¿Eesü süpüla talatüin waaʼin sümaa wapüshi?

1. ¿Jamüsü kasaalüinjatka wayuu suluʼu laülaapia?

Tü pütchi anasükat, nümaʼanajeejatü Jeʼwaa, chi Maleiwa talatakai aaʼin. Keeʼireesü naaʼin talatüin waaʼin sümaa wapüshi (1 Timoteo 1:11, TNM). Niʼitaala shikii tü kasaalüükat. Talatajiraajeena na wayuukana otta aijiraajeena namaa nachonnii kasaarüle naya suluʼu laülaapia.

Naashin Maleiwa waneepiainjachi chi wayuukai sümaa nuʼwayuuse. Kaʼwayuuseinjanale na anoujüshiikana, nashajirüinjatü nanülia suluʼu tü laülaapiakat (Lucas 2:1, 2, 4, 5). Nnojotsü neeʼiratüinjatüin naʼwayuuse na wayuukana naashin Jeʼwaa (Hebreokana 13:4). Mojusü nümüin tü ooʼulaajirawaakat (Malaquías 2:16). Eeshii süpüla nooʼulaajiraain jee kasaalüin naya nachikuaʼa nümaʼüjiraale nukuwaʼipa chi toolokoi jee shiale tü jietkat. Püleeja Mateo 19:3-6, 9.

2. ¿Kasa eʼitaanaka apüla chi toolokoi otta tü jietkat?

Nukumajala Jeʼwaa chi toolokoi otta tü jietkat süpüla nakaaliinjiraain (Génesis 2:18). Laülaashi chi toolokoi süpüleerua nuʼwayuuse. Makalaka niʼyataainjachin süpüleerua nuʼwayuuse, nüchonnii otta nikirajüinjana naya nüchiki Maleiwa. Nuuʼulaainjatü suulia naaʼinrüin waneeirua kasa süka alin nüpüla nuʼwayuuse. Aijiraainjana otta kojutüjiraainjana naya. Talateere naya, motuinjatü naaʼin tü naainjalakat. Püleeja Éfeso 4:31, 32; 5:22-25, 33 otta 1 Pedro 3:7.

3. ¿Ooʼulaajiraainjana na wayuukana mojujiraale naya?

Mojujiraale naya, nanoukteʼerajatü tü alatakat namüin süka anaka akuwaʼipa (1 Corinto 13:4, 5). Naashin Maleiwa, nnojoishii akatalaainjanain na wayuukana suulia naʼwayuuse süpüla nanoukteʼerüinjatüin tü alatakat namüin. Püleeja 1 Corinto 7:10-13.

4. ¿Kasa nüchekaka Maleiwa napüleerua wachonnii?

Nücheküin Jeʼwaa talatüinjatüin naaʼin wachonnii. Makalaka nikirajüin naya süpüla anainjatüin nakuwaʼipa tepichijaiwaʼaya naya. Keeʼireesü naaʼin kekiinjanain maʼin naya otta natüjüinjanain süpüleerua wanee kasa sükajee neʼrüin nakuwaʼipa nashi jee nei (Colosas 3:20). Keeʼireesü naaʼin Jeʼwaa natüjaainjatüin saaʼu na tepichikana anain maʼin aʼyatawaa nümüin otta nümüin chi Nüchonkai. Püleeja Eclesiastés 11:9–12:1; Mateo 19:13-15 otta 21:15, 16.

5. ¿Kasa talateetka atuma naaʼin wachonnii?

Aʼyataainjana na wayuukana süpüla naapüinjatüin namüin nachonnii tü neküinjatkat, tü nepiainjatkat otta tü nasheʼinjatkat (1 Timoteo 5:8). Nnojotsü naaʼinrajatüin neʼe tia, nekirajüinjana naya süpüla alin napüla Maleiwa otta süpüla nashatüin tü nukuwaʼipakat (Éfeso 6:4). Aijeechi Maleiwa napüla na wachonniikana aire nia wapüla. Eesü süpüla anain tü jülüjakat naaʼin nekirajünüle sünain tü Wiwüliakat. Püleeja Deuteronomio 6:4-7 otta Proverbios 22:6.

Watalateʼerüinjatü naaʼin na wachonniikana weʼrüle naaʼinrüin kasa anasü. Wachiajaainjana naya otta wanoukteʼerüinjatü nakuwaʼipa. Waaʼinrüle tia, nnojoleerü naaʼinrüin tü kasa amojujeetkat nakuwaʼipa (Proverbios 22:15). Nnojotsü müliainjatüin naaʼin watuma wachiajaapa naya. Püleeja Colosas 3:21.

Wainma tü karaloukta nashajakat namüin na kachonshiikana otta namüin na tepichikana na aküjüliikana pütchi nüchiki Jeʼwaa. Tia karalouktakalüirua, suluʼujeejatü shia tü Wiwüliakat. Püleeja Salmo 19:7, 11.