¿Jara kakumainka Maleiwa?

Müsü nünüiki wanee wayuu nümüin nüchon, akaratshikai ouyase: «Sümaʼaleeiwaʼaya paala, nukumajüin Maleiwa tü Mmakat jee süpüshuaʼa tü kasa eekat saaʼu, nukumajüin chi kaʼikai, chi kashikai müsia tü shüliwaikalüirua». Jülüjaa mataasü naaʼin jintüikai nünüiki nüshi. «Papaa, ¿jaraikaʼa kakumalain Maleiwa?», nümaka jintüikai.

«Nnojoishi jarülin akumajüin nia, eetüjüiya nümaiwa» müshijaʼa nüshikai nümüin. Nunoujüinjaʼa jintüikai nünüiki nüshi. Shiasaʼa miyoʼupa jintüikai, sotojoosü naaʼin tü nümakat paala chi nüshikai nümüin. Nnojoluitpainjaʼa müin niyaawatakai saaʼin tü nümakat paala chi nüshikai nümüin jintüliiwaʼaya nia. «Jamüshi nnojoikaʼa jarülin kakumalain Maleiwa, eeshi eera chi akumajakai nia, jaʼitakajaʼa neʼe tü kasa eekat yaa mmapaʼa jee tü kasa chakalü iipünaa, eeshi chi kakumainkai shia», maa müsü naaʼin chi jintüikai. Ayatsia nnojoluin nütüjaain aaʼu jintüikai jaralin kakumalain Maleiwa.

¿Jamüsü sünüiki tü Wiwüliakat süchiki tü nüsakitkalü anain chi jintüikai? Shiaʼaya neʼe tü nümakat chi nüshikai nümüin. Müsü nünüiki Moisés: «Jeʼwaakalee, [...] süpülapünaa pukumajüin tü uuchikalüirua jee tü mmakat, eetüjüiya pia suluʼu kaʼika süpüshuaʼa ooʼulaka eejeechi pia süpüla kaʼika süpüshuaʼa» (Salmo 90:1, 2, NM). «¿Nnojotsüjasaʼa paapüirüin nüchiki Jeʼwaa chi Kakumainkai tü kasakat süpüshuaʼa? Eejeechi nia suluʼu kaʼika süpüshuaʼa», müsü nünüiki Isaías (Isaías 40:28, NM). Akaʼaya naashin Judas, eetüjüiya Maleiwa nümaiwa (Judas 25).

Naashin Pablo, nia Maleiwa aluwataaka süpüla kaʼikat süpüshuaʼa süka matüjain nia ouktaa (1 Timoteo 1:17). Eetüjüiya Maleiwa nümaiwa jee eeinjachi nia waneepia süpüla kaʼika süpüshuaʼa (Alateetkat Mapeena [Apocalipsis] 1:8). Nnojoishi jaralin akumajüin Maleiwa ooʼulaka matüjainsai nia ouktaa.

¿Jamakaʼa nnojotka müin shiyaawatakai saaʼin wayuu tia? Shia süka nnojoluin katüin soʼu süpüla kaʼika süpüshuaʼa. Jamüshiijaʼa wayakana, kakaliashaatasü wamüin miit juya. Aluʼujasaʼa nümüin Jeʼwaa, nnojotsü kakaliashaatain, maaʼatsü maʼaka saaʼin wanee kaʼi. Makaʼa nukuwaʼipa, shia süka matüjüin nia ouktaa (2 Pedro 3:8). Anuu wanee sukuwaʼipa süpüla wayaawatüin saaʼu tü wamüitpakat: jamüshijaʼa wanee kaashapa, nnojotsü kakaliain katüin noʼu, eeʼeraashi neʼe nia soʼu jaʼrai shikii kaʼi. Aluʼuinjaʼa wanee wayuu kakaliashi katüin noʼu, nüsaʼwatüin 70 juya jee shiale 80 juya. Saashin tü Wiwüliakat, müshii waya maʼaka saaʼin wanee kaashapa nümüin Jeʼwaa, nnojotsü wayaawatüin saaʼu nukuwaʼipa süka nnojoluin kakaliain katüin woʼu maʼaka naaʼin niakai (Isaías 40:22; 55:8, 9). Makalaka nnojoluinjatüin mojuin waaʼin nnojorüle wayaawatüin saaʼu wanee kasa watüjaweeka aaʼu nünainjee Jeʼwaa.

Müleka eereje wanee akumajakai Maleiwa yalejee, niashije Maleiwaka nuulia Jeʼwaa. Süküjapejeʼe tü Wiwüliakat niain Jeʼwaa «kakumalain kasakat süpüshua» (Alateetkat Mapeena 4:11). Sümaiwa paala, nnojotpuʼusü kasain eein (Génesis 1:1, 2). ¿Jaraika kakumalain shia? Nia Maleiwa Kakumalaka, nukumajüin Maleiwa na aapiee chejeʼewaliikana iipünaa jee nukumajüin Jesuu, chi palajaikai Nüchon (Job 38:4, 7; Colosas 1:15, NM). Nia neʼe Maleiwa eetüjüikaʼaya süpülapünaa nukumajüin süpüshuaʼa tü kasakalüirua. Nnojoishi jaralin kakumalain Maleiwa.

Watüjaa aaʼu eetüjülin chi Maleiwakai nümaiwa paala süka niain kakumalain tü kasakalüirua süpüshuaʼa jee na wayuukana. Nia eʼitaatüjüikaʼaya sukuwaʼipa süpüshuaʼa tü kasa nukumajakat ooʼulaka nia kanainjeejachikai tü kataakalü oʼu (Job 33:4).