Aneerü pukuwaʼipa paashajeʼerüle tü Wiwüliakat
«Tacheküin taaʼinreein tü kasa anasü nuluwataakat anain Maleiwa.» (ROMA 7:22)
1-3. ¿Kasa niʼraka wanee wayuu sutuma nikirajaain sünain tü Wiwüliakat sümaa naaʼinrüin tü sümakat?
«TAAPAWALIN weinshi tü analuʼutkat nümüin Jeʼwaa saaʼu nükaaliinjüin taya süpüla tayaawatüin saaʼu tü sümakat tü Wiwüliakat», müsü sünüiki wanee wawala laülaairü. Saashajeʼerüirü tü Wiwüliakat maʼaka pienchitua shikii otta ayatüinjatia saainjüin tia saashin. Saashin wanee wawala majayüt, shiimainshi eein Jeʼwaa sümüin süka saashajeʼerüin tü Wiwüliakat otta aleewasü maʼin shia nümaa. Müsü sünüiki: «Talatsü maʼin taaʼin sutuma tia».
2 Müshi Pedro wamüin: «Shia anaka müleka keeʼireere jaaʼin tü pütchi shiimüin nüchikimaajatkat chi Oʼtteʼerüikai, maa aka naaʼin wane joʼuu sünain keeʼireein naaʼin süchira nii» (1 Ped. 2:2). Na wayuu ekirajaakana sünain tü Wiwüliakat sümaa naaʼinrüin tü sümakat, jimatüsü tü naaʼinkat otta natüjaa aaʼu tü keeʼireekat naaʼin. Aleewashii naya namaa na wayuu aikana apüla Maleiwa otta aʼyataakana nümüin. Müsüjeseʼe wanaawain naaʼin sümaa tü nümakat chi aluwataaushikai Pablo: «Tacheküin taaʼinreein tü kasa anasü nuluwataakat anain Maleiwa» (Roma 7:22). Anuu sooʼomüin süpüshi tü kasa piʼreetkat sutuma pikirajaain sünain tü Wiwüliakat.
3 Pikirajaale nüchiki Jeʼwaa otta Jesuu, aijeena maʼin püpüla otta aijeena püpüla na wayuukana. Süka pikirajaain sünain tü Wiwüliakat, pütüjaaitpa aaʼu nuʼtteʼereenain Jeʼwaa na wayuu aʼyataakana nümüin. Aküjüshi pia wanee pütchi atütüleʼeraka saaʼin tü wayuukalüirua. Nükaaliinjeechi pia Jeʼwaa sünain ekirajaa tü wayuukalüirua sünain tü shikirajakalü anain tü Wiwüliakat.
JÜLÜJA PAAʼIN TÜ PAASHAJEʼERAKAT
4. ¿Kasa sünainpünaaka aashajeʼeraa tü Wiwüliakat sümaa jiattain wanüiki?
4 Niyoukta achikirü Jeʼwaa saashajeʼennüin tü Wiwüliakat sümaa sülatinna sülatinna sümünüin tü wersiikulokot. Müshinka Maleiwa nümüin Josué: «Paashajeʼerüinjatü weinshi tü pütchi nuluwataakalü anain Maleiwa. Paashajeʼerüinjatü sümaa jiattain pünüiki saʼwai jee soʼukai» (Jos. 1:8, NM; Sal. 1:2). ¿Paashajeʼerüinjatü tü Wiwüliakat sümaa jiattain pünüiki? Nnojo. Tü aküjüneekalü achiki shia nnojoluinjatüin pülatira pülatira pümüin tü wersiikulo paashajeʼerakat. Paashajeʼerüle sümaa jiattain pünüiki, eejeerü paaʼin sünain wanee wersiikulo atütüleʼeraka paaʼin sümaa sükaaliinjüin pia. Jiatta putuma saashajeʼeria tia pütchikat süpüla süntüin suluʼumüin paaʼin. ¿Jamüsü müinjatka putuma sukuwaʼipa? Piyaawatüle saaʼu tü nümakat Maleiwa, mapüleejeerü pümüin oonowaa sümaa tü nümakat.
5-7. Naashajeʼerüle wanee anoujüshi tü Wiwüliakat sümaa jiattain nünüiki, ¿jamüshi sükaaliinjeechika nia süpüla: (1) wulein nukuwaʼipa noʼuluʼu Maleiwa? (2) kamaneein nia otta nnojolin naashichijaain? (3) naaʼinmajüneechin nutuma Jeʼwaa suʼunnaa tü müliaa niʼrakat?
