Karaloʼuta naluwataala na Laülaashii Jülüjakana Aaʼin na Aküjaliikana pütchi sainküin mma

Wawalayuu aishiikana wapüla:

Kojutusü maʼin wamüin tü Bibliakat süka waʼyataain nümüin Jehová. Watüjaa aaʼu shiimain tü ashajünakat suluʼu otta jaloulin shia wamüin. Jaʼyasü suluʼu tü sümakat tü Bibliakat alin maʼin na wayuukana nüpüla Jehová (Salmo 119:105; Lucas 1:1-4; 1 Juan 4:19). Keeʼireesü maʼin waaʼin shiʼraajüinjatüin wayuu tü shiimain aküjünakat suluʼu tü Bibliakat. Makalaka waküjeein jümüin süchiki wanee karaloʼuta jeketü makalü anülia: «Tatüjaka sünainjee tü Bibliakat». Waküjain paala jümüin jamüinjatüin jutuma sukuwaʼipa tü karaloʼutakat.

Akumajünüsü karaloʼutakat tüü napüla na tepichikana. Anapejeʼe maʼin tü sümakat süpüla nekirajaain sünain na wayuu miyoʼuyuukana otta süpüla natüjain sooʼomüin süchiki tü sümakat tü Bibliakat. Jalouisü tü sümakat tü Bibliakat sümüin wayuu süpüshuaʼa, makalaka aneerüin maʼin wakuwaʼipa otta talateerüin waaʼin wekirajaale sünain.

Ayuʼluushi karaloʼutakat tüü suluʼujee tü Bibliakat. Aküjünüsü yala süchiki nakuwaʼipa na wayuu namaiwajanakana nukumajaiwaʼaya Maleiwa tü kasakat süpüshuaʼa. Ashajünüsü süka pütchi mapüleesat süpüla shiyaawatünüin aaʼu.

Nnojotpajaʼa aküjalaain neʼe tü ashajünakat suluʼu tü karaloʼutakat. Wayaawata aaʼu nakuwaʼipa na wayuu ashajünakana achiki otta anasü maʼin tü ayaakuaakalüirua süpüla sütanalüinjatüin waaʼin tü pütchikat.

Sükajee karaloʼutakat tüü, atüjeena waya nachiki na wayuu oonookana sümaa nünüiki Jehová otta nachiki na moonooinkana sümaa. Atüjeena waya sünainjee tü nakuwaʼipakat (Roma 15:4; 1 Corinto 10:6). Eesü 14 shiʼipa suluʼu tü karaloʼutakat. Suʼttiajee wanee shiʼipa, aküjünüsü süchiki tü ekirajaanajatkalü anain.

Kachonle pia, eesü süpüla paashajeʼerüin wanee ekirajaaya namaa jee jüküjain kasain jütüjain sünainjee tü ayaakuaakat. Süchikijee tia, eesü süpüla jaashajeʼerüin tü suluʼujeejatkat tü Bibliakat. Pükaalinja naya süpüla nayaawatüin saaʼu kasain wanaawain anainjee tü aküjünakat suluʼu tü Bibliakat sümaa tü aküjünakat suluʼu tü ekirajaayakat.

Kasataalejeseʼe natüjain süpüleerua tü Bibliakat na wayuu anamiakana. Kasataalejeseʼe neʼitaain suluʼu nakuwaʼipa tü ekirajünakalü anain suluʼu karaloʼutakat tüü. Mülejeʼe shia natuma, naʼwaajeechi Jehová namaʼaleeya na napüshikana.