EKIRAJAAYA 14
Tü paaʼinrajatkat puʼwaajapa Maleiwa
Maʼaka wekirajaain sünain tü wane ekirajaayakat, nnojotsü talatüin naaʼin Maleiwa sümaa tü naaʼinrakat na suluʼukana tü wane iküleesiakalüirua. Eepejeʼe süpüla talatüin naaʼin watuma waʼwaajapa nia. «¿Kasa talataka atuma naaʼin chi washikai Maleiwa» waʼwaajapa nia? (Santiago 1:27). Wekirajaa sünain tü sümakat tü Bibliakat süchiki tia.
1. ¿Jalasü aküjünüin tü waaʼinrajatkat waʼwaajapa Maleiwa?
Aküjünüsü suluʼu tü Bibliakat tü waaʼinrajatkat. «Tü pünüiki shiimüinkat» müshi Jesús nümüin Maleiwa süchiki tü Ashajuushikat (Juan 17:17). Na suluʼukana tü wane iküleesiakalüirua, nnojotsü kojutuin namüin tü sümakat tü Bibliakat süka nnojoluin noʼunuin süchiirua. Shia noʼunaka achiirua tü nakuwaʼipapuʼukat na wayuu kachooinkana naya. Nnojoipejeʼe talatüin Jehová namaa na nnojoliikana oonooin sümaa tü nuluwataakalü anain naya (paashajeʼera Marcos 7:9). Talateerü naaʼin Maleiwa wamaa waaʼinrüle tü sümakat tü Bibliakat.
2. ¿Kasa waaʼinrajatka waʼwaajapa Jehová?
Nüküjain wamüin Jehová niainjachin waʼwaajüin neʼe nümüiwaʼa (Alateetkat Mapeena [Apocalipsis] 4:11). Nnojoishii achuntajanain waya sümüin shiyaakua wanee kasa jee niyaakua wanee santo süpüla waʼwaajüin Maleiwa (paashajeʼera Isaías 42:8).
Waapajiraainjatü tü wakuwaʼipakat nümüin Jehová saaʼu nükatalüin waya suulia waainjala (Roma 12:1). Pansaainjatü wakuwaʼipa wanaapünaa sümaa tü nuluwataakalü anain waya. Jamüshijaʼa wanee wayuu eekai kaʼwayuusein, kojutuinjatü nümüin tü nümakat Jehová süchiki sukuwaʼipa kaʼwayuusee. Nnojotsü naaʼinrüinjatüin wanee kasa mojeetka atuma nukuwaʼipa maʼaka saaʼin epeʼruwaa, akaijaa yüi jee droga.a
3. ¿Jamüshi waʼwaajüinjachika Jehová namaa na wawalayuukana?
Woʼunule sünain tü outkajawaakat, waʼwaajüin Jehová namaa na wawalayuukana (Salmo 111:1, 2). Wanee sukuwaʼipa süpüla waʼwaajüin Jehová shia weeʼirajüle nümüin (paashajeʼera Salmo 104:33). Nuchuntuin wamüin Jehová woʼunuinjanain sünain tü outkajawaakat süka alin waya nüpüla otta nütüjaain saaʼu aneerüin wakuwaʼipa otta kateerüin woʼu waneepia sünainjee. Wanaa sümaa woʼunuin sünain tü outkajawaakat, watütüleʼerüin naaʼin na wawalayuukana otta natütüleʼerüin waaʼinya.
WEKIRAJAA SOOʼOMÜIN
Wekirajaa sünain jamüin nnojotka anain nümüin Maleiwa waʼwaajüle shiyaakua wanee kasa. Wekirajaa süchiki waneirua kasa waaʼinrajatka waʼwaajapa nia.
4. ¿Anasüche nümüin Maleiwa waʼwaajüle shiyaakua wanee kasa?
¿Jamüsü watüjaaka saaʼu mojuin nümüin Maleiwa tia? Jünaja tü VIDEOKOT otta yooto jia süchiki tüü:
¿Kasa alataka namüin na anoujashii namaiwajanakana wanaa sümaa naʼwaajüin shiyaakua wanee kasa?
