¿Kaseerü naainjaka Maleiwa süpüla najaʼttirüin tü kasa mojusükat?

Süküjüin tü Wiwüliakat tü kasa naainjüinjatkat Jeʼwaa otta Jesuu süpüla najaʼttirüinjatüin tü kasa mojusükat. Müsü tü Wiwüliakat: «Eweetüshijese chi Nüchonkai Maleiwa süpüla najaʼlajeʼerüinjatüin tü kasa mojusü naaʼinrakat chi Yolujaakai» (1 Juan 3:8). Tü kasa mojusü eekat maaʼulu maʼaka saaʼin keeʼirewaa aaʼin washirüü, üttaa aaʼin, najaʼttireerü shia Jesuu. Otta ataʼüneechi Satanaa süpüla nnojolin naainjirüin kasa mojusü na wayuukana (Juan 12:​31, NM). Nnojotpa tü kasa mojusükat, aneerü sukuwaʼipa tü Mmakat otta nnojoleerü eein atkawaa (2 Pedro 3:​13, NM).

¿Kaseerü alataka namüin na wayuu macheʼekana süchiirua aaʼinraa tü kasa mojusükat? Müsü tü Wiwüliakat: «Na lotushiikana akuwaʼipa otta na maainjalasaliikana, nayeena kepiaka saaʼu tü mmakat». Akanasaʼa «na mojulaashiikana, ajaʼlajeʼennüinjana saaʼujee tü mmakat» (Proverbios 2:​21, 22, NM). Müiria nnojoluin eein kasa mojusü, shieerü eeka jimataa aaʼin saaʼu tü Mmakat. Anouktaa anouktaa meerü mapa nakuwaʼipa na wayuu jaa makana nümüin Maleiwa (Roma 6:​17, 18; 8:21).

Süpüla najaʼttirüin Maleiwa tü kasa mojusükat, nikirajeena waya sünain tü kasa anasükat. Naainjeerü tia süpüla nnojoluinjatüin jülüjüin waaʼin tü kasa mojusükat. Nnojoishii müinjanain neʼe waya nutuma maʼaka saaʼin wanee kemion oʼunaka eepünaale suʼuninnüin.

¿Ayateetchejeʼe alatalaa müin kasa mojusü nümüin wanee wayuu? Nnojoleerü ayatüin. Aneerü sukuwaʼipa tü mmapaʼakat sutuma Nuluwataaya Maleiwa jee niʼitaain Jesukürisüto süpüla niainjachin aluwataain otta niainjachin eiyajüin wayuu eekai ayuulin (Mateo 14:14). Nnojoleerü akutkujaain tü mmakat otta nnojoleerü eein sooʼomüin wawai (Marcos 4:35-41). Nnojoleerü alatalaa müin kasa mojusü nümüin wanee wayuu (Eclesiastés 9:11). Nuluwataapa Jesuu, müiria nnojoluin eein tü kasa mojusü müliakalü atuma wayuu (Proverbios 1:33).

Akaʼaya na wayuu ouktüinnapakana, asoʼiraajeerü naaʼin nachikuaʼa. Müshi Jesuu nümüin Lázaro süchikijee nüsoʼireʼerüin naaʼin: «Taya chi atüjakai asoʼireʼeraa saaʼin wayuu» (Juan 11:​25, NM). Shiimain tia, nieechi Jesuu asoʼireʼeraka saaʼin tü wayuu ouktüsükalüirua.

Pücheküle kepiaa suluʼu wanee mma eere nnojoluinjatüin sülatüin kasa mojusü sümüin wayuu, pikirajaa sünain tü Wiwüliakat. Pütüjaajeerü aaʼu tü shiimainkat nüchiki Maleiwa otta süchiki tü kasa naainjüinjatkat püpüleerua. Nekirajeechi pia na aküjüliikana pütchi nüchiki Jeʼwaa. Paashajaa namaa jee shiale puluwataain wanee karaloukta eemüin tü dirección ashajünakat sünain rewiisütakat tüü.