Waaʼinrajatka süpüla nanoujüinjanain na wapüshi manoujüinkana

WANAA sümaa chajachin Jesuu uuchimüin sünain tü palaakat Galilea, müshi nia nümüin wanee wayuu oʼuneekai nümaa: «Anashi püleʼejüle püchikua pipialuʼumüin sünainmüin tü püpüshikalüirua sünain püküjain süchiki tü kasa anasü naaʼinrüitpakat chi Maleiwakai pümüin». Niyaawata aaʼu Jesuu tü eekat sünain nukuwaʼipa wanee wayuu. Eere wanee kasa sünainpünaaka nukuwaʼipa, nüküjamaateein süchiki sümüin nüpüshi (Mar. 5:19).

Müsia sukuwaʼipa wayuu maaʼulu, süküjamaateein sümüin süpüshi tü sünainpünaakat sukuwaʼipa. Nunoujüle wanee wayuu nünain Jeʼwaa, nüküjamaateein süchiki sümüin nüpüshi. Naatale tü nunoujakalü anain wanee wapüshi jee manoujüinre nia, ¿jamüinjatü süküjia tü pütchikat nümüin? ¿Kasa waaʼinrajatka süpüla sujutuuinjatüin suluʼumüin naaʼin? Süküjüin tü Wiwüliakat tü sukuwaʼipainjatkat watuma.

«WANTÜICHIPA ANAIN CHI MESÍASKAI»

Nia Andrés ayaawataa naaʼu Jesuu palajana sünain niain chi Mesíaskai. Nuwataamaataka «nünainmüin chi nipayakai sünain maa nümüin: ‹wantüichipa anain chi Mesíaskai› ». (Tü pütchi «Mesías» makat, «Cristo nüneekajalakai Maleiwa» maluʼut.) Nuʼunirakalaka nia Pedro eemüin Jesuu, nikirajüinkalaka nia Jesuu mapa (Juan 1:​35-42).

Aipirua juya süchikijee tia, ounejaanüshi Pedro nipialuʼumüin Cornelio, chi sülaülakai surulaat. Chajachi kepiain Pedro chaa Jope otta Cornelio chaa Cesarea. ¿Jaralii na chajanakana nüpüla Pedro? Müsü tü Wiwüliakat: «Nantapaatakalaka Cesareamüin, eejachire Cornelio sünain aʼatapajaa naya sümaa nüpüshi otta na nütünajunnuu nnojotkana yalejeein aaʼin nuulia». Naapajüitpakalaka kasayuu nünain Cornelio nünüiki Pedro. Naneekaka süka naaʼin namüiwaʼa naʼwaajüinjachin Maleiwa (Aluw. 10:​22-33).

¿Kasa shikirajaka anain waya tü naaʼinrakat Andrés nümaa Cornelio sümüin napüshi?

Nachajaain sukuwaʼipa süpüla naküjüin tü pütchikat sümüin napüshi. Nüküjamaatüin Andrés nümüin chi nipayakai nüchiki Jesuu. Nuutkajeʼerüin Cornelio nüpüshi süpüla naapajüinjatüin nünüiki Pedro. Anoujüshii naya mapa otta nnojoishii nüpüleeruain aaʼin. ¿Kasa waaʼinrajatka süpüla washatüinjatüin nukuwaʼipa Andrés nümaa Cornelio? Waküjüinjatü namüin wapüshi süchiki tü kasa kamalainkat namüin, wachajaainjatü sukuwaʼipa süpüla natüjaainjatüin saaʼu tü sümakat tü Wiwüliakat jee weʼraajirüinjana naya wanee aküjüi pütchi. Nnojo wapüleeruain naaʼin. Wekirajaa süchiki nakuwaʼipa wanee wawalayuu anoujakana mapa, Jürgen sümaa Petra.

Ekirajaasü Petra sünain tü Wiwüliakat namaa na aküjüliikana pütchi jee woutiisaka shia mapa. Sülaüla surulaat paala chi suʼwayuusekai otta nnojotsü nücheküin süpüleerua tü saainjakat. Mapa, niyaawataka saaʼu shiimain tü nekirajakalü anain na aküjüliikana pütchi nüchiki Jeʼwaa. Müshijeseʼe nikirajaain sünain tü Wiwüliakat jee woutiisain nia. Laülaashi nia maaʼulu suluʼu tü outkajaaleekat. ¿Kasa waaʼinrajatka naashin Jürgen süpüla sujutuuinjatüin tü pütchikat suluʼu naaʼin na wapüshi naatakana anoula?