5 Anasü maʼin paainjüle tia wanaa sümaa paashajeʼerüin wanee karaloukta kapüleeka pümüin suluʼujee tü Wiwüliakat. Jülüjataa paaʼin wanee jimaʼai anoujüshi aashajeʼerakai tü Wiwüliakat otta shia naashajeʼeraka tü karalouktakat Oseas. Jülüjaʼattaasü naaʼin tü sümakat Oseas 4:11-13 süchikijee naashajeʼerüin shia sümaa jiattain nünüiki (paashajeʼera Oseas 4:11-13). ¿Jamüsü naainjaka tia? Shia süka nüpüleeruaanüin aaʼin eere koleejiain nia shiiʼiree eeweein nukuwaʼipa sümaa jieyuu. Majiraashi nia sutuma tia pütchikalüirua: «Niʼrüin Jeʼwaa tü naainjakat wanee wayuu; jaʼitairü naainjüin shia ojuunaa. Nnojotpejeʼe mojeein naaʼin Jeʼwaa tatuma». Nüneeküin chia wawalakai wulein nukuwaʼipa noʼuluʼu Maleiwa.
6 Eetaasü joo wanee wawala aashajeʼeraka tü Wiwüliakat otta süntaka sünainmüin Joel 2:13 (paashajeʼera Joel 2:13). Süka saashajeʼerüin tia pütchikat sümaa jiattain sünüiki, jülüjüsü saaʼin tü saainjüinjatkat süpüla anamiain shia sümaa sümüliajülüin, nnojoluin saashichijaamaatüin otta kamaneein shia maʼaka naaʼin Jeʼwaa. Makalaka suuʼulaainjatüin joo suulia shimeeʼerainpalain chi suʼwayuusekai otta na wayuukana; nnojoluinjatü joo airuʼuluin tü sünüikikat.
7 Eetaashi joo wanee wawala achajaakai süchiki aʼyatawaa otta shapaasü naaʼin saaʼu tü shiküinjatkalü aaʼu nuʼwayuuse sümaa nüchonnii. Naashajeʼerapa Nahúm 1:7 sümaa jiattain nünüiki, nütüjaa aaʼuchi Jeʼwaa sünain müin nia maʼaka saaʼin wanee ounjulaaya. Otta nütüjaa aaʼu naaʼinmajüin Jeʼwaa chi anoujüshikai suʼunnaa tü müliaa niʼrakat. Sütütüleʼerüin naaʼin chia wawalakai tia pütchikat, naashajeʼerataalaka joo wersiikulo 15 (paashajeʼera Nahúm 1:15). Niyaawata aaʼu chi wawalakai naaʼinmajüneechin nutuma Jeʼwaa ayatüle nüküjüin pütchi suʼunnaa tü müliaa niʼrakat. Ayatshia achajaain aʼyatawaa sümaa nnojoluin motuin naaʼin tü aküjaakat pütchi.
8. Püküja wanee pütchi anakalü maʼin püntaka anain suluʼu tü Wiwüliakat.
8 Tü waashajaakalü achiki suluʼujeejatü shia tü karaloukta suluʼukat tü Wiwüliakat sümaa müin kapüleekai saaʼin wamüin. Sutuma waashajeʼerüitpain waneeirua pütchi suluʼujee Oseas, Joel otta Nahúm sümaa waküjüin tü shikirajakalü anain, keeʼireejeerü paaʼin paashajeʼerüin waneeirua wersiikulo sümaa jiattain pünüiki. Wainma tü shikirajakalü anain waya tia karalouktakalüirua. Tü Wiwüliakat müsü aka saaʼin wanee kasa wainmaka aluʼu korolo kojutsü, paashajeʼera shia süpüla püntüin sünain tü pütchi anainjatkalü atuma pukuwaʼipa otta katchinjatka atuma punoula.
PIYAAWATÜ SAAʼU TÜ PAASHAJEʼERAKAT
9. ¿Kasa waaʼinrajatka süpüla wayaawatüin saaʼu tü nüchekakat Maleiwa?