Eeshii wayuu eekai naʼwaajüin shiyaakua wanee kasa süka narütkaain nünainmüin Maleiwa naashin. Akayalaapejeʼe Maleiwa noulia sünainjee naaʼinrüin tia. Jaashajeʼera Éxodo 20:4-6 otta Salmo 106:35, 36 otta yooto jia süchiki tüü:
¿Jara kayaakuaka tü suʼwaajakat maʼin wayuu maaʼulu?
¿Jamüsü naaʼin Jehová nuʼwaajüle wanee wayuu shiyaakua wanee kasa?
¿Anasüche nuchuntule wanee wayuu sümüin niyaakua wanee santo?
5. Taasheerü wakuwaʼipa suulia tü alawaa ekirajünakat niale waʼwaajüin neʼe Jehová
Waʼwaajüle Jehová wanaapünaa sümaa tü keeʼireekat naaʼin, taasheerü wakuwaʼipa suulia tü alawaa ekirajünakalü achiki. Jünaja tü VIDEOKOT.
Jaashajeʼera Salmo 91:14 otta yooto jia süchiki tüü:
¿Kaseerü naaʼinraka Jehová wapüleerua aire nia wapüla otta niale waʼwaajüin neʼe nümüiwaʼa?
6. Waʼwaajüin Jehová woutkajaale namaa na wawalayuukana
Waʼwaajüin Jehová otta watütüleʼerüin naaʼin na waneinnua weeʼirajüle jee wasoutule shiʼipajee tü asakinnakalü anain sünain tü outkajawaakat. Jaashajeʼera Salmo 22:22 otta yooto jia süchiki tüü:
¿Kamalainsüche pümüin paapajüin tü nasoutakat na wawalayuukana shiʼipajee tü asakinnakalü anain?
¿Jamüsü saaʼin pümüin pikirajaale tü pünüikinjatkat süpüla pusoutuin shiʼipajee tü asakinnakalü anain?
7. Talatüsü naaʼin Jehová waküjale süchiki tü wekirajaakalü anain
Wainma sukuwaʼipa süpüla waküjain namüin na waneinnua tü watüjakat suluʼujee tü Bibliakat. Jaashajeʼera Salmo 9:1 otta 34:1 otta yooto jia süchiki tüü:
¿Kasa püküjeeka namüin na waneinnua sünainjee tü pikirajaaitpakalü anain?
EESHII WAYUU EEKAI NAMÜIN: «Kanourale waya, talatüshi Maleiwa wamaa jaʼitairü jeʼtsüin tü iküleesia kaluʼukat waya».
¿Jamüsüjaʼa pünüiki süchiki tia?
WATÜJAAITPAKA AAʼU
Talatüsü naaʼin Maleiwa niale waʼwaajüin neʼe nümüiwaʼa, waʼwaajüle nia namaa na wawalayuukana otta waküjale namüin na waneinnua süchiki tü wekirajaakalü anain.
Pusouta shiʼipajee
¿Jalasü aküjünüin wamüin tü waaʼinrajatkat waʼwaajapa Maleiwa?
¿Jamüshi waʼwaajüinjachika neʼe Jehová nümüiwaʼa?
¿Jamüshi waʼwaajüinjachika Jehová namaa na wawalayuukana?
PÜNAʼLA SOOʼOMÜIN
Sünain tü pütchikat «Nnojoluitpa taya süchepchiain taʼwaajüin ayaakuaa», ashajünüsü süchiki wanee wayuu taashika akuwaʼipa suulia suʼwaajüin ayaakuaa.
«Sunouteʼerüin nakuwaʼipa tü Bibliakat» (Aapiria Wayuu, juulioʼu 1, 2011)
Pikirajaa sünain tü paaʼinrajatkat süpüla pusoutuin shiʼipajee tü asakinnakalü anain sünain tü outkajawaakat.
«Waʼwaaja Jehová wanaa namaa na wawalayuukana» (Aapiria Wayuu, eneeroʼu 2019)
Pünaja nüchiki wanee jimaʼai anakai akuwaʼipa sünainjee nuʼunuin sünain tü outkajawaakat mayaainjeʼe kapüleein shia nümüin.
Wainma na wayuu kamaʼanakana kuruusa süka namaʼanainjatüin shia na anoujashiikana nünain Cristo naashin.
a Wekirajaajeerü achiki tia sünain wane ekirajaaya.