Aapünüsü apaalaa nümüin Jacob

Wanaa sümaa nuʼwayuusein Isaac Rebeca 40 nuuyase. Aisü maʼin shia nüpüla. Kachonsü shia senkeyuu, piamashii tooloyuu.

Esaú nünülia chi epayaakai otta Jacob chi emülieekai. Kamalainsü nümüin Esaú chain nia wünaʼapü otta atüjashi maʼin nia olojoo. Aluʼusaʼa Jacob wayuu miichaajuchi.

Soʼu tia, miyoʼuwai mma otta wainmawai nneerü aapünaka nümüin chi epayaakai outapa chi nüshikai. «Apaalaa», münüsü tia. Tü apaalaa apütünakat sümüin nüpüshi Isaac shia süpüshi tü kasa nüküjakalü achiki paala Jehová nümüin Abrahán. Nnojotsü jamajatüin nümüin Esaú tia. Aluʼusaʼa Jacob, kojutusü nümüin.

Soʼu wanee kaʼi, mapüsashi maʼin Esaú süchikijee olojoo. Naataka seejuu nutse Jacob: «¡Outushi maʼin taya jamü! ¡Ichee teküin süpüshi türa kisaawa ishosükot!», nümaka nümüin Jacob. «Püküja tamüin paapeerüin tü apaalaa aapünajatkat pümüin», nümaka Jacob nümüin Esaú. «¡Nnojotsü jamajatüin tamüin tia apaalaakat! Pieechi kamüinka. Ekeeshi neʼe taya», nümaka Esaú. ¿Anasüche saaʼin pümüin tü naainjakat Esaú? Nnojo, nnojotsü anain. Mojutusat nümüin tia apaalaakat süpüleerua neʼe eküülü.

Laülaapa Isaac, naapüinjatü joo wanee anaa nümüin chi niʼirumakai. Shiasaʼa Rebeca, sükaalinjaka Jacob süpüla niainjachin aapünüin amüin tia mayaainjeʼe emülieein nia. Naashichijaaka Esaú nütüjaapa saaʼu tia, nuʼuteeka naaʼin chi nimüliakai. Aaʼinmajüneeshi Jacob nutuma Isaac sümaa Rebeca. «Anashi chale pia nümaʼana Labán chi püʼlaülakai, suwalakai tü piikat, aleʼejeechi pia nnojoitpa jashichin Esaú», namaka nümüin. Jaa müshi Jacob sümüin nünüiki nüshi jee nii, nuʼunaka suulia nuʼutunuin aaʼin nutuma chi nipayakai.