Müshi nia: «Nnojo püpüleeruain naaʼin shiiʼiree nanoujüin otta nnojo wainmain pünüiki namüin. Paainjüle tia, nnojoleena akaaʼinjaain. Paashajaʼawai neʼe namaa nüchiki Maleiwa soʼu wanee kaʼi. Piʼraajira naya wawalayuu eekai wanaawain nouyase namaa jee wanaawain tü kasa nachekakat».

Anoujamaatüshi chi aluwataaushikai Pedro otta müsia nüpüshi Cornelio. Eeshii joo na anoujakana mapa.

NA NUWALAYUUKANA JESUU

Kojuya na nuwalayuu Jesuu anoujakana nünain. Santiago nümaa Juan, nuwalayuu Jesuu saaʼu nüʼirüin Salomé. Eesü shiale Salomé soʼutku tü jieyuu akaaliinjaka Jesuu jee na nikirajüinkana sünain tü kasa eejatkat namaʼana (Luc. 8:​1-3).

Eepajaʼa waneeinnua nnojoliikana anoujüin nünain Jesuu. Maʼaka jeʼra juya süchikijee woutiisain nia, wainma wayuu outkajaaka süpüla saapajüin nünüiki. Müsü tü Wiwüliakat: «Shiasa natüjaapa naaʼu Jesús na nüpüshikana sünain chentaʼain sümüin tü wayuukolüirua nünain, nasaajaweein nia yalajee. ‹Maaʼinkai cheje aaʼin nia›, namajiraakalaka». Nüsakinnapa natuma na nuwalayuukana jalainjachin nia, nnojotsü nüküjüin namüin süka nnojolin nanoujüin nünain (Mar. 3:21; Juan 7:5).

Nnojo waashichijaain namüin na wapüshikana maʼaka nnojolin naashichijaain Jesuu wanaa sümaa «maaʼinkai cheje aaʼin nia» namüin na nüpüshikana nümüin. Süchikijee süsoʼiraain naaʼin, nütütüleʼerüin naaʼin na nüpüshikana. Eeʼiyataashijeseʼe nia nümüin Santiago, chi nimüliakai. Sünainjee tia, anoujüshi Santiago otta na wanee nuwalayuukana sünain niain Jesuu chi Mesíaskai. Eejana naya namaa na Aluwataaushikana chaa Jerusalén wanaa sümaa nüntüin chi naaʼinkai Maleiwa naaʼu. Aneekünüshi joo mapa Santiago nümaa Judas, na nimüliayuukana Jesuu süpüla wanee aʼyatawaa nümüin Maleiwa (Aluw. 1:​12-14; 2:​1-4; 1 Cor. 15:7).

NNOJOTSÜ WAPÜLEERUAINJATÜIN NAAʼIN

Nnojotsü wapüleeruainjatüin naaʼin na wapüshikana süpüla nanoujüinjanain. Jamüsüjaʼa tü wawalakat Roswitha, katoolikapuʼusü shia wanaa sümaa woutiisain chi suʼwayuusekai soʼu juyaka 1978. Nnojotpuʼusü anain sümüin nunoujüin chi suʼwayuusekai. Mapa, shiyaawataka saaʼu nekirajüin tü shiimainkat na aküjüliikana pütchi jee woutiisaka shia soʼu juyaka 2003. Anoujüsü shia nünain Jeʼwaa süka shiʼrüin anain maʼin nukuwaʼipa chi suʼwayuusekai. Nnojoishi nia aashichijaain sümüin mojule sünüiki nümüin, nnojotsü nüpüleeruain saaʼin süpüla suʼwanajaainjatüin sukuwaʼipa. ¿Kasa waaʼinrajatka saashin Roswitha? Müsü shia: «Nnojotsü ashapajaainjatüin waaʼin shiiʼiree nanoujamaatüin na wapüshikana».

