Kanüisü nüpüliise Balaam

Eetaainna maʼaka 40 juya na israelitakana chaa isashiipaʼa. Wainmairü tü pueulo nashutakalü aaʼu. Chashii joo naya suluʼu tü mmakat Moab, wüinpejeeruʼu sünain tü süchikat Jordán. Alüʼütshii naya süpüla ekerotoo suluʼumüin tü Mma Anasükat. Balac nünülia chi aluwataakai saaʼu Moab. Mmotshi maʼin nia suulia süsütünüin nuulia nuumain. Nasaajirüinjeseʼe wanee wayuu Balaam münüshi süpüla nuʼulejüinjanain na israelitakana.

Anuu nünüiki Jehová nümüin Balaam: «Nnojoishii puʼulejüinjanain na israelitakana». Aʼalijiraashi Balaam suulia oʼunaa Moabmüin. Nimeʼejünaka aaʼin piantua nutuma chi aluwataaikai Balac süpüla nuʼunuinjachin. Nüküjain Balac nümüin naapeerüin nümüin tü kasa nuchuntakat. Niyoutuin Balaam tia. «Eeshi süpüla puʼunuin. Shia neʼe püküjainjatka tü tamüinjatkat pümüin», nümaka Maleiwa nümüin Balaam.

Nuʼunaka joo Balaam saaʼu nüpüliise, wattashi nia uuchimüin. Nikiiruʼusü Balaam nuʼulejüinjanain na israelitakana mayaainjeʼe nüchiaain nia Jehová. Niiʼiyataaka apünüintua wanee aapiee suluʼu tü wopu nuʼunakalü aluʼu Balaam. Nnojoipejeʼe niʼrüin nia Balaam, shia eʼraka nia tü nüpüliisekat, ashunaasü shia saʼakamüin mojuui. Jee mapa, sülainraaka sünain ipairua süsepü miichi jee sootoliraaka mmoluʼu pasanain sünain tü wopukot. Niʼyaatashaatain Balaam tü püliikükat saalinjee tia.

Shiasaʼa mapa, kanüijaasü nutuma Jehová tü püliikükat. «¿Jamüsü piʼyaatakaʼa taya?», sümaka tü püliikükat nümüin Balaam. «¡Wayuu malashi taya paaʼinruʼu müinjachika taya putuma! Eereje wanee chajaruuta tamaʼana, toʼutayülüje aaʼin pia süka», nümaka Balaam. Susoutaka tü püliikükat nümüin: «Kakaliairü taya peʼejenain. ¿Jeʼratuaichi maajüin pia tatuma?».

Niʼraka Balaam chi aapieekai nutuma Jehová. «Nüchiaain pia Jehová suulia puʼulejüinjanain na israelitakana», nümaka chi aapieekai nümüin. «Mojusia tü taaʼinrakat. Aleʼejeechia taya tachikuaʼa tepialuʼumüin», nümaka Balaam. Nusoutaka chi aapieekai nümüin: «Eeshi süpüla puʼunuin Moabmüin. Shiainjatpajaʼa püküjain tü nümakat Jehová pümüin».

¿Oonooshiche Balaam sümaa tü nümakat Jehová? Nnojo. Ayatüsia nüchajaain sukuwaʼipa süpüla nuʼulejüinjanain na israelitakana. Apünüintua naaʼinrüin tia, nnojoipejeʼe nuuʼulaain Jehová naaʼinrüin shia; nüküjirüin Jehová kasa anasü namüin na israelitakana. Ashutushii na israelitakana mapa saaʼu Moab otta oʼutuna aaʼinchi Balaam. Anasüje nukuwaʼipa Balaam noonoole sümaa nünüiki Jehová ¿aashimüin?