Oʼunushi Jesús iipünaamüin

Outkajaashi Jesús namaa na nikirajüinkana chaa Galilea. Nuluwataaka naya sünain aʼyatawaakat tüü: «Juʼuna jümaala sainküin mmakat süpüshuaʼa süpüla jüküjain tachiki sümüin wayuu süpüla sunoujainjatüin tanain. Jikiraja naya sünain süpüshuaʼa tü tekirajakalü anain jia otta juwoutisaaja naya». Anuu joo nünüiki süchikijee tia: «Soto jaaʼin eejeechin taya waneepia jümaa».

Süchikijee süsoʼiraain naaʼin Jesús, eeʼiyataashi nia kojuyatua namüin na nikirajüinkana suluʼupünaa tü mmakat Galilea otta Jerusalén soʼu 40 kaʼi. Watta saalii kasa nikirajaka anain naya otta aainjashi nia kasa pülasü noʼupala. Outkajaashi Jesús mapa namaa na aluwataaushikana saaʼu tü wutai kanüliakat Olivos. «Anashii müleka jaʼatapajüle paala yaa Jerusalén. Ayata jaʼatapajüin tü naapajatkat jümüin chi Tashikai», nümaka Jesús namüin.

Süka nnojoluin nayaawatüin saaʼu jamaluʼuluin nünüiki Jesús, nasakiraka nia: «¿Aluwataainjachitchi pia yaa saaʼu Israel?». Nusoutaka Jesús namüin: «Nnojotyülia nücheküin Jehová tapüleerua taluwataainjachin maaʼulu. Eejeerü jaaʼu tü nüpülainkat Maleiwa süpüla nükaalinjain jia sünain ountaa kasa süpüshuaʼa otta jüküjeerü sümüin wayuu tachiki tayakai. Juʼuna jümaala suluʼupünaa Jerusalén, suluʼupünaa Judea, suluʼupünaa Samaria otta suluʼupünaa mma wattapünaa maʼin sünain aküjaa süchiki tü pütchi anasükat».

Niyalereʼennaka Jesús iipünaamüin noʼupala. Sunjuleʼetka nia wanee siruma noulia na nikirajüinkana, nnojoika nia neʼrüin sutuma. Chüntüsü noʼu iipünaamüin nüchiirua Jesús, yüüʼülaa nümaka noʼupala.

Noʼunaka mapa na nikirajüinkana Jesús Jerusalénmüin süchikijee yalain naya paala saaʼu tü wutai kanüliakat Olivos. Outkajaʼawaishii naya waneepia süpüla aashajawaa nümaa Maleiwa iipünaa suluʼu wanee miichi. Naʼatapajüin niiʼiyataain Jesús namüin süpüla nüküjain namüin tü naaʼinrajatkat.