyataka aka palajanain shia natuma? (Paashajeʼera tü pütchikat «Talatüsü taaʼin sutuma tü taneekakat».) (2) ¿Kasa jülüjüinjatka maʼin waaʼin?

²² Natüjaa aaʼu na anoujüshiikana sülüʼülüin süpüla sajaʼttüin kasa süpüshuaʼa. Makalaka jülüjüin naaʼin tü aʼyatawaa palajanainjatkat natuma: aküjaa pütchi süchiki Nuluwataaya Maleiwa otta ekirajaa wayuu (Mateo 24:14; 28:19, 20). Maʼaka naaʼin Jesucristo, chi nashatakai akuwaʼipa, aʼyataashii maʼin sünain akaaliinjaa wayuu süpüla katüin soʼu. ¿Kasa neeʼiyataka aka palajanain natuma tü aküjaakat pütchi? Kojuya na aküjakana maʼin pütchi. Eeshii na pürekutsootkana otta eeshii eeka najütünüin sünain aküjaa pütchi suluʼu wanee mma naata. Wainma na akaaliinjakana nachonnii süpüla naʼyataain waneepia nümüin Jeʼwaa, süka natüjaain saaʼu choʼujaain neʼitaain suluʼu naaʼin nachonnii nasaʼwatüinjatüin wanee kasa süpüla aʼyatawaa nümüin Maleiwa. Sükajee naküjüin maʼin pütchi na anoujüshii shiimainshiikana, ¿neʼrüin «tü kasa anasükat sükajee naʼyataain maʼin»? Aa. Nnojotsü eein wanee kasa talataka atuma waya, anaka atuma waaʼin otta antiraka wamüin kasa anasü suulia waʼyataain nümüin Jeʼwaa süka süpüshuaʼa waaʼin (Proverbios 10:22).

²³ Süpüla wepijüin wapüshi, aʼyataashii maʼin waya soʼu wainma oora. Mayaapejeʼe müin shia, eesü süpüla weʼrüin ‹tü kasa anasükat sükajee waʼyataain maʼin› maʼaka nücheküin shia Jeʼwaa. Waainjüle tü pütchi nümakat, talateena waya sümaa waʼyataain. Otta müsia, nnojo jülüjüin waaʼin wanee kasa naata suulia waküjüin pütchi anasü süchiki Nuluwataaya Maleiwa. Müle shia watuma, weeʼiyatüin alin wapüla Jeʼwaa otta keeʼireein waaʼin ayatüin alin wapüla nia.