Ayatüshii aküjain pütchi

Eejachi wanee wayuu masaʼasai, aikalaʼawaishi nia waneepia soʼuluʼu tü miichi aʼwaajüleekat Maleiwa sünain ojulijaa nneerü. Soʼu wanee kaʼi, niʼrüin Pedro nümaa Juan nantapaain suluʼumüin tü miichi aʼwaajüleekat Maleiwa. «Kaalin maa taya, jüsülaja nneerü tamüin», nümaka namüin. «Taapeerü pümüin wanee kasa anaka maʼin suulialeʼeya nneerü. Tamüshi paala pia saaʼu nünülia Jesús, püshaʼwalaa, puwaraʼiraa», nümaka Pedro nümüin. Nütameʼeraka nia Pedro, nuwarairaaka joo chi wayuukai. Ponoshootosü saaʼin tü wayuukalüirua tü alatakat, wainma na ekerotokana sünain anoujaa sutuma tü neʼrakat.

Naashichijaaka nooʼomüin na sacerdotekana namaa na saduceokana. Nataʼülaka na aluwataaushikana sümaa namaain naya suluʼumüin tü kanüliakat Sanedrín. Nasakiraka naya: «¿Jarat kapülainkajatka tü kasa jaaʼinrakat?». «Nia keʼinaajalaka waya Jesús sünain aaʼinraa kasa makalü aka tüü, chi juʼutitkalinka aaʼin», nümaka Pedro namüin. Namaka joo na laülaashiikana sümaa emetuluin nanüiki namüin: «Wachiaain jia suulia aashajawaa nüchiki Jesús». Nasoutaka na aluwataaushikana namüin: «Ayatüinjana waya aashajaain nüchiki Jesús, nnojoishii waya koʼutuinjanain».

Nüjütünaka achiki Pedro nümaa Juan. Noʼunamaataka eemüin na wane nikirajüinkana Jesús süpüla naküjain namüin tü alatakat namüin. Kottapa naya, noʼuraajaka nümüin Jehová sünain maa: «Pükaalinja maa waya Jehová süpüla yalayalain waaʼin sünain aküjaa pütchi püchiki». Naapaka Jehová tü nüpülainkat namüin süpüla ayatüinjanain naküjain pütchi jee süpüla neiyajüin wayuu eekai ayuulin. Aʼwainmalaashii maʼin na wayuu ekerotokana sünain anoujaa. Süka nachunjain na saduceokana, nataʼülüin sümaa napüreesajirüin na aluwataaushikana. Soʼu aikat tia, nuluwataain Jehová wanee aapiee süpüla nujutalüin soʼu tü kaatsetkat. «Juʼuna jüchikuaʼa eemüin tü piichi aʼwaajüleekat Maleiwa jüküjaiwa tü pütchikat yala sümüin wayuu», nümaka chi aapieekai namüin na aluwataaushikana.

Waneemüin kaʼi, nuʼunaka wanee wayuu sünain aapiraa na chajanakana suluʼu tü kanüliakat Sanedrín. Anuu nünüiki: «Süttüsü süka kaleena soʼu tü kaatsetkat, nnojoliipejeʼe yalain na wayuu jüsürütkana suluʼu. Ichaa naya sünain aküjaa pütchi suluʼu tü miichi aʼwaajüleekat Maleiwa». Nataʼünnaka nachikuaʼa na aluwataaushikana sümaa namaanüin suluʼumüin tü kanüliakat Sanedrín. «Mataashii wachiaaka jia suulia aashajawaa nüchiki chi Jesús münakai», nümakalaka joo chi laülaashikai napüleerua na sacerdotekana. Nusoutaka Pedro niʼipajee: «Alanaʼaleesüjaʼa sünain niainjachin woonooin amaa anüiki Maleiwa suulialeʼeya sünüiki wayuu».

Jashichishaatashii na laülaashiikana nooʼomüin na aluwataaushikana, noʼutee aaʼinchii naya. Nüshaʼwalaaka wanee fariseo kanüliakai Gamaliel sünain maa namüin: «Jalia jia. Eesüjaʼa shiimainre eein chi Maleiwakai namaa wayuukana naainnua. ¿Shiimaincheje niʼipoleein jia Maleiwa naaʼujee?». Noonooka sümaa nünüiki. Süpülapünaa najütirüin nachiki, naʼyaajirüin naya süka wunuʼu sümaa nachiaain naya nachikuaʼa süpüla nooʼulaain suulia aküjaa pütchi. Nnojoliipejeʼe eimmolojooin na aluwataaushikana sutuma tia, ayatüshii naya sünain aküjaa pütchi nüchiki Jesús chaa suluʼu tü miichi Aʼwaajüleekat Maleiwa otta sainküin miichi.