¿Jameerü pukuwaʼipa puutkajaale?

Wainma wayuu ooʼulaaka suulia oʼunaa suluʼumüin wanee iküleesia süka nnojoluin kasain ekirajünüin anain naya. ¿Jamakaʼa puutkajaainjachika namaa na aküjüliikana pütchi? ¿Kaseerü piʼraka sünainjee puutkajaain?

Talateerü paaʼin süka puutkajaain namaa wayuu aipüralii. Na anoujüshii eejanakana soʼu nükalia Jesuu, eeshii na nawalayuu noutkajaakana amaa süpüla naʼwaajüin Maleiwa, nekirajaain sünain tü Ashajuushikat jee süpüla natütüleʼerüin naaʼin namaa (Hebreokana 10:24, 25). Aleewajiraashii naya süka noutkajaain sümaa aijiraain naya (2 Tesalónica 1:3; 3 Juan 14, TNM). Müsia neʼe wakuwaʼipa maaʼulu otta talatshii waya.

Pütüjeerü apüleerua paaʼinrüin tü sümakat tü Wiwüliakat. Ayatsia aainjünüin maaʼulu tü sümakat tü Wiwüliakat, outkajaashii maaʼulu tooloyuu, jieyuu jee tepichi süpüla naapajüin nünüiki wanee wawala atüjakai ekirajaa. Nükaaliinjüin naya süpüla naainjüin tü sümakat tü Wiwüliakat (Deuteronomio 31:12; Nehemías 8:8). Eeshii süpüla nasouktüin napüshuaʼa na jutkatakana shiʼipajee tü asakinnakalü anain jee eeshii süpüla neeʼirajüin. Mayaa, naküjüin sümüin wayuu tü naʼatapajakat nutuma Maleiwa (Hebreokana 10:23).

Püchechereerü punoula. «Cheeshi taya jümaa süpüla [...] wakaaliijiraain wayakana wapüshua sünain achecheraa waaʼin sükajee tü wanoulakat.» Müshi Pablo namüin na nuwalayuukana (Roma 1:11, 12.) Kottiraale waya namaa na wawalayuukana wachecherüin wanoula otta keeʼireesü waaʼin waainjüin tü nümakat Jeʼwaa.

Puutkajaa wamaa süpüla piʼrüin jamüin sukuwaʼipa. Talateerü waaʼin pümaa. Nnojotsü achuntünüin nneerü sünain tü outkajawaakat.

• ¿Jara washataka achiirua woutkajaain?

• ¿Kasa weʼraka sünainjee woutkajaain?