SUSOUKTAKA EʼIPAJEE TÜ WIWÜLIAKAT

¿Jamüsü anaka oʼuraajaa?

Keeʼireesü naaʼin Maleiwa waküjawalin nümüin tü shapaakalü atuma waaʼin sümaa weʼitaain waaʼin nünain (Lucas 18:1-7). Naapüin wanüiki süka jülüjüin waya naaʼin. Nuchuntüin wamüin chi Washi Iipünaajachikai waashajaainjanain nümaa. Anasü maʼin paaʼinrüle tia. ( Paashajeʼera Filipos 4:⁠6.)

Oʼuraajüshii waya süpüla warütkaainjanain nünainmüin Maleiwa. Nnojoishii oʼuraajüin neʼe waya süpüla wachuntüin nümüin (Salmo 8:​3, 4). Waküjawaire nümüin Maleiwa tü suluʼukat waaʼin, aleeweena maʼin waya nümaa. ( Paashajeʼera Santiago 4:⁠8.)

¿Jamüinjatü wanüiki woʼuraajapa?

Woʼuraajapa, nnojotsü keeʼireein naaʼin Maleiwa wojuʼitirüinjatüin pütchi nnojotka shiyaawatüin aaʼu wayuu. Nnojotsü anain nümüin weiteʼerakuʼu wamüin wanüiki woʼuraajapa nümüin. Woʼuraajüinjanapa nümüin Maleiwa, nnojotsü nüküjüin wamüin shaʼwatüinjanale waya, joyotuinjanale waya, wasapainkainjanale waya. Tü keeʼireekat naaʼin shia woʼuraajüinjanain nümüin süka süpüshuaʼa waaʼin (Mateo 6:​7, NM). Jamüsüjaʼa sümaiwa, oʼuraajüsü Ana nümüin Maleiwa sutuma mojuin maʼin saaʼin saaʼu wanee kasa alataka sümüin sümaa süpüshi. Shiasaʼa mapa, oʼuraajüsü shia nümüin Maleiwa süka nükaaliinjüin shia. Talatüsü saaʼin sutuma tia. ( Paashajeʼera 1 Samuel 1:​10, 12, 13, 26, 27 otta 2:⁠1.)

Anashaatasü maʼin oʼuraajaa nümüin Jeʼwaa. Süka jamüin, eein süpüla waküjüin nümüin tü kasa mojusü alatakat wamüin, waʼwaajüin nia otta waapüin tü analuʼutkat nümüin saaʼu tü kasa naainjakat. Makalaka woʼuraajüinjanain waneepia. ( Paashajeʼera Salmo 145:14-16.)