¿Kasa paaʼinrajatka süpüla naʼaleewain pia Maleiwa?

1, 2. ¿Jaralii noʼutku na wayuu naʼaleewainkana Jeʼwaa?

¿JARAI püneekakai süpüla paʼaleewain? Aashin niain wanee wayuu eekai anain nüshoʼu pümüin, eekai kamaneein otta eekai anain nukuwaʼipa poʼuluʼu.

² Nüneeküin Jeʼwaa waneinnua wayuu süpüla naʼaleewainjanain naya. Noʼutku naya wayuukana nia Abraham (Isaías 41:8; Santiago 2:23). Jee müshia David, naʼaleewain nia Maleiwa. Nüküjain Jeʼwaa anashaatain nukuwaʼipa David (Aluwataaushikana [Hechos] 13:22). Otta kojutushaatashi Daniel nümüin Jeʼwaa (Daniel 9:23).

3. ¿Jamüshi aleewaka Jeʼwaa nümaa Abraham, David otta Daniel?

³ ¿Jamüshii nüneekaka Jeʼwaa Abraham, David otta Daniel süpüla naʼaleewain naya? Müshi Jeʼwaa nümüin Abraham: «Jüüjüüshi pia sümüin tü taluwataakalü anain pia» (Génesis 22:18, TNM). Aleewashi Jeʼwaa namaa na wayuu nnojoliikana yaletüin aaʼin, na oonookana sümaa nünüiki otta eeshii süpüla naʼaleewain watta naalii wayuu. Anuu nünüiki Jeʼwaa sümüin tü pueulokot Israel: «Joonoo sümaa tanüiki, Jümaleiwaseechi taya otta tapueuloseena jia» (Jeremías 7:23). Aleeweechi pia nümaa Jeʼwaa poonoole sümaa nünüiki.

NÜKAALIIJAIN JEʼWAA NA NAʼALEEWAINKANA

4, 5. ¿Kasa naaʼinraka Jeʼwaa süpüla nükaaliijain na naʼaleewainkana?

⁴ Süküjain tü Wiwüliakat nüchajaain sukuwaʼipa Jeʼwaa süpüla nükaaliijain chi wayuu aaʼinrakai tü kasa anasü «nüchekakat nüpüleerua, je naapüin nünüiki wanaa sümaa nüchuntüin nümüin» (1 Pedro 3:12). Saashin Salmo 32:8, kekiijeenain nutuma Jeʼwaa na naʼaleewainkana otta nüküjain namüin tü naaʼinrajatkat süpüla anain nakuwaʼipa.

⁵ Eeshi wanee waʼünüü pülashi, nükayaleʼereein waya nuulia Maleiwa. Nükaaliijapejeʼe waya Jeʼwaa (paashajeʼera Salmo 55:22). Süka naʼaleewain waya Jeʼwaa, aʼyataashii waya nümüin süka süpüshuaʼa waaʼin otta waneepiashii waya nümaa, jaʼitairü kasain alatüin wamüin. Weʼitaain maʼin waaʼin nünain Jeʼwaa maʼaka naaʼin chi aluwataaushikai Pablo. Anuu nünüiki nüchiki Jeʼwaa: «Nia teenakaka chi Maleiwakai süpüla nükaalinjain taya. Nnojoleechi taya mmolüin» (Hebreokana 13:6). ¿Kasa naaʼinraka Satanaa süpüla nnojoliinjanain naʼaleewain waya Jeʼwaa?

AKÜJASHI ALAWAA SATANA SÜCHIKI WAYUU

6. ¿Kasa nüküjaka Satanaa nachiki na wayuukana?

⁶ Wekirajaaitpa anain suluʼu ekirajaaya 11 niʼrüijaain wayumüin Satanaa nümüin Jeʼwaa otta nüküjain alawaa nüchiki. Naashin Satanaa mojulaashi Jeʼwaa süka nnojoluin nuuʼulaain Adán sümaa Eva naneeküin süka naaʼin namüiwaʼa tü kasa anakat jee tü kasa mojukat. Aküjünüsü suluʼu tü karaloʼutakat Job nüküjain Satanaa alawaa nachiki na wayuu aleeweekana nümaa Maleiwa. Nüküjain Satanaa naʼyataain na wayuukana nümüin Maleiwa süka anain nakuwaʼipa nutuma, nnojotsü shiain saaʼujee alin nia napüla. Naashin Satanaa, eesü süpüla numojujeʼerüin saaʼin wayuu eekai eein süpüla shiʼrülüin wayumüin nümüin Maleiwa. Wekirajaa süchiki tü kasa watüjakat nünainjee Job otta tü naaʼinrakat Jeʼwaa süpüla nükaaliijain nia.

