Ekirajüshi Esdras sünain tü Nünüikikat Maleiwa

Eetaairü maʼaka 70 juya alataka süchikijee nantüin nachikuaʼa na israelitakana Jerusalénmüin; eejana waneinnua israelita kepiakana suluʼu tü mma naluwataakalü aaʼu na persakana. Naʼaka naya israelitakana, eejachi wanee wayuu kanüliakai Esdras. Nia wanee sacerdote ekirajaka Nünüiki Jehová. Nütüjaapa saaʼu moonooin na chajanakana Jerusalén sümaa Nünüiki Maleiwa, oʼuneejaasü naaʼin süpüla nükaalinjain naya. Müshi Artajerjes chi aluwataaikai saaʼu Persia: «Kekiishi maʼin pia nutuma Maleiwa süpüla pikirajüin tü Nünüikikat. Puʼuna otta pümaa na oʼuneekana pümaa». Nuutkajaaka Esdras namaa na oʼuneekana Jerusalénmüin. Nachuntaka nümüin Jehová süpüla naaʼinmajüin naya wopuluʼu jee noʼunaka.

Sülatapa pienchi kashi, antüshii naya Jerusalénmüin. Anuu nanüiki na laülaashii chajanakana Jerusalén nümüin Esdras: «Moonooinsalii na israelitakana sümaa nünüiki Jehová otta kaʼwayuuseshii naya jieyuu aʼwaajaka maleiwayaasü». ¿Kasakaʼa naaʼinrüin Esdras? Nüsapainkaka nia suʼupala tü wayuukalüirua sünain maa: «Jehovákalee, wainma maʼin tü kasa anasü paaʼinrakat wapüleerua, ayatapejeʼe waya kaainjalain puʼupala». Mayaainjeʼe mojuin naaʼin saalinjee naainjala, ayatüshii naya aainjain kasa mojusü. Nüneekaka Esdras waneinnua laülaashii süpüla nachajaainjatüin sukuwaʼipa süpüla natüjaain saaʼu jamüin maka nakuwaʼipa. Soʼu apünüin kashi, najünajaain napüshuaʼa na ayoutakana aʼwaajaa Jehová.

Sülatapa poloo piamamüin juya, kettaasü süsepü Jerusalén. Nuutkajeʼeraka Esdras tü wayuukalüirua pülaasapaʼa süpüla naashajeʼerüin namüin tü Nünüikikat Maleiwa. Nujutatpa Esdras tü Karaloʼuta nünüikimaajatkat Maleiwa, ashaʼwalaashii na wayuukana. Nuʼwaajünaka Jehová nutuma Esdras otta nayaleraka najapü na israelitakana iipünaamüin süpüla neeʼiyatüin anain tia namüin. Mapa, naashajeʼerüin Esdras tü Nünüikikat Maleiwa sümaa nüküjain jamaluʼuluin shia. Jülüjasü maʼin naaʼin tü pütchikat. Nayaawata aaʼulu nakatalaain nuulia Jehová otta aʼyalajüshii naya saalinjee tia. Waneemüin kaʼi, naashajeʼerüin Esdras süchikuaʼa tü Nünüikikat Maleiwa. Nayaawataka saaʼu na israelitakana sünain naaʼinrüinjatüin tü miʼiraakat eere kalumaseyaain naya. Nachajaamaatüin sukuwaʼipa süpüla naaʼinrüin tia miʼiraakat.

Talatüshii maʼin na israelitakana soʼu tü akaratshikat kaʼi naaʼinraka oʼu tü miʼiraakat. Naapüin analuʼut nümüin Jehová saaʼujee anain sukuwaʼipa naʼttia. Wainma kaʼi alataka sümaa nnojoluin naaʼinrüin tü miʼiraakat eere kalumaseyaain naya, akatüjülia kataiwaʼaya noʼu Josué. Sajaʼttapa tia miʼiraakat, outkajaashii naya otta oʼuraajüshii naya sünain müin nanüiki: «Jehovákalee, pia piakai taashika atuma waya suulia achepchiee. Paapüinka wamüin eküülü chaa isashiipaʼa otta paapüin wamüin wanee mma anaka maʼin. Ayatapejeʼe eʼrüliin waya wayumüin sümüin pünüiki wainmatua. Nnojoishii jaa müin waya pümüin mayaainjeʼe puluwataain wainma pünüikimaajana süpüla nachiaain waya. Mayaainjeʼe müin wakuwaʼipa, nnojoishi pia aashichijaain wamüin. Nnojotsü motuin paaʼin tü püküjakalü achiki paala nümüin Abrahán. Aluʼusaʼa jooluʼu waapüin wanüiki pümüin sünain woonooinjanain waneepia pümaa». Nashajiraka na israelitakana tü pütchi napansaajakat nümüin Jehová suluʼu karaloʼuta otta müshiʼiya na laülaashiikana, na levitakana namaa na sacerdotekana naseyaajüin tia.