ASAKIRAA 5

¿Kasache taaʼinrajatka mojulaale tamüin na tepichikana?

¿JAMÜSÜ PÜTÜJAAINJATKA SAAʼU TIA?

Süka eein süpüla sunouktaain jee mojuleein pukuwaʼipa sutuma tü paaʼinrakat.

¿KASAJEʼE PAAʼINRAKA?

Anuu tü alatakat nümüin Lucas: Nnojoishi oʼuneein nia piantua sünain koleejia. Aküjünüsü wanee perulaa nüchiki natuma na nukonpayeetsekana. Kanüliayaashi nia natuma. Eeshi nujutapünaanüle achiki sümaa suʼwalakajaanüin nükaraloukse. Eeshi nujunaanüle achiki. Shiasaʼa niirakaapa namüin, moʼuyaasalii nuulia. Aliikainka, eimmolojunüshi nia suluʼupünaa Internet...

¿Kasajeʼe paainjaka sülatüle pümüin tia?

JÜLÜJA PAAʼIN TÜÜ

Eesü tü kasa anakat süpüla paaʼinrüin. Eeshi süpüla eejiraain pia sümaa nnojolin pütkaain. ¿Kasa paaʼinrajatka?

PIIRAKAA NEʼE NAKA. «Chi wayuu malakai, kaashichijaarai; akaisaʼa chi wayuu kekiikai maʼin, nüchecherüin naaʼin», müsü tü Wiwüliakat (Proverbios 29:11, TNM). Müleka nnojorüle paashichijaain namüin, eeshii süpüla nakulajaain aaʼin pünainjee na mojulaakana pümüin.
NNOJO PASALAWEEIN PIA. «Müleka mojulaale wane wayuu jümüin, anakaja müleka jiirakaale nüka. Nnojo mojulaain jia niʼipajee», müsü tü Wiwüliakat (Roma 12:17). Pasalaweere pia mojuleejeeria maʼin pukuwaʼipa.
JALIA PIA NOULIA. «Chi wayuu kekiikai maʼin oʼunüshii suulia tü kasa mojusükat», müsü tü Wiwüliakat (Proverbios 22:3, TNM). Puʼuna noulia na tepichi mojulaakana pümüin jee piʼrüle saainjüneein kasa mojusü pümüin.
ANA PUSOUKTIA NAMÜIN. «Oʼunüsü tü jashieekat wasouktüle süka pütchi analuʼut», müsü tü Wiwüliakat (Proverbios 15:1, TNM). Eeshi süpüla pusouktüin namüin sümaa müin pimeeʼerajaakai aaʼin. Naküjüle pümüin kaleʼulein maʼin pia, eeshi süpüla püsanaʼlüin jee pümüin: «Shiimainsaʼaya, aainjeeshi neʼe taya ejercicio».
PUʼUNA YALEJEE. Anuu sünüiki Nora, 19 suuyase: «Nnojorüle pusounnajaain, piiʼiyatüin laülaain paaʼin jee püchecherüin paaʼin. Tia, shia wanee akuwaʼipaa nnojotka eein nanain na tepichi mojulaakana pümüin» (2 Timoteo 2:24).
PIIʼIYATA YALAYALAIN PAAʼIN. Na mojulaakana pümüin natüjaa aaʼu jaraliin na malayaakana aaʼin. Akaisaʼa nnojoleechin pia jooin napüla müleka neʼrüle yalayalain paaʼin.
PÜKÜJA NACHIKI. Anuu sünüiki wanee ekirajapuʼusü tepichi: «Saaʼin tamüin, anasü süküjünüle nachiki na tepichi mojulaakana suluʼu koleejia. Shia waaʼinrajatka tia süpüla nnojoluinjatüin jaralüin müliain natuma.

Wanee jintüi yalayalasü naaʼin nooʼomüin wanee mojulaashi nümüin — Yalayalale paaʼin nnojoleechi pia jooin napüla na mojulaakana pümüin.

PÜTÜJAAINJATKA AAʼU

¿Kasa maa naaʼinraka na tepichi mojulaakana pümüin?

Airuʼutsü nanüiki pümüin. Anuu sünüiki Celine, 20 suuyase: Nnojotsü süpüla motuinjatüin taaʼin airuʼuluin nanüiki na tepichi mojulaakana tamüin. Mojushantasü taaʼin natuma. Sutuma tia, müsü nnojotkai kasain anain apüla taya. Aireesia tamüin suulialeʼeya saalii soʼu wanee wayuu süsheʼetünüle».
Nnojoishi pia namaweein. Anuu sünüiki Haley, 18 suuyase: «Nnojotsü taya namaweein na takonpayeetsekana. Taikkalaweere namaa sünain ekawaa, nayouktüin namaain taya. Jaʼitairü eein einasee tapüla. Sutuma tia, aʼyalajawaisü taya waneepia jee ekaasü neʼe taya tamüiwaʼa».
Neimmolojuin pia suluʼupünaa Internet. Anuu nünüiki Daniel, 14 nuuyase: Nnojotsü shaittaain neʼe tü ashajünakat suluʼupünaa Internet. Eesü süpüla sumojujaain nukuwaʼipa wanee wayuu sutuma».

**¿JAMÜSÜ SAAʼIN PÜMÜIN?**
SHIIMAIN JEE ALAWAA	SUSOUKTIA
1 Eetüjüliʼiya namaiwa na wayuu mojulaakana.	1 Shiimain. Saashin tü Wiwüliakat eejana namaiwa waneeinnua mojulaashii, nefilim münüshii naya. «Ojuttirülii wayuu» maluʼulu tia pütchikat (Génesis 6:4).
2 Shaittaa neʼe tü kanüliakat bullying. Nnojotsü mojuin.	2 Alawaa. Wainma tepichi oʼutiraaka naaʼin sutuma tü kanüliakat bullying.
3 Tü anakat namüin na mojulaakana pümüin shia pütkaain namaa.	3 Alawaa. Eeshii katsüinre maʼin na tepichi mojulaakana pümüin; nnojotsü anain pütkaale namaa.
4 Piʼrüle müliain atumawaa wanee jintüi, nnojotsü püküjüinjatüin nachiki na tepichi mojulaakana.	4 Alawaa. Wanaawashi pia namaa na tepichi mojulaakana pümüin nnojorüle püküjüin nachiki.
5 Eesü toolole maʼin naaʼin na tepichi mojulaakana süpüla nnojoluinjatüin jaʼyain naaʼu nnojoluin yalayalain naaʼin.	5 Shiimain. Mayaapejeʼe müin yaletakai maʼin naaʼin na tepichi mojulaakana, nnojotsü yalayalain naaʼin; eʼrüshii wayumüin namüin na waneeinnua shiiʼiree aneein naaʼin.
6 Eeshii süpüla nooʼulaain suulia mojulawaa na tepichi mojulaakana.	6 Shiimain. Eeshii süpüla nooʼulaain suulia mojulawaa na tepichi mojulaakana nakaaliinjünüle natuma na waneeinnua.