9 Choʼujaasü paashajeʼerüin weinshi tü Wiwüliakat sümaa piyaawatüin saaʼu tü paashajeʼerakat. Makalaka paashajeʼerüinjatüin tü karaloukta naapakat chi achepchieekai. Püntapa sünain nünülia wanee wayuu, wanee mma jee waneeirua kasa paashajeʼerapa tü Wiwüliakat, püchajaa shia suluʼu tia karalouktakalüirua. Jee pütüjaweere saaʼu jamüin pünainpünaaka wanee kasa shikirajaka anain tü Wiwüliakat, püsakira na laülaashiikana jee niale wawala laülaakai aaʼin sünain anoujaa. Wekirajaa sünain tü naainjakat wanee wayuu süpüla kooʼomüin tü nunoulakat otta weʼreetka choʼujaain kooʼomüin tü watüjaakalü aaʼu. Apolos nünülia chia wayuukai.
10, 11. (1) ¿Kasa akaaliinjünaka anain Apolos süpüla pansaain tü nikirajakalü anain? (2) ¿Kasa shikirajaka anain waya nukuwaʼipa Apolos? (Paashajeʼera tü pütchi kanüliakat: «¿Pansaasü sukuwaʼipa tü pikirajakalü anain?».)
10 Chi kanüliakai Apolos, nia wanee anoujüshi judío «eʼraajashanta[kai] tü karaloukta nüchikimaajatkat Maleiwa» otta eejai chi naaʼinkai Maleiwa naaʼu. «Lotüsü maʼi süpüshuaʼa tü nütüjaakat aaʼu nooʼopünaa Jesús, mayaainjeʼe shiain neʼe nütüjaain aaʼu, tü nikirajakat anain Juan wanaa sümaa nuwoutisaajüin wayuu süpüla ayaawajawaa suulia saainjala». Nnojotsü pansaain tü nikirajakalü anain Apolos süchiki tü woutiisaakalü süka nnojoluin nütüjaain maʼin saaʼu. «Shiasaʼa naapapa Aquila sümaa Priscila tü nikirajakat anain, nakatalüin nia nümüiwa süpüla naküjain süchikü nümüin tü kasa nnojoliyütkalia nütüjaain aaʼu sooʼopünaa tü wopu niʼitaakat Maleiwa.» (Aluw. 18:24-26.) ¿Jamüsü nukuwaʼipa Apolos sutuma nükaaliinjünüin?
11 Nuʼunaka Apolos Éfesojee chamüin Acayamüin. Müsü tü Wiwüliakat nüchiki: «Nüntapa Acayamüin, nükaaliijain maʼi na anoujashiikana, na ainkakana anoujaa sükajee anamiain Maleiwakai namüin. Je süka wane nünüikü kaaʼusü maʼi, peʼipoloojiraashi nia sümaa tü judíokalüirua suʼupala süpüshuaʼa tü wayuukalüirua. [...] Otta sükajee tü karaloukta nüchikimaajatkat Maleiwa, niiʼiyatüin sümüin süpüshuaʼairua sünain niainya Jesús chi Nüneekajalakai Maleiwa» (Aluw. 18:27, 28). Pansaaitpa tü nikirajakalü anain Apolos süchiki tü woutiisaakalü makalaka nükaaliinjüin na eiwaʼaliikana anoujüin süpüla kooʼomüin tü nanoulakat. ¿Kasa shikirajaka anain waya nukuwaʼipa Apolos? Wayaawatee aaʼu tü shikirajakalü anain tü Wiwüliakat. ¿Jama wakaaliinjünüle nutuma wanee wawala laülaakai aaʼin sünain anoujaa? Nnojoluinjatü pülayaain waaʼin suulia tü nümakat wamüin. Naainjüin tia shiiʼiree pansaain tü wekirajiakat. Waainjüle tia, loteerü maʼin sukuwaʼipa tü waʼyataainkat nümüin Maleiwa.
PÜKAALIINJA NA WAYUUKANA
12, 13. Püküja jamüinjatüin watuma nakaaliinjia na wayuukana sükajee tü Wiwüliakat.
12 Eesü süpüla anain nakuwaʼipa na wayuukana watuma sükajee tü wekirajaakalü anain maʼaka naainjüin shia Áquila sümaa Priscila otta Apolos. ¿Jamüsü paaʼin sutuma pükaaliinjüin wanee wayuu süpüla kooʼomüin nunoula? Laülaashire pia suluʼu tü outkajaaleekat, ¿jamüsü paaʼin sutuma naapüin pümüin tü analuʼutkat wanee wawala saaʼu pükaaliinjüin nia sükajee tü Wiwüliakat? Talatsü waaʼin weʼrüle anain nakuwaʼipa na wayuukana sutuma wakaaliinjüin naya sükajee tü Wiwüliakat.a ¿Pükaaliinjeein na wayuukana sükajee tü Wiwüliakat? Anuu sukuwaʼipainjatka putuma.
