Susouktaka eʼipajee tü Wiwüliakat
¿Kaseerü naainjaka Jesuu soʼu palitchon kaʼi?
Soʼu juyaka 33 soʼu wakalia, oʼutüna aaʼinchi Jesuu. Shiasaʼa süchikijee, asoʼireʼennüsü naaʼin süpüla chainjachin nia iipünaa. Aikkalaashi nia sünain aluwatawaa chaa iipünaa kojuya juya süchikijee tia (Daniel 7:13, 14). Soʼu palitchon kaʼi, anajiraajeerü tü wayuukalüirua nutuma otta nnojoleerü tü müliaakat. (Paashajeʼera Salmo 72:7, 8, 13.)
Nnojoleerü müliain wayuu nuluwataapa Jesuu yaa saaʼu Mmaka
Wainmeerü kasa anasü naainjaka Jesuu nuluwataapa saaʼu tü Mmakat. Aneena maʼin nachikuaʼa na wayuukana nutuma. Kateena oʼu waneepia yaa saaʼu tü Mmakat, nnojoleena laülaain jee ouktüin naya. (Paashajeʼera Juan 5:26-29 otta 1 Corinto 15:25, 26, NM.)
¿Kasache naainjaka Jesuu maaʼulu?
Nuʼunirüin nakuwaʼipa na nikirajüinkana sünain aküjaa pütchi sainküin mmaka süpüshuaʼa. Nekirajüin na wayuukana süchiki Nuluwataaya Maleiwa. Nüküjüin Jesuu namüin eeinjachin nia namaa sünainmüinreʼeya tü kaʼi süntajatkalü oʼu tü Nuluwataayakat Maleiwa. (Paashajeʼera Mateo 24:14 otta 28:19, 20.)
Nikirajüin Jesuu na wayuukana nakajee na nikirajüinkana süpüla nanoukteʼerüin nakuwaʼipa. Nuʼunireerü nakuwaʼipa suʼunnaa sajaʼttinnüin tü kasa mojusükat otta eepa nutuma Maleiwa tü mma jeketüinjatkat. (Paashajeʼera 2 Pedro 3:7, 13 otta Alateetkat Mapeena [Apocalipsis] 7:17, NM.)