7, 8. (1) ¿Jamüsü nünüiki Jeʼwaa nüchiki Job? (2) ¿Kasa nüküjaka Satanaa nüchiki Job?

⁷ ¿Jarai chi Job münakai? Nia wanee wayuu nümaiwajachi, eetaairü maʼaka 3.600 juya alataka süchikijee yaajachin nia mmapaʼa. Kataiwaʼaya noʼu Job nüküjain Jeʼwaa nnojoluin eein wanee wayuu eekai müin aka naaʼin yaa mmapaʼa. Kojutushi maʼin Jeʼwaa nümüin Job otta nülerajüin tü kasa mojusükat (Job 1:8). Aleewashi maʼin Jeʼwaa nümaa Job.

⁸ Nüküjain Satanaa niʼyataain Job nümüin Maleiwa süka anain nukuwaʼipa nutuma. Anuu nünüiki Satanaa nümüin Jeʼwaa: «Paaʼinmajüin nia, tü nipiakat otta süpüshuaʼa tü kasa nümaʼanakat. Anasü putuma sukuwaʼipa tü kasa naainjakat, awainmalaasü maʼin tü nümüʼünüinkat putuma. Anasü pajaʼlajeʼerüle süpüshuaʼa tü kasa nümaʼanakat piʼrajaʼalaataajeetka mojuin nünüiki pümüin» (Job 1:10, 11).

9. ¿Kasa nuuʼulaaka Jeʼwaa naainjain Satanaa nüka Job?

⁹ Naashin Satanaa aʼyataashi Job nümüin Jeʼwaa süka anakuwaʼipalin nia nutuma. Nüküjain Satanaa eein süpüla nuuʼuleʼerüin Job suulia aʼyatawaa nümüin Jeʼwaa. Mayaainjeʼe nütüjaain aaʼu Jeʼwaa alawaain tü nümakat Satanaa, nuuʼulaain nia süpüla nuuʼulaküin naaʼin Job. Mayaa, atüjaanajatü aaʼu shiimainre niʼyataain Job nümüin Maleiwa süka alin nia nüpüla.

OOʼULAKÜNA AAʼINCHI JOB NUTUMA SATANAA

10. (1) ¿Kasa naaʼinraka Satanaa süpüla nuuʼulaküin naaʼin Job? (2) ¿Kasa naaʼinraka Job sutuma tü alatakat nümüin?

¹⁰ ¿Kasa naaʼinraka Satanaa süpüla nuuʼulaküin naaʼin Job? Aʼluwajünüsü süpüshi nümüʼünüin Job otta outusü tü apütaakat. Süchikijee tia, oʼutinnaa aaʼinchii nutuma Satanaa noʼutku na aʼyataakana nümüin Job. Ajaʼlajaasü süpüshuaʼa tü kasa nümaʼanajatkat Job. Süchikijee tia, nüntirüin Satanaa wanee wawai nanainmüin na polooshiikana nüchonnii Job, outakalaka naya sutuma. Mayaainjeʼe sülatüin tia nümüin Job, ayatüshi nia waneepiain nümaa Jeʼwaa, nnojoishi «kaainjalain Job, nnojoishi niʼitaain Jeʼwaa sünain niain kasirüin tü kasa mojusü alatakat nümüin» (Job 1:12-19, 22).

11. (1) ¿Kasa maa naaʼinraka Satanaa süpüla nuuʼulaküin naaʼin Job? (2) ¿Kasa naaʼinraka Job sutuma tü alatakat nümüin?

