PÜTCHI SÜNAINKA SÜTA TÜ REWIISÜTAKAT
Ouktüsü maʼin wayuu sutuma akaijaa
Ouktüsü maʼin wayuu sutuma akaijaa.
Ouktüirü sien miyoone wayuu sutuma. Ouktüsü seei miyoone wayuu juyawai. Ouktüsü maʼin wayuu waneepia sutuma.
Müsü nnojotkai sunouktaweekai aaʼin.
Naashin na atüjüshiikana maʼin, süntapa juyaka 2030, alateerü suulia oocho miyoone wayuu ouktaka juyawai sutuma akaijaa. Akaʼaya süntapa juyaka 2099, eejeerü miit miyoone wayuu ouktaka sutuma akaijaa.
Müliasü maʼin naaʼin napüshi na wayuu akaijüliikana, mojusü maʼin naaʼin otta wainma nneerü nojutaka ouktapa na napüshi akaijajakana. Anaataa joo ouktüin seisientomiit wayuu sutuma nasanalüin tü sümüsainkat. Wainma maʼin nneerü oʼunaka ayuuitpa joo wayuu sutuma tü akaijaakat.
Nnojotsü mepin tü akaijaakat. Saashin Margaret Chan, süpüʼüya Organización Mundial de la Salud (OMS), eeshii süpüla nooʼulaain suulia akaijaa na akaijüliikana müleka nakaaliinjünüle natuma na sülaülashiikana mma otta suuʼulaale wayuu suulia akaijaa.
Aʼyataana maʼin achiiruat süpüla suuʼulaanüinjatüin suulia tü akaijaakat. Soʼu juyaka 2012, eesü jutkataa natuma wayuu suluʼujeejana 175 mma süpüla suuʼulaainjatüin wayuu suulia akaijaa.a Mayaapejeʼe saainjünüin tia, joutsü maʼin tü akaijaakat. Tü konpainyiia akumajakat tü akaijuushikat, anasü maʼin sukuwaʼipa sutuma suluʼu telewisoot otta karaloukta süpüla shiyaʼlajünüinjatüin maʼin. Wainma tü nneerü oʼunaka sünain tia. Sutuma kiʼrain maʼin wayuu sünain akaijaa, wainmeerü maʼin tü ouktakat sainküin mmaka süpüshuaʼa. Nnojorüle suuʼulaain wayuu suulia akaijaa, wainmeerü maʼin wayuu ouktaka sülatapa pienchi shikii juya.
Icheka wayuu süchiirua akaijaa, shia sutuma shiʼrüin sujuʼitüin suluʼu telewisoot otta kiʼrain shia sünain akaijaa. Eesü wanee wayuu Naoko sünülia, akaijüsü shia majayülüiwaʼaya süka shiʼrüin suluʼu telewisoot anain maʼin tü akaijaakat. Mayaainjeʼe piamain süchonnii jee ouktüin chi süshikai otta tü shiikat sutuma cáncerüin süsoso, macheʼesat shia süchiirua akaijaa. «Mayaainjeʼe tatüjaain saaʼu eein süpüla cáncerüin tü tasosokot sutuma akaijaa otta ayuulin na tachonniikana, macheʼesat taya süchiirua otta isainjatia tachiki taaʼinruʼu tooʼulaain suulia», müsün.
Wainma wayuu ooʼulaaka suulia akaijaa, müsia Naoko ooʼulaasü shia suulia akaijaa. ¿Kasa saainjaka süpüla suuʼulaain suulia akaijaa? Wekirajaa süchiki tia.
a Aküjünüsü namüin na wayuukana otta akaaliinjünüshii naya süpüla nooʼulaainjanain suulia akaijaa. Nnojotsü ooʼulaanüin sujuʼitüin suluʼu telewisoot, sünain karaloukta otta kojutüsü maʼin sülatiainna tü akaijuushikat.