¿Anasüche kaseyuwaa jee ooʼulakiraa?

Jintuluiwaʼaya Bárbara,a epeinjaapuʼusü kasa süpüla jee saapapuʼuin shiyoolo wayuu. Saashin shiakat, yootopuʼusü namaa na süpüshi ouktüinnapakana. Shiakat nümaa chi suʼwayuusekai, nekirajaa anainrü nakaraloukse na ooʼulaküliikana. Sünainjee tia, atüjüshii ooʼulakaa süka tü waraajaa tarot münakat jee sutuma tia kanneetseshii maʼin naya. Shiasaʼa soʼu wanee kaʼi, neʼrüin süka tü waraajakat nantajanain nanainmüin wayuu mojulaashii otta naaʼinmajiraainjatüin nakuwaʼipa noulia.

MAYAAINJEʼE sukuwaʼipain wayuu sümaiwajatü tü ooʼulakiraakat, kamalainsü maʼin maaʼulu sümüin wayuu. Süpüla natüjaainjatüin saaʼu wanee kasa otta süpüla nnojoliinjanain jamajüin naya, eeshii na kamaʼanakana lania, taapüla wiija münaka, na eeʼirajirakana ouutsü, na epejitkana, na asüküreetajitkana najapüna, naüliijana, nasirapüse. Saashin wanee karaloukta chejeʼewat Alemania, Focus münüsü, keejiaitpa maʼin sümüin wayuu süka shiʼitaanüin suluʼu Internet.

¿Pütüjaa aaʼu tü sümakat tü Wiwüliakat süchiki tü ooʼulakiraakat? Anuu tü sümakat.

¿Jamüsü sünüiki tü Wiwüliakat?

Anuu nünüiki Maleiwa namüin na israeliitakana: «Nnojoishi eeinjachin wanee wayuu jaʼaka eekai [...] nuuʼulakülin, eekai naainjülin kasa pülasü, eekai nunoujüin sünain tü kasa: «pülasü tia», sümakat wayuu, eekai nümaʼüjain wayuu, eekai niiʼirajirüin ouutsü jee eekai kayaawasein saaʼu tü alatajatkat otta yootoo namaa na ouktüshiikana [sükajee süseyuu wanee ouutsü]. Chi wayuu eekai naaʼinrüin tia, alerajünüshi nutuma Jeʼwaa» (Deuteronomio 18:10-12, NM). ¿Jamüsü nülerajaka Maleiwa tü ooʼulakiraakat?

Tü saainjakat Bárbara, shiiʼiyatüin wamüin sünain wainmain wayuu yootoko namaa na ouktüshiikana sükajee süseyuu wanee ouutsü. Tia, shia nekirajaka maʼin anain na wayuu suluʼukana waneeirua iküleesia. Naashin nayakana, ojuʼitüsü naaʼin chi ouktüshikai süpüla suʼunüin eemüin saaʼinpülee tü ouktüsükalüirua. Alawaa tia saashin tü Wiwüliakat, müsü shia: «Na ouktüshiikana, nnojotsü kasain natüjaain aaʼu» (Eclesiastés 9:5, NM). Süküjüinya wamüin müin nutunkakai maʼin aaʼin wanee wayuu ouktüle nia. Nnojotsü nütüjaain aaʼu tü alatakat nüʼütpünaa (Mateo 9:18, 24; Juan 11:11-14).b ¿Jamakaʼa eeka na wayuu yootokana namaa na ouktüshiikana sükajee süseyuu wanee ouutsü? ¿Jamakaʼa neʼraka naya naʼlapüinruʼu? ¿Jamakaʼa nepeinjaaka napüla? ¿Jaraliiche na yootokana amaa naya?

Yootoo sümaa naseyuu

Aʼwaatüsü tü yolujaakalüirua nümüin Jesuu saashin tü Wiwüliakat. Saashin tü karalouktakat Marcos 1:23, 24, müsü tü yolujaakalüirua nümüin Jesuu: «Aashin weʼraajüin pia». Müsia maaʼulu, shiʼraajüin pia tü yolujaakalüirua. ¿Jama piakai? ¿Kasa pütüjaaka aaʼu süchiki tü yolujaakalüirua?

