Eeʼiyataashi Jesús namüin na olojuliikana jime

Sülatapa maʼaka jeʼra kaʼi süchikijee niiʼiyataain Jesús namüin na aluwataaushikana, oʼunushi Pedro sünain olojoo jime shiroku tü palaa kanüliakat Galilea. Eejachi Tomás nümaa, Santiago, Juan otta waneinnua nikirajüin Jesús. Siraasü aikat naaʼu sümaa masirüin naya.

Jaʼyuupa naaʼu, neʼrüin wanee wayuu sotpaʼa tü palaakat. «¿Kasitshii jia?», nümaka chi wayuukai namüin wattajee. «Nnojo», namaka nümüin. «Anasü jujutule tü jukusuinkat süchikuaʼa yalamüin yala», nümaka joo chi wayuukai namüin. Nojutaka tü nakusuinkat shirokumüin tü palaakat, kasitka naya jime watta maʼin saalii. Isasü nachiki nayuʼluin süka jawatüin shia noulia. Niasaʼa joo Juan niyaawataka naaʼu sünain niain Jesús chi wayuu neʼrakai. «Niaʼayaa chi Señotkai», nümaka. Numuttaka Pedro shirokumüin tü palaakat süpüla oʼunaa eemüin Jesús. Noʼunaka na waneinnua suluʼu tü anuwakat sotpaʼamüin tü palaakat.

Nashakatapa suluʼujee tü anuwakat, eesü napüla wanee siki asijüna aaʼulu jime otta pan. «Icheʼera jümaala süpüshi tü jüsitkat süsijaanaiwa», nümaka Jesús namüin. «Jalainna jikaiwa», nümaka.

«¿Alatüsü taalin püpüla suulia jimekat tüüirua?», nümaka Jesús nümüin Pedro keraapa naya sünain ekawaa. «Señotkalee, pütüjaa aaʼu sümaa alin pia tapüla», nümaka Pedro. «Pikajira maa tamüin taʼanneetse», nümaka Jesús nümüin. Nüsakinnaka Pedro nüchikuaʼa nutuma Jesús: «¿Shiimain sünain alin taya püpüla?». Nusoutaka Pedro nümüin: «Señotkalee, shiimainña pütüjaain aaʼu sümaa alin pia tapüla». «Pürüleeja maa tamüin taʼanneetse», nümaka Jesús. Apünüintua nüsakinnüin Pedro nutuma Jesús sünain tia. Mojuka naaʼin Pedro sutuma nüsakinnüin nüchikuaʼa. «Señotkalee, pütüjaa aaʼu kasakat süpüshuaʼa. Pütüjaa aaʼuchi alin pia tapüla», nümaka Pedro nümüin. Nusoutaka Jesús nümüin: «Anashii pikajirüle na taʼanneetsekana. Ayata pia waneepia puushikajaain süchiirua takuwaʼipa».