13 Na israeliita eejanakana nükalioʼu Elías nnojotsü natüjaain aaʼu jaralinjachin naʼwaajüin; niale Jeʼwaa jee shiataapa tü wanee maleiwayaasükalüirua. Tü nümakat Elías namüin na israeliitakana eeshi süpüla sükaaliinjüin wanee wayuu nnojoikai kooʼomüin atuma nunoula (paashajeʼera 1 Reyes 18:21). ¿Jama eere wanee wayuu nnojoika anoujeein nünain Jeʼwaa sutuma mmoluin nia seema tü nameetkat na nüpüshikana otta na naʼaleewainyuukana? Pükaaliinja nia sükajee tü sümakat Isaías 51:12, 13 (paashajeʼerapa).
14. ¿Kaseerü sotoka atuma paaʼin wanee wersiikulo süpüla pükaaliinjüin na wayuukana?
14 Wanta anainrü suluʼu tü Wiwüliakat tü pütchi atütüleʼerakat waaʼin, anoukteʼeraka wakuwaʼipa jee atalateʼeraka waaʼin. Eesü jülüjüle paaʼin kasain paainjüinjatüin süpüla sotomaatüinjatüin paaʼin wanee pütchi choʼujaapa shia pümüin. Paashajeʼera tü Wiwüliakat otta jülüja paaʼin waneepia tü nümakat pümüin Maleiwa yala suluʼu. Paainjüle tia, pütüjeerü apüleerua tü sümakat wanee wersiikulo otta sotomaateerü shia paaʼin nutuma chi naaʼinkai Maleiwa (Mar. 13:11; paashajeʼera Juan 14:26).b
15. ¿Kasa akaaliinjeechika pia süpüla piyaawatüin saaʼu tü Nünüikikat Maleiwa?
15 Puchunta kaaliinwaa nümüin Jeʼwaa süpüla pikeraajüin tü piʼyataainkat nümüin maʼaka naainjüin shia Salomón (2 Crón. 1:7-10). Süpüla piyaawatüin saaʼu nukuwaʼipa Maleiwa sümaa tü nüchekakat, jülüja maʼi paaʼin waneepia tü Nünüikikat Maleiwa maʼaka naainjüin paala shia na nünüikimaajanakana (1 Ped. 1:10-12). Müshi Pablo nümüin Timoteo: «Iche [...] pia sünain tü pütchi shiimüin ekirajünakat anain pia» (1 Tim. 4:6). Paainjüle tia, atüjeechi pia akaaliinjaa wayuu otta kooʼomüinjeerü tü punoulakat.
SAAʼINMAJÜIN WAYA TÜ NÜNÜIKIKAT MALEIWA
16. (1) ¿Kasa naainjaka na anoujüshii chajanakana Berea sutuma «naashajeʼerawalin waneepia tü karaloukta nüchikimaajatkat Maleiwa»? (2) ¿Jamüsü choʼujaaka waashajeʼerüin weinshi tü Wiwüliakat?
16 Kiʼrashii na anoujüshii chajanakana Berea «sünain naashajeʼerawalin waneepia tü karaloukta nüchikimaajatkat Maleiwa». Wanaa sümaa nüküjüin pütchi Pablo chayaa, naʼwanaajireʼerüin tü natüjaakalü aaʼu sümaa tü aküjünakat namüin «süpüla natüjaainjatüin saaʼu müleka müleʼeya tü münakat namüin». Neʼrapa shiimain tü nümakat Pablo wainma na anoujakana (Aluw. 17:10-12). Tü nakuwaʼipakat shikirajüin waya sünain kooʼomüin wanoula sutuma waashajeʼerüin weinshi tü Wiwüliakat. «Süka tü wanoulakat, atüjaashii waya naaʼu chi Maleiwakai sünain naaʼinrüinjatüin tü kasa anasü nüküjakat achiki wamüin», otta choʼujaasü maʼin shia wamüin süpüla katüin woʼu suluʼu tü paʼaraiisükat (Heb. 11:1).
17, 18. (1) ¿Jamüsü waaʼinmajaka tü waaʼinkat sutuma kanoulain waya otta aipüraliin waya? (2) ¿Jamüsü anaka wakuwaʼipa sutuma tü waʼatapajakat?
