Nüneeküin Jesús na polookana piamamüin aluwataaushii

Maʼaka wanee juya shiatapünaamüin süchikijee nuʼttuin Jesús sünain aküjaa pütchi, naaʼinrüinjatü wanee kasa. ¿Jaralii na nüneeküinjanaka Jesús süpüla naʼyataajiraain nümaa jee süpüla jülüjain naaʼin na anoujashiikana? Süpülapünaa naaʼinrüin tia, achuntushi nia kaalinwaa nümüin Jehová. Müshijeseʼe nuʼunuin nümüiwaʼa saaʼu wanee uuchi jee wataasü aikat naaʼu sünain achuntaa nümüin Jehová. Waneemüin kaʼi, nuutkajeʼerüin Jesús waneinnua nikirajüin süpüla nüneeküinjanain 12 aluwataaushii naʼakajee. ¿Pütüjaa aaʼu kasaichin nanülia? Anuu nanülia: Pedro, Andrés, Santiago, Juan, Felipe, Bartolomé, Tomás, Mateo, Santiago chi nüchonkai Alfeo, Tadeo, Simón otta Judas Iscariote.

Eepünaale Jesús, nümaashii na aluwataaushikana. Niʼiküin naya süpüla natüjain aküjaa pütchi. Nüjütüin naya mapa süpüla naküjainjanain pütchi. Jee müsia, naapüin Jehová namüin laülawaa süpüla nojuʼitirüin yolujaa süleʼeruʼujee wayuu jee süpüla neiyajüin wayuu eekai ayuulin.

Aleewashi maʼin Jesús namaa na polookana piamamüin aluwataaushii otta niʼitaain maʼin naaʼin nanain. Wayuu mojushii otta matüjainsalii naya naashin na fariseokana. Niʼiküin naya Jesús süpüla natüjain süpüleerua tü nuluwataakalü anain naya. Jamüshiijaʼa naya, eʼrüinjana kasa anasü wanaa nümaa Jesús jee eʼrüinjana naya müliaʼayaa. Neʼrüin wanaa sümaa nuʼutunuin aaʼin Jesús otta wanaa sümaa nüsoʼireʼennüin aaʼin. Kojuyashii na aluwataaushii chejeʼewaliikana Galilea maʼaka naaʼin Jesús. Eejana na kaʼwayuusekana.

Nnojotsü lotuin nakuwaʼipa na aluwataaushikana, müsüjeseʼe eein kasa mojukuwaʼipatka natuma. Eesü nnojorüle nayaawatüin saaʼu nanüiki otta mojule süneekia natuma wanee kasa. Eeshii jashichiwaire naya. Eeshii naʼülüjaajiraale saaʼujee jaralinjachin miyoʼuin naʼakajee sünain aluwatawaa. Mayaapejeʼe müin nakuwaʼipa, wayuu anamia naya. Aishi maʼin Jehová napüla. Nayainjana oʼuniraka nakuwaʼipa na anoujashiikana nnojoitpa Jesús namaa yaa mmapaʼa.