SUSOUKTAKA EʼIPAJEE TÜ WIWÜLIAKAT

¿Eesü süpüla piyaawatüin saaʼu tü sümakat tü Wiwüliakat?

Nünüiki Maleiwa tü Wiwüliakat. Müsü aka saaʼin wanee karaloukta nüshajaka wanee wayuu aipürai nümüin wanee nüchon (2 Timoteo 3:16). Yala, nüküjüin Maleiwa tü waaʼinrajatkat süpüla watalateʼerüin naaʼin, nüküjüin jamüin nuuʼulaaka sülatüin kasa mojusü sümüin wayuu otta nüküjüin tü kasa anasü naaʼinreetkat napüleerua na wayuukana. Wainma maʼin wayuu nnojoleenaka ayaawatüin saaʼu tü sümakat tü Wiwüliakat naashin. Tia, shia sutuma nnojoluin lotuin tü kasa nekirajakalü anain na shikiipüʼükana tü iküleesiakalüirua (Aluwataaushikana 20:29, 30).

Keeʼireesü naaʼin Jeʼwaa sütüjaanüinjatüin aaʼu tü shiimüinkat nüchiki, müsüjeseʼe nüshajirüin tü Wiwüliakat sümaa mapüleein shia. (Paashajeʼera 1 Timoteo 2:3, 4.)

¿Kasa paaʼinrajatka süpüla piyaawatüin saaʼu tü sümakat tü Wiwüliakat?

Nuluwataain Jeʼwaa Jesuu süpüla nikirajüinjatüin wayuu sünain tü sümakat tü Wiwüliakat (Lucas 4:16-21). Nikirajüin Jesuu na wayuukana sükajee tü Ashajuushikat nüchiki Maleiwa. (Paashajeʼera Lucas 24:27, 32, 45.)

Nüneeküin Jesuu na anoujüshiikana süpüla ayatüinjatüin süküjünüin pütchi (Mateo 28:19, 20). Ekirajüshii wayuu naya nüchiki Maleiwa. Piyaawateere saaʼu tü sümakat tü Wiwüliakat, paashajaa namaa na aküjüliikana pütchi nüchiki Jeʼwaa. (Paashajeʼera Aluwataaushikana 8:30, 31.)