SUSOUKTAKA EʼIPAJEE TÜ WIWÜLIAKAT

¿Naapüinche Maleiwa nanüiki napüshuaʼa na wayuukana?

Naapüin Maleiwa sünüiki wayuu saʼakajee tü eʼirukuukat süpüshuaʼa (Salmo 145:18, 19). Saashin tü Wiwüliakat waküjüinjatü nümüin Maleiwa süpüshuaʼa tü shapaakalü atuma waaʼin (Filipos 4:6, 7). Nnojotpejeʼe nücheküin weiteʼerakuʼu wamüinjatüin wanüiki. (Paashajeʼera Mateo 6:7, TNM.)

Nnojotsü naapüin Maleiwa nanüiki na wayuu mojutkana amüin tü nuluwataakalü anain naya (Proverbios 28:9). Jamüsüjaʼa sümaiwa paala, nnojotsü naapüin Maleiwa nanüiki na israeliita uwomuyuukana. Süpüla naapüin Maleiwa wanüiki eeinjatü tü kasa waaʼinrüinjatkat. (Paashajeʼera Isaías 1:15.)

¿Kasa waaʼinrajatka süpüla naapüin Maleiwa wanüiki?

Nnojoleerü naapüin Maleiwa wanüiki manourale waya (Santiago 1:5, 6). Wanoujüinjatü sünain eein nia otta jülüjüin waya naaʼin. Süpüla wanoujüin tia, wekirajaainjatü anain tü Wiwüliakat süka shiain wayaawatüin atuma tü shiimainkat. (Paashajeʼera Hebreokana 11:1, 6.)

Nnojotsü yaletayaainjatüin waaʼin woʼuraajapa nümüin Maleiwa. Oʼuraajüinjana waya nümüin süka süpüshuaʼa waaʼin maʼakaapuʼu naainjüin shia Jesuu (Lucas 22:41, 42). Suulia waküjüin nümüin Maleiwa tü naaʼinrajatkat, shia anaka aluʼu wayaawatüle saaʼu tü nuluwataakalü anain waya sükajee waashajeʼerüin tü Wiwüliakat. Müle shia watuma, achunteena waya nümüin wanaapünaa sümaa tü nüchekakat. (Paashajeʼera 1 Juan 5:14, 15.)