Paaʼinrajatka süpüla ayatüin pikirajaain sünain tü Bibliakat

Anasü maʼin ekirajawaa sünain tü Bibliakat, eejeetpejeʼe tü kaʼi kapüleejeetkalü oʼu pümüin pikirajaain sünain. Eesüjaʼa jülüjale paaʼin müleka puuʼulaajeechire suulia ekirajawaa. ¿Jamüsü anaka püchajaale sukuwaʼipa süpüla ayatüin pikirajaain? ¿Kasa paaʼinrajatka süpüla ayatüin pikirajaain mayaainjeʼe eejeerüin tü kasa kapüleejeetkalü atuma shia?

1. ¿Jamüsü anaka pikirajaale sünain tü Bibliakat?

«Kaawainsü tü nünüikikat Maleiwa otta pülashaatasü maʼin shia» (Hebreokana 4:12). Tü Bibliakat shia wanee karaloʼuta kojutuka maʼin, süka jamüin, süküjain tü nümakat Maleiwa otta alin maʼin pia nüpüla. Nnojoleerü pütüjain neʼe nüchiki Maleiwa pikirajaale sünain tü Bibliakat, aneerü sukuwaʼipa tü kasa paaʼinrakat otta pütüjaajeerü aaʼu nunouteʼereerüin Maleiwa sukuwaʼipa tü mmapaʼakat, jee müsia paʼaleewainjeechi maʼin Jehová. Wanaa sümaa pikirajaain sünain tü Bibliakat, paaʼinrüin tü sümakat süpüla sunoutaain pukuwaʼipa.

2. ¿Jamüsü kojutuinjatka wamüin tü sümakat tü Bibliakat?

Tü pütchi sümakat tü Bibliakat, müsü aka saaʼin wanee korolo kojutuka maʼin. Anuu sünüiki: «Piyaʼlaja tü shiimainkat otta nnojo puiküin shia» (Proverbios 23:23). Kojutule maʼin wamüin tü sümakat tü Bibliakat, wachajaajeerü sukuwaʼipa süpüla ayatüin wekirajaain sünain jaʼitairü eejeerüin tü kasa kapüleejeetkalü atuma shia (paashajeʼera Proverbios 2:4, 5).

3. ¿Kaseerü naaʼinraka Jehová püpüleerua süpüla ayatüin pikirajaain?

Niʼraajüin maʼin Jehová tü pukuwaʼipakat jee nükaalinjeein pia süpüla pütüjain sooʼomüin nüchiki, jama pülashaatain maʼin nia jee paʼaleewain nia. Nükaalinjeechi pia Maleiwa süpüla keeʼireeinjatüin paaʼin ayatüin pikirajaain jee paaʼinrüin tü pikirajaakalü anain (paashajeʼera Filipos 2:13). Müleka nnojorüle paaʼin sünain ekirajawaa jee sünain aaʼinraa tü pikirajaakalü anain, nükaalinjeechi pia Jehová. Müleka eere wanee kasa ataʼüleeka pukuwaʼipa suulia ayatüin pikirajaain jee nnojorüle süchekünüin püpüleerua, nükatsüinreerü paaʼin Maleiwa. Ayataʼaya puchuntuin nümüin Jehová süpüla ayatüin pikirajaain sünain tü Bibliakat (1 Tesalónica 5:17).

WEKIRAJAA SOOʼOMÜIN

4. Kojuta pümüin ekirajawaa sünain tü Bibliakat

Eesüjaʼa kapüleejeerüle pümüin pikirajaain sünain tü Bibliakat sutuma nnojoluin jimatüin pia. ¿Kasa paaʼinrajatka müle pukuwaʼipa? Jaashajeʼera Filipos 1:10, TNM otta yooto jia süchiki tüü:

• ¿Kasa tü alanaʼaleekat suluʼu anain saaʼin pümüin?

• ¿Kasa paaʼinrajatka süpüla sülanaʼaleein sujutu pümüin ekirajawaa sünain tü Bibliakat?

1. 1. Jamüsüjaʼa pipirajüle wanee iita sümaa jasai jee piʼitaale tü ipakalüirua süchikijee, epirajaajeerü suulia.

2. 2. Müleka piʼitaale palajana tü ipakalüirua suluʼu tü iitakat, nnojoleerü apütaain tü jasaikat. Akaataajaʼa neʼe sukuwaʼipa tü kasa paaʼinrajatkat. Paaʼinmaale tü kasa alanaʼaleekat suluʼu anain, paaʼinreerü shia jee apütaajeerü kaʼi püpüla süpüla paaʼinrüin waneirua kasa.