Eesü wanee wawala Monika sünülia, woutiisasü shia soʼu juyaka 1974. Poloo juya süchikijee tia, woutiisashii na piamashiikana süchon. Hans, chi suʼwayuusekai, nnojotsü nüʼülüjüin amüin saaʼujee sunoujüin. Woutiisapajaʼa nia soʼu juyaka 2006. ¿Kasa waaʼinrajatka naashin naya wawalayuu manoujüinpuʼukana? Müshii naya: «Waneepia pia nümaa Jeʼwaa otta püküja waneepia süchiki tü punoujakalü anain». Anoujüshi Hans süka neeʼiyatüin waneepia na nüpüshikana alin nia napüla. Nnojoishi nia nayüülajüin, jülüjüsü naaʼin nunoujeechin watta kaʼi.

NASÜINJATÜ TÜ WÜIN KATAKALÜ ATUMA SOʼU WAYUU

Naashin Jesuu, katüsü soʼu wayuu sutuma tü pütchi sümakat tü Wiwüliakat (Juan 4:​13, 14, NM). Keeʼireesü waaʼin katüinjatüin noʼu na wapüshi manoujüinkana. Nnojotpejeʼe wapüleeruainjatüin naaʼin shiiʼiree nanoujüin. Jülüjüinjatü waaʼin palajana tü waküjüinjatkat namüin. Saashin tü Wiwüliakat, jülüjüinjatü waaʼin palajana tü waküjüinjatkat namüin otta kekiinjana maʼin waya süpüla kemeʼeriain tü pütchikat namüin. ¿Kasa waaʼinrajatka süpüla wountüin tia? (Prov. 15:28; 16:23.)

Nunoujeere suʼwayuuse wanee wayuu, jülüjüinjatü saaʼin palajana tü sünüikinjatkat otta nnojoluinjatü asounnajaamaatüin. Nnojotsü shiiʼiyatüinjatüin süka sukuwaʼipa suluwataweein naaʼu otta lotuin sukuwaʼipa nuulia. Nnojorüle saainjüin tia, aneerü nümüin chi suʼwayuusekai tü sümakat otta anajiraajeechi nia sümaa. Süpüla kemeʼeriainjatüin sünüiki, eesü süpüla jülüjüin saaʼin tüü: «¿Joujasüche anain yootoo nümaa chi taʼwayuusekai? ¿Jarat tü kasa kamalainkat nümüin süpüla naashajaain süchiki? ¿Jarat tü pütchi kamalainkat nümüin süpüla naashajeʼerüin? ¿Kamalainsüche nümüin aashajawaa süchiki poliitika otta süchiki ashaittaa woola? ¿Kasache taaʼinrajatka süpüla kamalainjatüin nümüin tü sümakat tü Wiwüliakat sümaa kojutüin tamüin tü nümakat?».

Süpüla sujutuuinjatüin tü pütchikat suluʼu naaʼin na wapüshikana, waaʼinrajatü tü kasa waküjakat namüin.

ANAINJATÜ WAKUWAʼIPA NOʼUPALA

Neʼrüinjatü na wapüshi manoujüinkana anain maʼin wakuwaʼipa sutuma wanoujüin. Müshi chi wawalakai Jürgen: «Paaʼinra tü püküjakalü achiki otta piʼitaa suluʼu pukuwaʼipa tü sümakat tü Wiwüliakat. Nanoujeerü anain na püpüshikana tü püküjakat namüin, jaʼitairü nnojoluin naküjüin shia pümüin». Müsia nünüiki Hans, chi woutiisakai apünüin shikii juya süchikijee woutiisain tü nuʼwayuusekat. Müshi nia: «Anainjatü maʼin wakuwaʼipa noʼupala na wapüshikana. Neʼrüinjatü suʼwanajaain wakuwaʼipa sutuma wanoujüin».

