Achuntusü Ana nümüin Jehová kachoinjatüin shia

Eejachi wanee wayuu israelita kanüliakai Elcaná, piamasü nuʼwayuuse. Ana sünülia wanee otta Peniná sünülia tü wane. Shia aika maʼin nüpüla Ana. Wainma süchonnii Peniná nümüin, akatsaʼa maralüin Ana, meeʼerapalasü shia waneepia sutuma Peniná. Oʼunawaishi juyawai Elqaná sümaa nüpüshi chaa Siló süpüla naʼwaajüin Jehová suluʼu tü piichi aʼwaajüleekat. Soʼu wanee kaʼi wanaa sümaa chajanain naya Siló, niʼrüin Elcaná mojuin maʼin saaʼin Ana. «Nnojo piʼyalajüin Ana. Anii taya pümaa otta aishaatasü pia tapüla», nümaka sümüin.

Suʼunaka Ana mapa sünain achuntaa nümüin Jehová. Aʼyalajashaatasü sümaa suchuntuin kaalinwaa nümüin Jehová süka süpüshuaʼa saaʼin. «Jehová, müleka paapüle wanee tachon, taapeechi nia pümüin süpüla niʼyataainjachin pümüin süpüla kaʼikat süpüshuaʼa», sümaka Ana nümüin Jehová.

Chi laülaakai napüleerua na sacerdotekana niʼrüin shia sünain aʼyalajaa otta peimatüsü shia. Nüsakitka shia Elí müleka shipeʼrüle. «Nnojo, nnojotsü taya epeʼrüin. Shapaasü maʼin taaʼin saaʼu tü alatakat tamüin, taküjain shia nümüin Jehová», sümaka Ana nümüin Elí. Niyaawataka saaʼu Elí mojuin tü nümakat sümüin. «Kasataalejeseʼe naapüin Jehová pümüin tü puchuntakat nümüin», nümaka sümüin Ana. Anasü saaʼin Ana mapa jee suʼunaka. Maʼaka wanee juya süchikijee tia, kachonsü Ana, Samuel nünülia sutuma. ¡Talatakajasaʼa maʼin saaʼin Ana sutuma kachooin shia!

Shikeraajüin Ana sünüiki nümüin Jehová. Süpütirapa chi joʼuukai, shiʼikajaain nia suluʼumüin tü aʼwaajüleekat süpüla niʼyataainjachin nümüin Maleiwa. Müsü Ana nümüin Elí: «Tachuntuin nümüin Jehová süpüla kachoinjatüin taya, taapüin jooluʼu chi joʼuukai süpüla niʼyataainjachin waneepia nümüin». Oʼunawaishi juyawai Elcaná sümaa Ana sünain anaʼlawaa nümüin Samuel. Akolojowaishii naya nümüin wanee nüsheʼin matünasat. Mapa, naapüin Jehová sümüin Ana apünüinshii süchon tooloyuu otta piamasü jieyuu.