Chi aluwataakai palajana saaʼu Israel

Kekiipüʼüjanashii na israelitakana nutuma Jehová süpüla nuʼunirüin nakuwaʼipa, akanasaʼa naya, achuntushii wanee aluwataai. «Anashi eere wanee wayuu aluwataakai waaʼu maʼaka naaʼin na waneinnua», namaka nümüin Samuel. Nnojotsü anain tia noʼuluʼu Samuel. Nuʼuraajaka nümüin Jehová, nümakalaka Jehová nümüin: «Nnojoishi piain ayoutunuin natuma, taya tayakai chi nayoutakai. Püma namüin eeinjachin wanee wayuu aluwataainjachikai naaʼu, watteerü maʼin saalii tü kasa nuchuntajatkat namüin». Ayatüshii naya sünain maa: «¡Jaʼitairü! Püneeka wamüin wanee wayuu aluwataainjachikai waaʼu».

Nüküjaka Jehová nümüin Samuel niainjachin Saúl chi aluwataainjachikai palajana saaʼu Israel. Wanaa sümaa chajachin Saúl awaraijaain naaʼu Samuel chaa Ramá, niʼyotuin Samuel seita saaʼu nikii Saúl. Tia shiyaawasesü nüneekünüin Saúl süpüla nuluwataainjachin.

Nuutkajeʼeraka mapa Samuel na israelitakana süpüla niiʼiyatüin namüin chi wayuu aluwataainjachikai naaʼu. Nnojoika nantüin nünain Saúl. ¿Jalajaiche nia? Ounjulaashi nia saʼakapünaa süchise wayuu. Neʼrapa nia na wayuukana, ashaʼwaleʼennüshi nia noʼupala. Wayuu miyoʼusenuu nia otta anashi aaʼinchi nia. Nümaka Samuel namüin: «Anii chi nüneekajalakai Jehová». Namaka na israelitakana sümaa emetuluin nanüiki: «Anashi kojutule watuma chi aluwataaikai».

Nuʼttaiwaʼaya Saúl sünain aluwatawaa, jaa müshi sümüin tü nümakat Samuel otta oonooshi sümaa nünüiki Jehová. Amojujaasü nukuwaʼipa mapa. Soʼu wanee kaʼi, nüküjain Samuel nümüin naʼatapajüinjachin nia süpüla naʼajüin mürüt nümüin Maleiwa. Soʼu tia, kamaʼashi Samuel. Naʼajaka Saúl tü mürütkalüirua nümüin Jehová nüpülapünaa Samuel. ¿Kasakaʼa naaʼinrüin Samuel? «¿Jamüshi nnojoikaʼa poonooin sümaa nünüiki Jehová?», nümakalaka Samuel nümüin Saúl. ¿Nütüjaa aaʼuche Saúl noonooinjachin waneepia sümaa nünüiki Jehová?

Oʼunajachi joo Saúl sünain atkawaa namaa na amalequitakana, nümaka Samuel nümüin najaʼlajeʼerüinjatüin wayuu süpüshuaʼa. Akaisaʼa Saúl nnojoishi nuʼutuin naaʼin chi aluwataaikai Agag. «Akayalaashi toulia Saúl, nnojoluichipa jaa müin tamüin», nümaka Jehová nümüin Samuel. Mojusü maʼin naaʼin Samuel sutuma tü naainjakat Saúl. «Süka nnojoluichipain jaa pümüin sümüin nünüiki Jehová, nüneeküinjachi wanee aluwataai naata puulia», nümaka Samuel nümüin Saúl. Nuʼunapa Samuel, aaʼütünüshi nutuma Saúl süka nüsheʼin, süchatajaaka tü nüsheʼinkat. «Maʼaka süchatajaain tasheʼin, meerü sukuwaʼipa puluwataaya nutuma Jehová, nüsüteerü shia puulia», nümaka Samuel nümüin Saúl. Tü nüküjeekalü achiki Samuel shia naapüinjatüin Jehová tü nuluwataayakat Saúl nümüin wanee wayuu aikai apüla Jehová otta oonookai sümaa nünüiki.