¿Kasapülajana na laülaashiikana suluʼu tü outkajaaleekat?

Na aküjüliikana pütchi, nnojoishii awalaajünüin sükajee nakaaliinjüin na anoujüshiikana. Shia aainjünaka maaʼulu tü naainjapuʼukat na anoujüshiikana sümaiwa, aneekünüshii waneeinnua wawalayuu süpüla naaʼinmajüin na anoujüshiikana (Aluwataaushikana 20:28). Jüüjüüshii na laülaashiikana nümüin chi naaʼinkai Maleiwa otta nakaaliinjüin na anoujüshiikana sümaa ‹talatüin naaʼin süka nachekalain shia, nnojotsü sükajeejatüin walaain naya sünain› (1 Pedro 5:1-3). ¿Kasa nakaaliinjaka anain waya na laülaashiikana?

Nakaaliinjüin sümaa naaʼinmajüin waya. Nakaaliinjüin na anoujüshiikana otta naaʼinmajüin nanoula. Suulialeʼeya naluwataain waya pejeewa, nakaaliinjüin waya süpüla anain wakuwaʼipa jee talatüin waaʼin süka natüjaain saaʼu naluwataaushin nutuma Maleiwa (2 Corinto 1:24). Chi anneetpüʼükai, naaʼinmajüin waneʼewai sukua tü naʼanneetsekat: müshiʼiya na laülaashiikana, aʼyataashii süchiirua neʼraajüin waneʼewai nakua na anoujüshiikana (Proverbios 27:23).

Nekirajüin waya sünain tü nüchekakat Maleiwa. Naya oʼuniraka sukuwaʼipa tü outkajawaa kooʼomüinkalü atuma wanoula semaanawai (Aluwataaushikana 15:32). Noʼunirüin sukuwaʼipa tü aküjaakat pütchi, aküjüshii pütchi wamaa otta nekirajüin waya sünain tü kasa sünainpünaakat waʼyataain nümüin Maleiwa.

Natütüleʼerüin waaʼin waneʼewai wakua. Awaraijaashii na laülaashiikana wepialuʼumüin süpüla natütüleʼerüin waaʼin jee yootushii naya wamaa suluʼu tü outkajaaleekat. Namülialüin waaʼin sükajee tü Wiwüliakat (Santiago 5:14, 15).

Mayaainjeʼe naʼyataain sünain akaaliinjaa na anoujüshiikana, eeshii na laülaashii aʼyataainjanakana shiyaaluʼu napüshi. Kojutüinjana wamüin na laülaashiikana süka wainmain tü kasa naainjakat (1 Tesalónica 5:12, 13).

• ¿Kasa aneekünaka apüla na laülaashiikana?

• ¿Kasa naainjaka na laülaashiikana süpüla naaʼinmajüin waya waneʼewai wakua?