Müshi chi aluwataaushikai Pedro namüin na jieyuu manoujüinkana aʼwayuuse: «Anashii müleka jüüjüüle jia waneʼewaʼire jukua namüin juʼwayuuse. Mayaashiije naya ayouktüin nünüiki Maleiwa, eesü süpüla jimeʼejüin naaʼin sümaa nnojolüin jüʼülüjaain namaa, süka jaaʼinrüin kasa anasü waneepia noʼupala. Eesü süpüla kapülain naaʼin nünüiki Maleiwa müleka nayaawatüle saaʼu sünain kojutüin nia jütüma waneepia je müleka neʼrüle jia sünain shiimüin anain jukuaippa noʼupala nayakana. Tü kamalainkat namüin na juʼwayuusekana, nnojolüinjatü sükajeejatüin jaʼanaain noʼupala süka kuluulu eekai kojutüin maʼi, nnojolüinjatü sükajeejatüin jaʼanaain cheʼesaa ooro je aüliijanaa eekai anain maʼi, je nnojolüinjatü sükajeejatüin anain maʼi juʼwala noʼupalapünaa. Tü kamalainkat namüin, shiainjatü tü jukuaippakat sünain anamiashaatain je sünain kamaneein maʼi jia. Shia kojutka noʼuluʼu Maleiwa tiairua» (1 Ped. 3:​1-4).

Naashin Pedro müleka manoujüinre suʼwayuuse wanee wayuu, eesü süpüla shimeʼejüin naaʼin sükajee anain sukuwaʼipa nuʼupala. Eesü wanee wawala Christa sünülia, woutiisasü shia soʼujee juyaka 1972. Saaʼinrüin tü nümakat Pedro süpüla nunoujüinjachin chi suʼwayuusekai. Ekirajaashi nia maaʼulu sünain tü Wiwüliakat, oʼunüshi nia sünain tü outkajawaakat otta aleewashi nia namaa na wawalayuukana. Nnojoiyüiya nia woutiisain otta nnojoishi apüleeruaanüin aaʼin natuma na wawalayuukana. ¿Kasa saaʼinraka tü wawalakat Christa süpüla sujutuuinjatüin tü pütchikat suluʼu naaʼin chi suʼwayuusekai?

Müsü shia: «Taaʼinrüin waneepia tü nümakat Jeʼwaa. Anasü takuwaʼipa waneepia nuʼupala chi taʼwayuusekai süpüla nunoujüinjachin. Taaʼinrüin süpüshuaʼa tü kasa anakat nümüin. Shia nnojotka taaʼinrüin tü kasa eekai mojuin nümüin Jeʼwaa. Nnojotsü tapüleeruain naaʼin otta tooʼulaain süpüshuaʼa tü kasakat najapuluʼu Jeʼwaa».

Mayaasüjeʼe süküjüin maʼin pütchi waneepia Christa otta waneepiain shia sünain tü outkajawaakat, nnojoishi motuin saaʼin chi suʼwayuusekai, shiiʼiyatüin süka sukuwaʼipa alin nia süpüla otta akatatsü shia kaʼi süpüla nümaain shia. Waaʼinrüinjatü tia namüin na wapüshi manoujüinkana. Saashin tü Wiwüliakat «eesü kaʼi süpüla saaʼinnüin wanee kasa». Wakatala kaʼi süpüla namaain waya na wapüshikana. Waaʼinrajatü maʼin tia müleka manoujüinre waʼwayuuse. Müle shia watuma, yootojiraajeena waya sümaa waʼwayuuse, nnojoleerü mojuin saaʼin süka wapütüin shia sümüiwaʼa otta nnojoleerü achunjüin saaʼin (Ecl. 3:1, NM).

JÜLÜJA WAAʼIN NANOUJEENAIN WATTA KAʼI

Eeshi wanee wawala Holger nünülia, woutiisashi chi nüshikai piama shikii juya süchikijee nawoutisaajüin na nüpüshikana. Müshi nia süchiki tia: «Waküjüinjatü namüin na wapüshikana alin naya wapüla otta woʼuraajüin napüleerua». Müsü tü wawalakat Christa: «Jülüjüsü taaʼin waneepia nunoujeechin chi taʼwayuusekai otta niʼyataajeechin nümüin Jeʼwaa». Müinjatia tü jülüjakat waaʼin, nnojoliinjana waya ojoʼluin sünainjee wapüshi.

Anainjatü wakuwaʼipa namaa na wapüshi manoujüinkana, waküjüinjatü namüin tü pütchikat süpüla sujutuuinjatüin suluʼu naaʼin. Weeʼiyata nojutü sümaa kamaneein waya namüin (1 Ped. 3:15).