Eʼrüijaashii naya wayumüin nümüin Jehová

Sülatapa kojuya juya chaiwaʼaya na israelitakana isashiipaʼa, eʼrüijaashi wayumüin Coré nümüin Moisés, akaʼaya Datán, Abiram otta na 250 wayuu namaajanakana. Anuu nanüiki nümüin Moisés: «¡Akulajaaitpa waaʼin jümaa! ¿Jamüshi pülanaweekaʼa waaʼu sünain aluwatawaa? ¿Jamüshi niainjachikaʼa Aarón laülaain napüleerua na sacerdotekana? Nnojoishi eein neʼe Jehová pümaa piakai otta nümaa Aarón, eeshi nia wamaʼaya». Mojushiisü nümüin Jehová tü namakat otta eʼrüijaashii naya wayumüin nümüin.

«Jünta wattaʼa eemüin tü piichi aʼwaajüleekat jee jülüʼüja tü aʼajiakat sümaa tü wunuʼu jemetakat eejuu. Watüjaajeechika aaʼu jaralin nüneeküin Jehová», nümaka Moisés nümüin Coré otta na nümaajanakana.

Shiasaʼa waneemüin kaʼi, outkajaashi Moisés suluʼu tü piichi aʼwaajüleekat nümaa Coré otta na 250 wayuu nümaajanakana; naʼajaka tü wunuʼu jemetakat eejuu. Tia naaʼinrajatü neʼe na sacerdotekana. «Jükatalaa nuulia Coré otta noulia na wayuu nümaajanakana», nümaka Jehová nümüin Moisés otta Aarón.

Nnojoishi chajachin Datán, Abiram otta na napüshikana suluʼu tü miichi aʼwaajüleekat. «Wattaluʼu jia suulia nipia Coré, Datán otta Abiram», nümaka Jehová namüin na israelitakana. Naaʼinramaatüin tia na israelitakana. Yalajachi shaʼwatüin Datán, Abiram otta na napüshikana süʼütpaʼa nepia. Suwakajaaka tü mmakat, shimiratka naya saalinjee neʼrüliin wayumüin. Shiasaʼa chaa suluʼu tü miichi aʼwaajüleekat, achuwajaasü siki iipünaajee jee jotoka Coré otta na 250 wayuu nümaajanakana.

Nümaka Jehová nümüin Moisés: «Püma namüin na laülaakana saaʼu tü poloosükat eʼirukuu nantiraaiwa nawaraaratse. Püshaja nanülia naya laülaashiikana waneʼewai sukua sünain nawaraaratse. Püshajüinjatpajaʼa nünülia Aarón sünain tü waraarat sümüinkat niʼiruku Leví. Piʼitaa süpüshuaʼa suluʼu tü miichi aʼwaajüleekat. Niasaʼa chi wayuu taneeküinjachikai, awüʼiraajeerü nuwaraaratse».

Waneemüin kaʼi, nüsaajüin Moisés nawaraaratse na laülaashiikana sümaa niiʼiyatüin shia namüin. Tü nuwaraaratsekat Aarón awüʼiraasü jee eejatü Almendra sünain. Atüjaanüichipa aaʼu niain Aarón aneekünüin nutuma Jehová süpüla laülaainjachin napüleerua na sacerdotekana.