¹¹ Ayatüsia nüchajaain sukuwaʼipa Satanaa süpüla niʼrülinjachin wayumüin Job nümüin Jeʼwaa. Anuu nünüiki Satanaa niʼipajee Maleiwa: «Paainja kasa mojusü nümüin otta müliaa naaʼin putuma, piʼrajaʼalaataajeetka mojuin nünüiki pümüin». Ayuuijaakalaka Job nutuma Satanaa, aisü maʼin tia ayuuliikat (Job 2:5, 7). Ayatapejeʼe waneepiain Job nümaa Jeʼwaa. «Jaʼitaichi outuin taya, ayatajachia neʼe taya nümaa Jeʼwaa» müshi nia (Job 27:5).

12. ¿Kasa naaʼinraka Job süpüla sütüjaanüin aaʼu alawaain tü nüküjakat Satanaa?

¹² Nnojotsü nütüjaain aaʼu Job tü nüküjakat Satanaa nüchiki otta kasanainjeein müliain atumaa nia. Alejachia nia nutuma Jeʼwaa naaʼinruʼu (Job 6:4; 16:11-14). Mayaainjeʼe sülatüin tia nümüin Job, ayatüshia waneepiain nia nümaa Jeʼwaa. Sütüjaanaka aaʼu niʼyataain Job nümüin Jeʼwaa süka süpüshuaʼa naaʼin, nnojotsü shiain sutuma tü kasa naapakat Jeʼwaa nümüin. Aleewashi nia nümaa Jeʼwaa süka alin nia nüpüla. Alawaa süpüshuaʼa tü nüküjakat Satanaa nüchiki Job.

13. ¿Kasa anasü niʼraka Job sutuma waneepiain nia nümaa Jeʼwaa?

¹³ Mayaainjeʼe nnojoluin nütüjaain aaʼu Job müliain nia süka nujuyaajünüin Jeʼwaa nutuma Satanaa, ayatüshia waneepiain nia nümaa Maleiwa. Sutuma tü naaʼinrakat Job, atüjaana aaʼuchi mojulaain maʼin Satanaa. Anakuwaʼipaishi Job mapa nutuma Jeʼwaa süka waneepiain nia nümaa (Job 42:12-17).

AKÜJASHI SATANAA ALAWAA WACHIKI

14, 15. ¿Jamüshii naʼyataaka na wayuukana nümüin Jeʼwaa naashin Satanaa?

¹⁴ Wainma tü kasa watüjakalü aaʼu sünainjee tü alatakat nümüin Job. Aküjashi Satanaa alawaa maaʼutpünaa nachiki na aʼyataashiikana nümüin Maleiwa. Nüküjain Satanaa waʼyataain nümüin Maleiwa süka anain wakuwaʼipa nutuma. Müshi Satanaa: «Naapeerü chi wayuukai süpüshuaʼa tü kasa nümaʼanakat süpüla katüin noʼu» (Job 2:4). Naashin Satanaa, aʼyataashii napüshuaʼa na wayuukana nümüin Maleiwa sutuma tü kasa naapakat namüin, nnojoishi niain neʼe Job chi nüküjakai achiki alawaa. Mayaainjeʼe kakaliaichin outuin Job, ayatayüiya Satanaa aküjain alawaa nüchiki Jeʼwaa otta nachiki na aʼyataashiikana nümüin. Müshijeseʼe nümüin Jeʼwaa suluʼu Proverbios 27:11: «Kekii maʼin pia tachonchee otta pütalateʼera taaʼin süpüla tasoutuinjachin niʼipajee chi ojuyaajakai taya».

¹⁵ Eeshi süpüla püneeküin piʼyataain nümüin Jeʼwaa otta aleewain pia waneepia nümaa. Paaʼinrüle tia, atüjaaneerü aaʼu alawaain tü nümakat Satanaa. Mayaainjeʼe kapüleejeerüin pümüin punouteʼerüin wainma kasa sünain pukuwaʼipa shia alanaʼaleeka sünain anain aleewa nümaa Jeʼwaa, nnojotpejeʼe ashaitaain tia, süka jamüin, naashin Satanaa nnojoleechi pia waneepiain nümaa Jeʼwaa müleka sülatüle kasa mojusü pümüin. Nüchajaain sukuwaʼipa Satanaa süpüla nnojoliinjanain woonooin sümaa nünüiki Maleiwa. ¿Jamüsü sukuwaʼipa tia nutuma?

