SUSOUKTAKA EʼIPAJEE TÜ WIWÜLIAKAT
¿Jarai chi aluwataakai saaʼu wayuu sainküin mma?
Nnojotsüjee jouluin müliaa niale Maleiwa aluwataain saaʼu wayuu
Naashin noʼutku na wayuukana nia Maleiwa aluwataaka saaʼu wayuu. Mülejeʼe shia nnojotsüjee jouluin maʼin müliaa (Deuteronomio 32:4, 5). Saashin tü Wiwüliakat nia chi Yolujaakai aluwataakai saaʼu wayuu manoujüinsat. (Paashajeʼera 1 Juan 5:19.)
¿Jamakuwaʼipai chi Yolujaakai süpüla nuluwataainjachin saaʼu wayuu? Eʼrüshi nia wayumüin nümüin Maleiwa nümaleiwaʼaya. Nuluwataain chi Yolujaakai chi palajachikai wayuu otta tü palajatkat jierü sünain ekaa süchon wanee wunuʼu apülajünüsü noulia (Génesis 3:1-6). Oonooshii naya sümaa nünüiki Satanaa, müichika nia aluwataain naaʼu. Nia neʼe Maleiwa chi aluwataainjachikai saaʼu wayuu süka niain pülashin nümüiwaʼa. Keeʼireepajaʼa naaʼin alinjachin nia süpüla wayuu süka naaʼin namüiwaʼa (Deuteronomio 6:6; 30:16, 19). Ayatüsia neʼe oonooin tü wayuukalüirua maaʼulu nümaa Satanaa maʼaka naaʼin Adán sümaa Eva. (Paashajeʼera Alateetkat Mapeena [Apocalipsis] 12:9.)
¿Jarai chi anainjachikai atuma sukuwaʼipa wayuu?
¿Ayateeiche Satanaa aluwataain saaʼu wayuu? Nnojo. Nieechi Jesukürisüto ajaʼttiraka tü kasa mojusü naaʼinrakat chi Yolujaakai. (Paashajeʼera 1 Juan 3:8.)
Aapünüsü laülawaa nümüin Jesuu süpüla niyamülüin Satanaa (Roma 16:20). Nieechika Maleiwa aluwataain mapa naaʼu na wayuukana otta aneerü nakuwaʼipa nutuma maʼaka nücheküin shia paala. (Paashajeʼera Alateetkat Mapeena 21:3-5.)