¿Ajaʼttinneerü tü Mmakat?

▪ Ajaʼttüinjatia tü Mmakat naküjainruʼu waneeinnua wayuu oʼutuupüroʼu 21 soʼu 2011. Eetaayaai kasain alatüin. Nnojotsü alatüin tü nümakat Harold Camping, wanee wayuu chejeʼewai Estados Unidos. Naashin niakai ajaʼttüinjatü tü kasakalüirua maayoʼu 21, 2011. Soʼu kaʼikat tia akutkujaainjatü tü Mmakat otta jaʼrai kashi süchikijee, ajaʼttajatü tü Mmakat.

Nnojoleerü ajaʼttinnüin tü Mmakat, nnojoleerü nuuʼulaain sülatüin tia chi kakumalakai shia. Müsü tü Wiwüliakat süchiki tia: «Anasü maʼin putuma shiʼitaaya tü mmakat süpüla nnojoluinjatüin sajaʼttinnüin» (Salmo 119:90, NM).

Eeshii na wayuu aashajeʼerakana tü Wiwüliakat nnojoliika anoujüin sünain tia, aʼajüneerü tü Mmakat süka siki naashin. Nanoujüin tia sutuma tü sümakat tü Wiwüliakat suluʼu 2 Pedro 3:7, 10: «Aʼatapajüshi maaʼulu yaa chi Maleiwakai süpüla najaʼttirüinjatüin süka siki soʼu kaʼikat tia tü mmakat ooʼulaka na wayuukana mojutkana atüma nia ooʼulaka tü kasakalüirua süpüshua chakat iipünaa. [...] Je tü kaʼi niweeteetkat oʼu [Jeʼwaa], meeria aka saaʼin nüntia wane kaʼruwarai sünain matüjaajuuin naaʼu. Je soʼuweena kaʼikat tia ajaʼttinneerü tü kasakalüirua süpüshua chakat iipünaa süma miyoʼushaatain sütürüla. Maaʼaya aka tü jolotsükolüirua süpüshua chakat iipünaa, aʼajüneerü. Maaʼaya aka tü mmakat sümaa tü kasa eekalüirua yaa sooʼopünaa, aʼajüneerü shiaʼaya». ¿Shiache ajaʼttinnajatka tü Mmakat otta tü kasa chakat iipünaa? ¿Jamüsüjaʼa saaʼin pümüin tia?

Nnojo, tü nümakat Pedro pansaainjatü sümaa süpüshuaʼa tü nümakat otta sümaa süpüshuaʼa tü Wiwüliakat. Jülüja paaʼin wanee kasa: shiimainrejeʼeya tü sümakat wayuu süchiki tü kasa chakat iipünaa, ajaʼttüinjatü jotuin süka siki süpüshuaʼa tü kasa chakalü iipünaa. ¿Pujuichijeʼereerü pipia saaliijee piʼrüin kookoocheʼerü suluʼu? ¡Jamataʼaleesüjaʼa süpüla paaʼinrüin tia! Müsia neʼe nukuwaʼipa Jeʼwaa; nnojotsü süpüla najaʼttirüin tü kasa chakalü iipünaa saaliijee shiʼrüin wayumüin wayuu nümüin.

Nnojotsü pansaain tü namakat na wayuukana süchiki tü Mmakat sümaa tü nümakat Jesucristo: «Anataʼaleeshiijaʼa na anamiakana süka nayeenain aapünüin amüin tü mmakat» (Mateo 5:5, NM; Salmo 37:29). Aipüraire wanee wayuu, nukumaja shipia nüpüshi otta nnojotsü nujuichijeʼerüin tü miichikat, ¿aashimüin? (Salmo 115:16.) ¿Paainjüinjeʼe tia? Jeʼwaa nia kakumalaka tü Mmakat otta nia wanee Washi aipürai (Salmo 103:13; 1 Juan 4:8).

Wanaa sümaa naashajaain Pedro süchiki tü mmakat, shia naashajaaka achiki tü wayuu mojulaasükalüirua. Tü nükaliakat Jeʼwaa naashin Pedro müinjatü aka saaʼin tü alatakat nükalioʼu Noé suʼunnaa tü Juya miyoʼushaatakat (2 Pedro 3:5, 6). Suʼunnaa tia shia ouktaka tü wayuu mojulaasükalüirua. Ayatsia eein tü Mmakat otta katüsü noʼu Noé sümaa nüpüshi. Wanaa sümaa naashajaain Pedro süchiki tü kasa chakalü iipünaa, shia naashajaaka achiki naluwataaya na wayuukana. Makalaka shieerüin ajaʼttinnüin tü wayuu mojulaasükalüirua. Otta nnojoleena aluwataain na wayuu mojulaakana, shieerü aluwataaka Nuluwataaya Maleiwa (Daniel 2:44).

¿Ajaʼttinneerü tü Mmakat? ¡Nnojottaa! Shieerü ajaʼttinnaka tü wayuu mojulaasükalüirua. Ayateeria eein tü Mmakat namaa na wayuu oonookana waneepia nümaa Maleiwa (Proverbios 2:21, 22).