Motoleesia naaʼin Jeʼwaa tü jaainjalakat

Müshi Edward Herbert, wanee ashajüi süchiki kasa alatüirü: «Chi nnojoikai motuin aaʼin naainjala wanee wayuu müsü nujuttirakai saaʼin wanee puente eepünainjachire nülatüin». ¿Kasa nüküjeeka achiki? Nnojorüle motuin waaʼin naainjala wanee wayuu, nnojoleerü motuin naaʼin tü waainjalakat (Mateo 7:12). Eepejeʼe wanee kasa motuinjatka anainjee waaʼin saainjala wayuu. Nüküjüin tia Pablo (Paashajeʼera Colosas 3:13, NM).

Saaʼu wayuuin kaainjaralii waya, eesü mojule saaʼin wayuu watuma jee wayale mojuin aaʼin natuma (Roma 3:23). ¿Kasa waaʼinrajatka süpüla nnojoluin mojujiraain waya namaa na waneeinnua? Naashin Pablo, wachecherüinjatü waaʼin suulia waashichijaain otta motuinjatü waaʼin naainjala na waneeinnua. Mayaapejeʼe kakaliairüin tü nüshajakat, anajiraajeena waya woonoole sümaa. Wekirajaa sünain tia pütchikat.

«Nnojo jaashichijaajiraain.» Saashin tü pütchi ashajünakat süka griego, wachecherüinjatü waaʼin suulia waashichijaain nooʼomüin na waneeinnua kaainjarale naya woulia. Saashin wanee pütchi ashajünaka süchiki tia wersiikulokot, nnojoishii aashichijaain sooʼomüin wayuu na anoujüshiikana, jaʼitairü saainjünüin namüin wanee kasa üttaka atuma naaʼin. Makalaka wachecherüinjatüin waaʼin suulia waashichijaajiraain. Eerejeʼe wanee kasa mojuka sümüin wayuu sünain tü wakuwaʼipakat, nnojoishii waya aashichijaainjanain nooʼomüin na aainjakana kasa mojusü wamüin. ¿Kasakaʼa waainjüinjatüin kaainjarale wanee wayuu woulia?

«Motoleeya jaaʼin naainjala chi eekai kaainjalain juulia.» Naashin wanee wayuu ashajakai süchiki tü Wiwüliakat, tü wersiikulo ashajünakat süka griego sünainpünaasü amülialaa aaʼin. Nnojotsü sünainpünaain neʼe motuin waaʼin saainjala wayuu. Saashin wanee karaloukta, sünainpünaasü aainjaa kasa anasü sümüin wayuu. Sümülialaale waaʼin naalii na waneeinnua, moteerü waaʼin naainjala jaʼitairü mojuin maʼin tü naainjakat wamüin. ¿Jamüsü motuinjatka waaʼin naainjala na waneeinnua? Süka eein süpüla kaainjalain waya noulia otta choʼujaweerü motuin naaʼin tü waainjalakat.

«Maʼaka motoleein naaʼin Jeʼwaa jaainjala, maaʼaya jutuma jiakana.» Sutuma motoleein naaʼin Jeʼwaa tü waainjalakat, motoleeinjatü waaʼin naainjala na waneeinnua (Miqueas 7:18). Jülüja waaʼin tü naainjakat Jeʼwaa napüleerua na wayuu ooʼulaakana suulia naainjala. Nnojoishi müin aka waaʼin Jeʼwaa, maainjalasai nia. Makalaka nnojoluin choʼujaain nümüin motuin aaʼinyüü tü naainjalakat. Akaisaʼa nia motoleesia naaʼin tü waainjalakat. Nia neʼe Jeʼwaa washatajachikai akuwaʼipa süpüla motuinjatüin waaʼin saainjala wayuu.

Amülialaasü naaʼin Jeʼwaa naalii na wayuukana. Makalaka washatüin nukuwaʼipa otta warütkaain nünainmüin (Éfeso 4:32–5:1). Jülüja waaʼin pütchikat tüü: «Motule naaʼin Jeʼwaa waainjala süka nümülialaain waaliin, ¿jamakaʼa nnojoluinjatka motuin waaʼin naainjala wanee wayuu eekai kaainjalain woulia?» (Lucas 17:3, 4).