Wanee kasa nnojotpuʼuka atüjaanüin aaʼu

¿Aküjünüirü pümüin wanee kasa nnojotpuʼuka pütüjaain aaʼu paala?...a Aashajaasü tü Wiwüliakat süchiki wanee kasa nnojotka atüjaanüin aaʼu paala. Müsü shia: «Nnojotsü atüjaanüin aaʼu paala süchiki nukuaippa Maleiwa sünain aluwatawaa». Nnojoishi eein wanee wayuu atüjaakai saaʼu tia. Akaʼaya na aapieekana, keeʼireesü naaʼin natüjaain saaʼu. ¿Jama piakai? ¿Keeʼireesü paaʼin pütüjaain saaʼu?...

Wainmairü juya alataka süchikijee nukumajüin Maleiwa chi wayuukai otta tü wayuukot. Adán nünülia chi toolokoi otta Eva sünülia tü jietkat. Nüsülajaka Maleiwa namüin wanee mma anasü maʼin eeinjanale naya kepiain. Edén sünülia tü apainkat. Mapa, nnojoishii jaa müin naya nümüin Maleiwa. Makalaka nnojoliin piʼrüin naya yaa waʼaka sümaa nachonnii. Nnojoluitpa tü apainkat. ¿Sotusü paaʼin tü kasa mojusü naainjakat?...

Nnojoishi jaa müin Adán sümaa Eva nümüin Maleiwa. Makalaka ouktüin naya otta nnojoluitpain piʼrüin tü paʼaraiisükat. Ayateeria anain maʼin tü Mmakat nutuma Maleiwa. Kepieena waya wapüshuaʼa suluʼu sümaa talatüin waaʼin otta nnojoleena ouktüin waya. ¿Jameerü sukuwaʼipa nutuma Maleiwa? Nnojotpuʼusü atüjaanüin aaʼu tia natuma na wayuukana.

Wanaa sümaa yaajachin Jesuu naʼaka na wayuukana, yootushi nia namaa süchiki tü kasa nnojotpuʼukalü atüjaanüin aaʼu. Shia naashajaaka achiki nukuwaʼipa Maleiwa sünain aluwatawaa. Naashin Jesuu, oʼuraajüinjana na wayuukana süpüla nuʼttüinjachin Maleiwa sünain Aluwatawaa. Süntapa kaʼikat tia, paʼaraiiseerü tü Mmakat otta aneerü maʼin shia süchikuaʼa.

¿Keeʼireesü paaʼin pütüjaain saaʼu tü kasa nnojotpuʼukalü atüjaanüin aaʼu?... Soto paaʼin wanee kasa: nayainjana neʼe kepiaka suluʼu tü Paʼaraiisükat na wayuu jaa makana nümüin Jeʼwaa. Aashajaasü tü Wiwüliakat nachiki wainma tooloyuu otta jieyuu jaa makana nümüin Jeʼwaa. ¿Keeʼireesü paaʼin pütüjaain aaʼu jaraliin naya?... Wekirajaa nanain süpüla washatüinjatüin nakuwaʼipa.