16. (1) ¿Kasa naaʼinraka Satanaa süpüla nnojoluin shiʼyataain wayuu nümüin Jeʼwaa? (2) ¿Kasa eeka süpüla naaʼinrüin chi Yolujaakai süpüla nükayaleʼerüin pia nuulia Jeʼwaa?

¹⁶ Wainma kasa naaʼinraka Satanaa süpüla nnojoluin aleewain waya nümaa Maleiwa. Eesü nushutule waaʼu maʼaka naaʼin «wanee wasashi» (1 Pedro 5:8, TNM). Eejeena paʼaleewainyuu otta noʼutku na püpüshikana eekai nuuʼuleʼereein pikirajaain sünain tü Wiwüliakat otta mojule namüin paaʼinrüin tü anakat noʼuluʼu Maleiwa. Müsü sushutunakai paaʼin sutuma tia (Juan 15:19, 20).a Eesü nuuʼulaküle Satanaa «nakuaippa na aapiee chajeʼewaliikana eejee Maleiwa shiiʼiree wanoujeein nünüiki». Nimeejeein waya shiiʼiree moonooloin waya nümaa Jeʼwaa (2 Corinto 11:14). Naashin Satanaa nnojoleechi talatüin Jeʼwaa watuma, jaʼitaina waʼyataain maʼin nümüin Jeʼwaa. Naaʼinrüin tia süpüla nükayaleʼerüin waya nuulia Jeʼwaa (Proverbios 24:10).

PAAʼINRA TÜ NULUWATAAKALÜ ANAIN JEʼWAA

17. ¿Jamüshii woonooka sümaa nünüiki Jeʼwaa?

¹⁷ Woonoole sümaa nünüiki Jeʼwaa atüjaaneerü aaʼu alaain Satanaa. ¿Kasa waaʼinrajatka süpüla woonooin sümaa nünüiki Jeʼwaa? Müsü tü Wiwüliakat: «Alinjachi püpüla Jeʼwaa süka süpüshuaʼa paaʼin, süka süpüshuaʼa pukuwaʼipa otta süka süpüshuaʼa pütsüin» (Deuteronomio 6:5). Oonooshii waya nümaa Jeʼwaa süka alin nia wapüla. Miyoʼule naalin Jeʼwaa wapüla, keeʼireejeerü maʼin waaʼin waaʼinrüin tü nuluwataakalü anain. Müshi chi aluwataaushikai Juan: «Müleka waaʼinrüle tü nuluwataakat anain waya chi Maleiwakai, shiimüin alin nia wapüla. Je tü nuluwataakat anain waya, nnojotsü isain wachiki. Wounteerü waaʼinrüin süka nüchooin waya» (1 Juan 5:3).

18, 19. (1) Püküja süpüshi tü kasa mojukat nümüin Jeʼwaa. (2) ¿Jamüsü wayaawataka saaʼu nnojoluin nuchuntuin Jeʼwaa wamüin wanee kasa eekai isain wachiki?

¹⁸ Eesü tü kasa mojukat nümüin Jeʼwaa. Paashajeʼera süpüshi tia suluʼu tü pütchikat «Jüleraja tü kasa nülerajakat Jeʼwaa». Eesüjaʼa jülüjale paaʼin nnojoluin mojuin maʼin tü kasa mojukat nümüin Jeʼwaa. Pikirajaale sünain tü sümakat tü Wiwüliakat süchiki tü kasa nülerajakat Jeʼwaa otta püsakireʼerüle paaʼin sünain, piyaawateerü aaʼu anain maʼin poonoole sümaa tü nümakat Maleiwa. Eesüjaʼa süpüla piyaawatüin saaʼu punouteʼerüinjatüin pukuwaʼipa, jaʼitairü kapüleein pümüin paaʼinrüin shia. Punouteʼerüle pukuwaʼipa, jimateerü paaʼin otta talateerü paaʼin süka naʼaleewainjeechin pia Jeʼwaa (Isaías 48:17, 18). ¿Eesüche süpüla wountuin wanouteʼerüin wakuwaʼipa?

