Nüchiki Jesús jintüliiwaʼaya nia

Kepiapuʼushi José sümaa María chaa Nazaret, eejachi Jesús namaa otta na wanee nuwalayuucheinkana. Aʼyataai José süka taapüla, shia nipijaaka aaʼu tia sümaa nüpüshi. Nekirajataain joo naya sünain tü Nünüikikat Maleiwa. Oʼunawaishi José sümaa nuʼwayuuse otta nüchonnii sünain aʼwaajaa Jehová suluʼu tü ekirajüleekat otta oʼunawaishii naya Jerusalénmüin juyawai sünain tü miʼiraa kanüliakat Pascua.

Wanaa sümaa 12 nuuyase Jesús, oʼunushi nia sümaa nüpüshi Jerusalénmüin. Watta maʼin naalii na wayuu chajanakana sünain tia miʼiraakat. Sujutaapa tü miʼiraakat, oʼunushi José sümaa María nepialuʼumüin nachikuaʼa, oʼunayaashi Jesús namaa naaʼinruʼu. Wattapa naya wopuluʼu, nasukajüin Jesús, nachajaaka nüchiki saʼakapünaa tü wayuukalüirua, nnojoipejeʼe nantüin anain nia.

Naleʼejaka nachikuaʼa Jerusalénmüin, makataka naya chayaa otta apünüin kaʼi sünain nachajaain nüchiki Jesús. Mapa, nantaka nünain suluʼu tü piichi aʼwaajüleekat Maleiwa. Yalajachi Jesús napüla joyotuin naʼatoʼu na laülaashii ekirajakana suluʼu tü aʼwaajüleekat, naapajaʼattaain tü münakat nümüin otta nüsakirüin naya sünain tü kasa kapüleekat maʼin. Süka ponuin maʼin naaʼin na laülaashiikana tü naashajaakalü achiki Jesús, nia joo asakinnaka natuma otta ponusü maʼin naaʼin süka anain maʼin nusoutia shiʼipajee tü nasakitkalü anain. Nayaawataka saaʼu nütüjain maʼin Jesús süpüleerua tü Nünüikikat Jehová.

Shapaasü maʼin saaʼin María nümaa José. «Wachajaain maʼin püchiki, shapaasü maʼin waaʼin paaʼu. ¿Jalajachi pia?», sümaka María nümüin. Nusoutaka Jesús sümüin: «¿Nnojotsü jütüjaain saaʼu sünain yaainjachin taya nipialuʼu chi Tashikai?».

Nuʼunaka Jesús mapa Nazaretmüin sümaa tü niikat otta chi nüshikai. Nikirajünaka nutuma chi nüshikai sünain aʼyatawaa süka taapüla. ¿Jamüsüche saaʼin pümüin nukuwaʼipa Jesús jintüliiwaʼaya nia? Ajaʼapülaashi Jesús sümaa kekiin maʼin nia, makalaka alin maʼin nia nüpüla Maleiwa otta süpüla tü wayuukalüirua.