Süpülapünaa nukumajüin Jeʼwaa tü wayuukalüirua, wainma aapiee nukumajaka. Pülashii naya suulia wayuu (Job 38:4-7; Hebreokana 2:6, 7, NM). Akumajuushii naya süpüla naaʼinrüin tü keeʼireekat naaʼin Maleiwa. Katchinshii jee kekiishii maʼin naya. Anuu nünüiki David nachiki: «Jiakana aapiee nümaʼanajeejanakana Jeʼwaa, katchinkana maʼin, aainjakana tü nümakat, juʼwaaja Jeʼwaa» (Salmo 103:20, NM).

Saashin tü Wiwüliakat, eeshi wanee aapiee antüshi nünainmüin Adán sümaa Eva sümaa nnojolin nuluwataain nia Jeʼwaa. Sükajee nimeejüin naya, nükayaleʼerüin nuulia Jeʼwaa. «Satanaa» jee «Yolujaa» münüshi nia sünainjee tü naainjakat. Aküjüi alawaa jee nüʼünüü Maleiwa maluʼulu tia (Génesis 3:1-6).

Eetaashii joo waneeinnua aapiee ashakanuwaashii iipünaajee, wayuushii süpüla naʼwayuuseinjatüin tü jieyuu anapüisükat maʼin (Judas 6; Génesis 6:1, 2). Müliasü maʼin saaʼin wayuu natuma otta natuma na nachonniikana. Joutsü maʼin eʼraa wayumüin saaʼu tü mmakat. Shiasaʼa amülouilin naya nutuma Maleiwa sükajee niʼitirüin wanee juya miyoʼushaata. Eesüjaʼa paapüirüle süchiki tia alatakat (Génesis 6:3, 4, 11-13).

Shiʼitapa tü juya miyoʼukat maʼin, neeʼiranajaain nakuwaʼipa, nnojoliinnapa wayuuin naya, awanuwaashii iipünaamüin. Nnojoliipejeʼe nuuʼulaain Maleiwa naleʼejüin eejanale naya paala. Süsalashii naainjala nutuma. Müshii neʼitaanaka aaʼin saʼaka piyuushi (2 Pedro 2:4, 5, NM). «Yolujaa», müsü tü Wiwüliakat namüin naya aapiee mojulaashiikana (Santiago 2:19). Naseyuushii maaʼulu na ooʼulaküliikana.

¿Kasa keeʼireeka saaʼin tü yolujaakalüirua?

Keeʼireesü naaʼin nakayaleʼerüin na wayuukana nuulia Jeʼwaa, chi Maleiwa shiimainshikai. Tütüshi maʼin chi ooʼulaküikai sutuma tü yolujaakalüirua shiiʼiree nnojoliinjanain nekirajaain na wayuukana sünain tü shiimainkat nüchiki Maleiwa otta nnojolinjachin neʼraajüin nia.

Wekirajaa jooluʼu sünain tü wanee kasa keeʼireekat saaʼin tü yolujaakalüirua. Wanaa sümaa niiʼiyatüin Satanaa nümüin Jesuu tü suumainkalüirua wayuu, müshi nia nümüin: «Müleka püsapainyoʼukale pia yaa tamülatuʼu sünain puʼwaajüin taya». Tü keeʼireekat naaʼin Satanaa sümaa tü yolujaakalüirua shia naʼwaajünüin nuulia Jeʼwaa. Nnojoipejeʼe jaa müin Jesuu nümüin, nia neʼe Jeʼwaa nuʼwaajaka nümüiwaʼa (Mateo 4:8-10).

¿Kasa saashajaaka akajee maaʼulu tü yolujaakalüirua? Aashajaasü sükajee maraaja koʼotüsü, lania, süürüla kepein apütaaka suluʼu iita, tü waraaja tarot münakat, lapü otta süka tü horóscopo münakat. Naainjüin tia süpüla sunoujüin wayuu nanain. ¡Jalia pia naaʼin! Nnojotsü anain wooʼulakirüle süchiirua wanee kasa. Süpüla nnojolinjachin nuʼwaajünüin Jeʼwaa, tütüshii maʼin na ooʼulaküliikana sutuma tü yolujaakalüirua. Shiasaʼa nnojoire nujutuuin wanee wayuu sajapuluʼu tü yolujaakalüirua, müliashi sutuma otta shikeʼeja aaʼinchi. Piale alatüin amüin tia, ¿kasa anaka süpüla paaʼinrüin?

