Namüinjatü na outkajaashiikana

NA JÜLÜJAKANA AAʼIN NA ANTÜSHIIKANA. Eʼitaanüshii naya süpüla nakaalinjain pia. Paainja tü namakat naküjapa pümüin eeinjachire püshaʼwaleʼerüin peʼejena, eeinjachire püikalain otta waneirua kasa.

WOUTIISAA. Na woutiisainjanakana, aikalaainjana maalü soʼu tü piamakat kaʼi eere tü einasee aneekajünakat napüla nnojoluiwaʼaya suʼttuin tü pütchi namüinjatkat. Alüʼüjüinjana kuluulu noosojia, nnojoluinjatü arülain otta joʼuuchoin nasheʼin. Yaleerü neinase shiʼipoʼujee tü aashajaaleekat. Müleka eere wanee kasa jeketü aainjünajatka, aküjüneerü namüin na jülüjakana aaʼin na antüshiikana otta namüin na atüjaakana saaʼu sukuwaʼipa tü outkajawaakat.

TÜ NNEERÜ WASÜLAJAKAT. Wainma nneerü choʼujaaka süpüla eeinjatüin tü emiyoʼujiakat pütchi, tü einaseekat otta waneirua kasa süpüla anain waaʼin sünain aapajaa tü pütchikat otta warütkaain nünainmüin Jehová. Tü nneerü jüsülajakat süka jaaʼin, süpülajatü suwalaajünüin tia otta süpülajatü süküjünüin tü pütchi anasükat sainküin mmakat süchiki sukuwaʼipa aluwatawaa nutuma Maleiwa. Suluʼu tü outkajaaleekat, eesü wainma kaaja süpüla wejitüin nneerü suluʼu. Eesiaʼaya süpüla püsülajüin suluʼupünaa donate.jw.org. Na Laülaashii Jülüjakana Aaʼin na Aküjaliikana pütchi sainküin Mma naapüin analuʼut jümüin saaʼu jüsülajüin nneerü.

NA AKAALINJAKANA EEKAI AYUUIJAAIN. Tüü, napülajatü na eekai ayuuijaain otta neewaain.

KASA EEKAI AMÜLOULIN. Piʼikajaa tü kasa puusütakalü anain eemüin süpülee tü kasa amülouikat. Amülouire wanee kasa puulia, püsakira sünain chayaa. Na tepichi maaʼawakana, eʼikajaanüinjana chamüin. Nnojotpejeʼe aaʼinmajüleein tepichi tia. Jaaʼinmaja jüchonnii otta waneepia naya jümaa.

EINASEE. Nnojoluinjatü kapülain paaʼin pukuwaʼipa pümüiwaʼa wanaa sümaa püneeküin piinase. Soto paaʼin eein süpüla pünaajaain neinase na antakana pümaa, na pikirajüinkana jee na kepiakana pümaa. Nnojo piʼitaain wanee kasa saaʼu tü einasee nnojoluinjatkat pünaajaain.

NAMÜINJATÜ NA OUTKAJAASHII EEKAI NAKAALINJEEIN. Pükaalinjeere sünain tü outkajawaakat, pürütkaa nanainmüin na wawalayuu shikiipüʼükana.