Wekirajaale sünain tü Bibliakat, keeʼireejeerü waaʼin weʼraajüin Maleiwa jee waʼwaajüin nia. Jaashajeʼera Mateo 5:3 otta yooto jia süchiki tüü:

• ¿Kasa anasü piʼreetka sülanaʼaleere sujutu pümüin ekirajawaa sünain tü Bibliakat?

5. Ayataʼaya pikirajaain mayaainjeʼe nnojoluin süchekünüin püpüleerua

VIDEO: Eʼrüshi taya kasa anasü sünainjee tachecherüin taaʼin (5:22)

• ¿Kasa naaʼinraka nüpüshi otta naʼaleewainyuu Francesco nüküjapa namüin süchiki tü nikirajaakalü anain?

• ¿Kasa anasü niʼraka sünainjee nüchecherüin naaʼin?

Jaashajeʼera 2 Timoteo 2:24-26 otta yooto jia süchiki tüü:

• ¿Jamüsü nanüiki püpüshi jee paʼaleewainyuu sünainjee pikirajaain sünain tü Bibliakat?

• Sünainjee tü sümakat wetsiikulokalüirua tüü, ¿kasa paaʼinrajatka müleka shiyoutünüle püpüleerua pikirajaain sünain tü Bibliakat? ¿Jamüsü paaʼinrajatka tia?

6. Piʼitaa paaʼin sünain nükaalinjeechin pia Jehová

VIDEO: Nükaalinjain waya Jehová süpüla weeʼiratüin wakuwaʼipa (3:56)

• Sünainjee tü piʼrakat suluʼu tü videokot, ¿kasa niiʼirataka Jim sünain nukuwaʼipa süpüla naaʼinrüin tü nüchekakat Jehová?

• ¿Kasa ponoko paaʼin sünainjee tü nukuwaʼipakat?

Jaashajeʼera Hebreokana 11:6, TNM otta yooto jia süchiki tüü:

• ¿Kaseerü naaʼinraka Jehová nüpüleerua «chi eekai nürütkaain nünainmüin» süpüla niʼraajüin nukuwaʼipa jee naaʼinrüin tü nüchekakat?

• ¿Jamüsüche naaʼin Jehová niʼrapa püchajaain sukuwaʼipa süpüla pikirajaain sünain tü Bibliakat?

WATÜJAAITPAKA AAʼU

Mayaainjeʼe eejeerüin kasa kapüleejeetka atuma pikirajaain sünain tü Bibliakat, kateerü poʼu waneepia ayatüle pikirajaain sünain. Ayata piʼitaain paaʼin nünain Jehová, aneerü pukuwaʼipa nutuma.

Pusouta shiʼipajee

• ¿Jamüsü kojutuka pümüin tü sümakat tü Bibliakat?

• ¿Kasa paaʼinrajatka sünainjee pütüjaaitpain saaʼu «tü kasa alanaʼaleekat suluʼu anain»?

• ¿Jamüshi puchuntajachika nümüin Jehová süpüla ayatüin pikirajaain sünain tü Bibliakat?

PÜNAʼLA SOOʼOMÜIN

Pikirajaa sünain pienchisü kasa akaalinjaka na wayuukana süpüla süpütaain kaʼi napüla.

«Tü waaʼinrajatkat süpüla süpütaain kaʼi wapüla» (¡Eeja Waaʼin!, peʼureeroʼu 2014)

Pünaja süchiki wanee wayuu aneeka akuwaʼipa noʼuluʼu Maleiwa, nnojotpejeʼe niyaawatüin chi suʼwayuusekai jamüin maka sukuwaʼipa. Pünaja suluʼu tü videokot tü naaʼinrakat Jehová süpüleerua.

Nukatchinrüin waaʼin Jehová soʼunnaa tü müliaa weʼrakat (5:05)

Pünaja jamüin sunoutaaka nukuwaʼipa wanee wayuu sünainjee süchecheraain tü nuʼwayuusekat sünain anoujaa.

Tekirajaa achiiruat shiimainreje tü sunoujakalü anain (6:30)

Eeshii naliʼrajünüle na Aküjaliikana pütchi sünain nakatajireʼerüin na kaʼwayuuseshiikana. ¿Shiimainchejeʼe tia?

«¿Nekirajüinche na Aküjaliikana pütchi nuuʼulaainjatüin nuʼwayuuse wanee wayuu manoujainre shia?» (Pütchi suluʼuka jw.org)