Katüsü soʼu wayuu sutuma nüsoʼiraain aaʼin Jesuu

NNOJOISHI ouktüin Jesuu süpaʼa mmaka, wanainpünaasü tü naainjakat. Nüküjüin Pablo jamüin wanainpünaaka shia. Müshi nia: «Shiimüin maʼi sünain nüsoʼiraain aaʼin Cristo süchikijee ouktaa. Je sükajee süsoʼiraain naaʼin, watüjaa aaʼut sünain süsoʼiraainjateerüin waaʼin wayakanaya süchikijee ouktaa. Soto jaaʼin nüchiki Adán paala sümaiwa. Ouktüshi nia saaliijee naainjala. Maleeirümaʼaka ouktüin wayuu süpüshua saaʼu saainjala maa aka naaʼin. Otta nünainjee Cristo, suuntüin jooluʼu wayuu katüin soʼu. Osoʼiraajeerü waaʼin waya anoujashiikana wapüshua süka wanaawajiraain waaʼin nümaa» (1 Corinto 15:20-22).

Asoʼiraasü naaʼin Jesuu 16 nisán soʼu juyaka 33, sükalioʼujatü neʼikajaain na judíokana nümüin Jeʼwaa tü palajatkat süchon naʼttia. Müshi Pablo, «watüjaa aaʼut sünain süsoʼiraainjateerüin waaʼin»; shia nüküjeeka achiki süsoʼiraainjateerüin saaʼin tü wayuukalüirua.

Nüküjüin Pablo kasain eein sutuma nüsoʼiraain aaʼin Jesuu: «Soto jaaʼin nüchiki Adán paala sümaiwa. Ouktüshi nia saaliijee naainjala. Maleeirümaʼaka ouktüin wayuu süpüshua saaʼu saainjala maa aka naaʼin. Otta nünainjee Cristo, suuntüin jooluʼu wayuu katüin soʼu». Ouktüsü wayuu süpüshuaʼa saaliijee kaainjalain Adán. Süka ouktüin Jesuu sümaa nüsoʼiraain aaʼin, taashisü tü wayuukalüirua suulia kaainjalaa jee ouktaa. Lotusü maʼin nünüiki Pablo suluʼu Roma 6:23: «Aluʼujasa chi wayuu ayatakai süchepchiain kaainjalaa, shiimüin ouktajachin nia saaliijee [...]. Otta chi eekai saʼaniraain nukuaippa nümaa Cristo Jesús chi Wasenyotsekai, eeʼiranajaweerü naaʼin süpüla chainjachin nia nümaa Maleiwa waneepia».

Nüküjüin Jesuu kasain eein sutuma ouktüin nia sümaa nüsoʼiraain aaʼin. Majiraashi nia nüchiki: «Anuu sukuaippa saalii wayuu sainküin mmakat süpüshua nüpüla chi Maleiwakai: Naapüin chi Nüchonkai waaʼu, chi waneeshikai Nüchoin. Niasaʼa chi eekai nünoujain nünain. [...] Nnojoleechi amüloulin süchikijee ouktaa, eejeechi nümaa Maleiwa süpüla kaʼikat süpüshua» (Juan 3:14-16).

¡Müinnamaʼaleʼeya nnojoliin ouktüin waya! (Alateetkat Mapeena 21:3, 4.) ¡Anataʼaleesüjaʼa maʼin tü naapüinjatkat wamüin Maleiwa! Müshi wanee wayuu süchiki tia: «Sotusü waaʼin sutuma tü woowirakat, yüüʼülaa nümüin wanee wayuu ouktapa nia. Müsia neʼe tü ouktaakat, yüüʼülaa meerü süka wasoʼiraajeenain aaʼin». Shiimain kateerüin woʼu süka nüsoʼiraain aaʼin Jesuu.