¹⁹ Nnojotsü nuchuntuin Jeʼwaa wamüin wanee kasa eekai isain wachiki (Deuteronomio 30:11-14). Waʼaleewain maʼin nia otta niʼraajüin maʼin tü wakuwaʼipakat. Nütüjaa aaʼu Jeʼwaa tü anakat jee tü mojukat watuma (Salmo 103:14). Müshi chi aluwataaushikai Pablo: «Wanaa sümaa juuʼulakünüin aaʼin, pansaasü nünüiki chi Maleiwakai jümüin süpüla nükaaliijeenain jia. Juunteerü jüchecheruin jaaʼin suʼunnaa tia, süka niiʼiyateerüin jümüin sünain jamüinjatüin jujuittia saʼakajee» (1 Corinto 10:13). Weʼitaain maʼin waaʼin sünain nükaaliijeenain waya Jeʼwaa süpüla waaʼinrüin tü kasa anasükat. Otta yalayaleechi pia nutuma Jeʼwaa süpüla püchecherüin paaʼin soʼunnaa müliaa (2 Corinto 4:7). Akaaliijünüshi Pablo nutuma Jeʼwaa wanaa sümaa niʼrüin müliaa. Müshijeseʼe nümüin Pablo: «Tachecherüin taaʼin soʼunnaa tü alatakat tamüin süka katsüin taaʼin nutuma chi akatsüinrakai taaʼin» (Filipos 4:13, TNM).

KOJUTA PÜMÜIN TÜ ANAKAT NÜMÜIN MALEIWA

20. ¿Jarat tü nukuwaʼipakat Jeʼwaa washatajatka? ¿Jamüsü waaʼinrajatka shia?

²⁰ Aleeweere waya nümaa Jeʼwaa, wooʼulaainjatü suulia waaʼinrüin tü kasa nülerajakat. Eepejeʼe waneirua kasa waaʼinrajatka (Roma 12:9). Na naʼaleewainkana Maleiwa kojutusü namüin tü kasa anakat nümüin Maleiwa. Nashatüinjatü nukuwaʼipa Maleiwa sünain alinjatüin wayuu napüla, talatüinjatü naaʼin, jimatüinjatü naaʼin, atüjainjana aʼatapajaa, kamaneeinjana naya, aaʼinrüinjana kasa anasü, kanoulainjana, anamiainjana otta nachecherüinjatüin naaʼin (Galacia 5:22, 23). Süpüla pütüjaain saaʼu tü naaʼinrajatkat na naʼaleewainkana Maleiwa, paashajeʼera Salmo 15:1-5.

21. ¿Kasa paaʼinrajatka süpüla püshatüin nukuwaʼipa Jeʼwaa?

²¹ Süpüla püshatüinjatüin nukuwaʼipa Jeʼwaa, piyaawatüinjatü aaʼu tü kasa anakat noʼuluʼu. Puunteerü tia paashajeʼerüle tü Wiwüliakat weinshi jee pikirajaʼawaire sünain (Isaías 30:20, 21). Paaʼinrüle tia, aijeechi maʼin püpüla Jeʼwaa otta keeʼireejeerü paaʼin oonowaa sümaa nünüiki.

22. ¿Kasa atüjaaneetka aaʼu müleka ayatüle ichein wanoula?

²² Tü paaʼinrajatkat süpüla shiiʼiranajaain pukuwaʼipa müinjatü aka saaʼin piiʼiratüle wanee püsheʼin eekai laülaain süpüla paʼatüin wanee jeketü. Süküjain tü Wiwüliakat sünain weeʼiranajaainjatüin tü wakuwaʼipakat süpüla suʼwanajaainjatüin shiʼipaʼaya (Colosas 3:9, 10). Wainmeerü kasa anasü naapeetka wamüin Jeʼwaa woonoole sümaa nünüiki jee weeʼiratüle wakuwaʼipa, jaʼitairü kapüleein shia wamüin (Salmo 19:11). Poonoo sümaa nünüiki Jeʼwaa, paaʼinrajatü tia süka alin nia püpüla süka süpüshuaʼa paaʼin, nnojotsü shiainjatüin saaʼujee tü kasa anasü naapeetkat pümüin. Paaʼinrüle tia, atüjaaneerü aaʼu alaain Satanaa otta aleeweechi maʼin pia nümaa Jeʼwaa.