¿Jamüsü anainjatka waʼanaaya süpüla tü outkajawaakat?

¿Piʼrüin anain naʼanaaya na wayuukana sünain tü outkajawaakat suluʼu karalouktakat tüü? ¿Jamüsü keeʼireeka waaʼin anain waʼanaaya jee anain wayolojo?

Süka kojutüin wamüin Maleiwa. Nnojotsü ponuin naaʼin Maleiwa anale shiyolojo wanee wayuu (1 Samuel 16:7). Akatsaʼa keeʼireein waaʼin kojutüin nia wamüin namaa na wawalayuukana sünain tü outkajawaakat. Chainjanale waya nümaʼanamüin wanee aluwataai, anasü wayolojo süka kojutüin nia wamüin. Müinjatia wakuwaʼipa woutkajaapa, weeʼiyatüinjatü kojutüin wamüin Jeʼwaa, «chi aluwataashikai [...] süpüla kaʼikat süpüshua» jee weeʼiyatüinjatü sujutü tü outkajaaleekat (1 Timoteo 1:17).

Süka waainjüin tü wekirajaakalü anain. Saashin tü Wiwüliakat, anainjatü waʼanaaya jee walaüleʼerüinjatü waaʼin (1 Timoteo 2:9, 10, TNM). Tü wayuu anakat saʼanaaya, nnojotsü arülachoin, joʼuuchoin jee kojutüin maʼin süsheʼin süpüla shiirakaanüin amüin. Laülaale waaʼin, nnojoluinjatü kashüülain waʼanaaya. Mayaasüjeʼe süküjünüin wamüin tia pütchikat, eesü süpüla waneeküin tü kuluulu waʼatüinjatkat. Anale wayolojo, ‹kapülainjeerü tü pütchi wekirajakat nüchiki chi Maleiwa Oʼtteʼerüikai› otta aʼwaajüneechi nia sükajee wakuwaʼipa (Tito 2:10; 1 Pedro 2:12). Anale waʼanaaya süpüla tü outkajawaakat, aneerü pütchi süchiki nupueulose Jeʼwaa.

Nnojotsü choʼujaain waʼatüin kuluulu kojutsü süpüla anain waʼanaaya. Nnojo makatüin pia suulia tü outkajawaakat, jaʼitairü nnojoluin anain maʼin püsheʼin.

• ¿Jamüsü choʼujaaka anain waʼanaaya sünain tü outkajawaakat?

• ¿Jarat tü pütchi anakalü atuma waʼanaaya?