Naküjain na aapieekana jemelin Jesús

César Augusto nünülia chi aluwataakai saaʼu Roma. Nuluwataain napüshuaʼa na judíokana süpüla nashajirüin nanülia suluʼu tü mma jemeikalü aluʼu naya. Süka jemelin José chaa Belén otta chejeʼewalin nüpüshi, oʼunushi nia chamüin sümaa María. Jakütüsü María wanaa sümaa suʼunuin Belénmüin.

Nantapa Belénmüin, kalujunasü süpüshuaʼale tü miichikalüirua napüla, shia neʼe eeka napüla wanee shipia mürüt. Yalajachi jemelin Jesús. Sukoʼoyoluin María chi joʼuukai süka kuluulu jee sutunkiraka nia suluʼu wanee shiitain mürüt.

Soʼu aikat tia, chaa süʼütpaʼa Belén, eejana wanee wayuu arüleejülii sünain aaʼinmajaa naʼanneetse chaa anoouishii. Niiʼiyataaka wanee aapiee namüin, warattuuisü tü mmapaʼakat nutuma süka nümaʼanajeejachin nia Maleiwa. Ayoʼujaasü maʼin naaʼin na arüleejüliikana sutuma tü neʼrakat. «Nnojo mmoluin jia, aküjashi taya süchiki wanee pütchi anaka maʼin, jemeishi soʼukai chi Mesíaskai suluʼu tü mmakat Belén», nümaka chi aapieekai namüin. Wanaa maʼin sümaa tia, eeʼiyataashii watta naalii aapieeirua iipünaa sünain müin nanüiki: «Waʼwaajüin chi Maleiwakai chaa iipünaa saaʼu niiʼiyatüin naʼanasia sümüin wayuu yaa mmoluʼu». Yüüʼülaa müshii na aapieekana mapa. ¿Kasakaʼa naaʼinrüin na arüleejüliikana?

Majiraashii na arüleejüliikana: «Jooʼuya chamüin Belén jooluʼuleʼeya». Oʼuna müshiʼiya naya Belénmüin, chajanaka napüla José sümaa María otta chi joʼuukai suluʼu tü shipiakat mürüt.

Ponoshaatasü saaʼin wayuu tü namakat na aapieekana namüin na arüleejüliikana. Jülüjasü maʼin saaʼin María tü nümakat chi aapieekai sümüin otta nnojotsü motuin shia saaʼin. Aleʼejüshii mapa na arüleejüliikana sünain aaʼinmajaa naʼanneetse otta talatüshii maʼin naya sutuma tü pütchi naapajakat otta sutuma tü kasa neʼrakat.