Ooʼulaküna aaʼinrü nunoula Abrahán

Ekirajünüshi Isaac nutuma Abrahán süpüla alinjachin Jehová nüpüla otta süpüla nunoujain sünain tü nümakat Jehová. Wanaa sümaa 25 nuuyase Isaac, aluwataanüshi Abrahán nutuma Jehová sünain aaʼinraa wanee kasa. ¿Kasache nuluwataaka anain nia?

«Anakajaʼa jooluʼu pümaale chi püchon waneeshikai chamüin suluʼumüin tü mmakat Moria. Puʼuteechi aaʼin nia chamüin», müshi Jehová nümüin Abrahán. Oonooshi Abrahán sümaa nünüiki Jehová mayaainjeʼe nnojoluin nütüjaain saaʼu jamüin nuchuntaka tia.

Waneemüin kaʼi, nütamaaka Abrahán wattaʼa maalü, nümaaka Isaac namaa piamashii nüchepchia Moriamüin. Apünüinpa kaʼi naya sünain oʼunaa, neʼraka tü uuchikat wattajee. «Chajeeinjachi paala taya ooʼulaka chi tachonkai süpüla waʼwaajüinjachin chi Maleiwakai. Yaashiʼiya jia wapüla», nümaka Abrahán namüin na nüchepchiakana. Naapaka Abrahán tü sikikat nümüin Isaac otta niaka alüʼüjain tü rüikat. «¿Jalasü tü mürüt waʼajüinjatkat nümüin Jehová?», nümaka Isaac. «Naapeerü wamüin Jehová, tachonchee», nümaka Abrahán nümüin.

Nantapa saaʼumüin tü uuchikat, nüpaaʼuwajaakalaka Abrahán ipa. Kapükalaka nutuma chi nüchonkai, kaülajüsü nuuʼui nutuma sümaa najapü otta niʼitaaka nia saaʼu tü ipakat.

Naapaaka Abrahán tü rüikat süpüla nusotuinjachin chi nüchonkai. Nusoutaka wanee aapiee nümaʼanajeejachi Jehová: «Nnojo puʼutuin naaʼin chi püchonkai, tatüjaaichipa aaʼu kanoulain maʼin pia nünain Maleiwa». Niʼraka Abrahán wanee anneerü toolo koʼooshi süka nuʼuwa saʼaka sütüna wunuʼu. Nüjüta nüma achikichi joo chi nüchonkai, niakalaka nuʼutuin aaʼin chi anneetkai niiʼiraka Isaac.

Soʼujeʼereeya tia «taʼaleewain», müshi Jehová nümüin Abrahán. ¿Pütüjaa aaʼu jamüin makaʼa nünüiki? Süka naaʼinrüin süpüshuaʼa tü nümakat Jehová, mayaainjeʼe nnojoluin nütüjaain saaʼu jamüin nuchuntaka tia.

Nüpansaajaka süchikuaʼa nünüiki Jehová nümüin Abrahán: «Watteerü saalii puuʼuliwoʼu tatuma. Iseerü achiki ayaawajünaa, süka wainmeerüin maʼin shia». Tü nüküjeekalü achiki Jehová shia aneerüin sukuwaʼipa wayuu süpüshuaʼa sünainjee nüpüshi Abrahán.