17 Naashin Pablo kanoulainjana waya, aipüraliinjana waya otta kaʼatapalainjana waya. Nüküjüin waʼatüinjatüin wanain tü sheʼin kachueerakat waaʼintoʼupünaainjatka maʼaka naʼatüin wanee surulaat tü nüsheʼin kachueera naaʼintoʼupünaakat suulia naʼapülaʼü na nüʼünüükana. Jee müsia waʼatüinjatü wanain tü uwon kachueerakat maʼaka naʼatüin wanee surulaat tü uwon kachueerakat suulia sheewaʼalaain nikii (1 Tes. 5:8, NM). Müshiʼiya wayakana, waaʼinmajüinjatü tü waaʼinkat. Wanoujüle maʼin sünain tü eeinjateetkat nutuma Maleiwa otta aire nia wapüla sümaa tü wayuukalüirua, waaʼinmajeerü tü waaʼinkat. Otta wachajaajeerü sukuwaʼipa süpüla talatüin naaʼin wamaa.
18 Aashajaashi Pablo süchiki tü uwon kachueerakat, tia shia waʼatapajüinjanain woʼtteʼennüin. Sümaiwa paala kakuwomapuʼushii na surulaatkana suulia sheewaʼalaain tü nekiikat. Watüjaale saaʼu woʼtteʼennüinjanain nutuma Maleiwa nnojoleerü jülüjüin waaʼin kasa mojusü. Watüjaa aaʼulu tü waʼatapajakat müshiijeseʼe nnojoliin jüüjüüin waya namüin na ooʼulaakana Jeʼwaa süpüleerua nekirajüin alawaa. Tü pütchi mojusü naashajaakalü achiki müsü aka saaʼin wanee ayuulii ouktasiroʼu (2 Tim. 2:16-19). Tütüsü waaʼin sutuma tü waʼatapajakat otta saaʼinmajüin waya suulia waainjüin kasa eekai yarüttüin.
SÜPÜLA KATÜIN POʼU WANEEPIA
19, 20. ¿Jamüsü kojutka wamüin tü Wiwüliakat? ¿Kasa weeʼiyataka aka kojutüin shia wamüin? (Paashajeʼera tü kanüliakat: «Nnojotsü nuʼtchejaain amaa tü choʼujaakat tamüin».)
19 Wanoujüinjatü maʼin anain tü sümakat tü Wiwüliakat; yaaʼaleeka sülüʼülaapa maʼin sajaʼttüin tü kasakalüirua. Wanoukteʼerüin wakuwaʼipa sutuma tü sümakat tü Wiwüliakat otta eejüsü waaʼin sutuma suulia waainjüin kasa mojusü. Sütütüleʼerüin waaʼin tü Wiwüliakat makalaka nnojoleenain jamajüin waya sutuma tü niʼitaakat wapüleerua Satanaa otta na manoujüinsaliikana. Ayateena waya süchiirua tü kataakalü oʼuu süka nuʼunirüin wakuwaʼipa Jeʼwaa sükajee tü Wiwüliakat.
20 Soto paaʼin keeʼireein maʼin naaʼin Maleiwa «suʼtteʼennüinjatüin wayuu süpüshua». Eeshii waya namaa na wekirajüinkana naʼaka na wayuu oʼtteʼennüinjanakana. Na wayuu kateekana oʼu natüjaainjatü saaʼu tü shiimüinkat (1 Tim. 2:4). Makalaka waashajeʼerüinjatüin tü Wiwüliakat otta woonooinjanain sümaa tü sümakat. Waashajeʼerüle tü Wiwüliakat waneepia, weeʼiyatüin kojutüin maʼin wamüin tü shiimain suluʼukat tü Nünüikikat Maleiwa (Juan 17:17).
a Nnojotsü waashajeʼerüin tü Wiwüliakat namüin na wayuukana süpüla wapüleeruain naaʼin otta weimmolojuin naya. Kamaneeinjana waya namüin na wekirajüinkana maʼaka kamaneein wamüin Jeʼwaa (Sal. 103:8).
b Eesü shiale neʼe sotuin paaʼin tü sümakat wanee wersiikulo sümaa motuin paaʼin tü kapiitulo otta wersiikulo kaluʼukat shia. ¿Kasakaʼa paainjüinjatüin sülatüle pümüin tia? Sajaʼttiamüin tü Wiwüliakat Traducción del Nuevo Mundo, puusüteerü anain tia pütchikalüirua. Jee eesü süpüla püchajaain shia suluʼu Watchtower Library jee shiale suluʼu Gran Concordancia de la Traducción del Nuevo Mundo de las Santas Escrituras.