Tü anakat süpüla paaʼinrüin

¡Jalia pia saaʼin naseyuu na ooʼulaküliikana! Nüʼünüüsaʼa naya Maleiwa otta najaʼttireena naya (Judas 6). Nayaluʼushii na wayuu ouktüinnapakana otta aküjüshii naya alawaa. ¿Jamüsüjeʼe paaʼin pütüjaale saaʼu nümaʼülapaleein pia wanee paʼaleewain? ¿Kasaje paainjaka pütüjaale saaʼu ataüjaaire wayuu chi paʼaleewajaakai amaa suluʼu Internet? Mojulaaleesia maʼin tü yolujaakalüirua. Nnojo nanainpünaain pia. ¿Kasa paaʼinrajatka süpüla tia?

Jamüshiijaʼa na wayuu chajanakana Éfeso, naʼajüin tü nakaraloukse sukuwaʼipamaajatkat ouutsü. Naainjüin shia süchikijee nekirajaain sünain tü Wiwüliakat. Mayaapejeʼe kojutüin maʼin shia napüleerua, naʼajüin «suʼupala süpüshuaʼa tü wayuukalüirua» (Aluwataaushikana 19:19, 20). Nnojotpejeʼe shiain neʼe nooʼulaküin aka na wayuukana tü karalouktakat, tü laniakat otta tü taapüla wiija münakat. Eesia wainma pütchi eʼitaanaka suluʼupünaa Internet. Paʼajüinjatü süpüshuaʼa tü kasa sünainpünaakat tü yolujaakalüirua, tü eekat pümaʼana.

¿Sotushi paaʼin Joaquín sümaa Bárbara, na waashajaakana achiki paala? Neʼrüin süka tü waraajakat nantajanain nanainmüin wayuu mojulaashii otta naaʼinmajiraainjatüin nakuwaʼipa noulia. Anta müshiʼiya na wayuu neʼrakana paala süka tü waraajakat. Shia Connie sümaa Gudrun, waneeinnua aküjülii pütchi nüchiki Jeʼwaa. Naküjüinjaʼa tü pütchi anasü nümaʼanajeejatkat chi Maleiwa shiimainshikai. Jülüjaka naaʼin tü namakat na wawalayuukana. Naashajaʼalaa namaka süchiki tü kasa naaʼinrakat na ooʼulaküliikana, naküjaka na wawalayuukana tü sümakat tü Wiwüliakat süchiki tia. Niasaʼa Joaquín sümaa Bárbara, nacheküin ekirajawaa sünain tü Wiwüliakat.

Nnojoliinnapa naya sünainpünaain tü kasa sümaʼanajeejatkat tü yolujaakalüirua. Nanainjee na aküjüliikana pütchi, nayaawata aaʼu mojeerüin sümüin tü yolujaakalüirua nekirajaain sünain tü Wiwüliakat. Wainmaitpa kasa mojusü alataka nümüin Joaquín sümaa Bárbara. Müliasü maʼin naaʼin sutuma tü yolujaakalüirua. Mmoluwaishii naya saʼwai. Anashii naya nakolojoopa suluʼumüin wanee piichi naata. Neʼitaain maʼin naaʼin sünain tü pütchi makat: «Katchinshi taya [nutuma Maleiwa] süpüla tü kasakat süpüshuaʼa» (Filipos 4:13, NM). Nükaaliinjain Jeʼwaa naya. Shiasaʼa mapa, nnojoliinnapa müliain sutuma tü yolujaakalüirua. Maaʼulu yaa, aʼyataashi Joaquín sümaa Bárbara nümüin Jeʼwaa.

Anuu sünüiki tü Wiwüliakat namüin na aneekana akuwaʼipa: «Anakaja jüüjüüle jia nümüin Maleiwa waneepia. Müleka [jüʼleejüle] chi Yolujaakai, oʼunamaateechi juulia. Je müleka jürütkaale nünainmüin Maleiwa, arütkaajeechi nia jünainmüin» (Santiago 4:7, 8). Pücheküle tia, nükaaliinjeechi pia Maleiwa noulia na yolujaakana. Süchikijee tü alatakat nümüin Joaquín sümaa Bárbara müshii naya: «Nia Jeʼwaa akaaliinjaka [waya]» (Salmo 121:2, NM).

[Footnotes]

[Epiikürape suluʼu süpanaka 29]

Mojusü nukuwaʼipa wanee wayuu noʼuluʼu Maleiwa sünainpünaale nia tü naaʼinrakat na ooʼulaküliikana

[Epiikürape suluʼu süpanaka 30]

«Müleka jürütkaale nünainmüin Maleiwa, arütkaajeechi nia jünainmüin.»(SANTIAGO 4:7, 8)